ہندوستان کی خواتین ہاکی ٹیم نے شاندار کارکردگی کا مظاہرہ پیش کرتے ہوئے ایف آئی ایچ  عالمی کپ میں اتوار کو پیرس اولمپک کی رنر اپ چین کو پول’ ڈی‘ کے انتہائی مشکل مقابلے میں ۲۔۲؍سے ڈرا پر روک کر اپنے سفر کا شاندار آغاز کیا۔ پول’ ڈی‘ میں  ہندوستان کے لئے سب سے بڑا چیلنج مانے جانے والے اس مقابلے میں  ہندوستان نے پہلے ہی کوارٹر میں اپنا دباؤ قائم کر لیا تھا اور چین کو کھل کر کھیلنے کا موقع نہیں دیا۔

 

 

ہاف ٹائم تک  ہندوستان کے پاس دوایک کی برتری تھی۔ آخری کوارٹر میں اگر  ہندوستان کو پنالٹی کارنر مل جاتا تو نتیجہ کچھ اور ہو سکتا تھا۔ پورے میچ میں شاندار فارم میں موجود نوونیت کور سرکٹ میں گیند لے کر گھسنے کی کوشش کر رہی تھیں لیکن چین نے ان کی اس کوشش کو ناکام بنا دیا۔ ہندوستان کی طرف سے نوونیت کور (۸؍ویں منٹ) اور دیپیکا (۲۶؍ویں منٹ) نے گول کئے جبکہ چین کی جانب سے ۱۴؍ویں منٹ میں ژانگ ینگ نے پنالٹی اسٹروک پر اور ۳۹؍ویں منٹ میں ما ننگ نے  پناٹی کارنر پر گول کیا۔ ہندوستان کا اگلا مقابلہ اب ۱۸؍ اگست کو جنوبی افریقہ کے خلاف ہوگا، جسے آج ایک دوسرے میچ میں انگلینڈ نے ۴۔صفرسے شکست دی ہے۔