خواتین کا آئی سی سی کرکٹ عالمی کپ ۲۰۲۵ء جیتنے والی ہندوستانی خواتین کرکٹ ٹیم کے اراکین نے جمعرات کو راشٹرپتی بھون میں صدرِ جمہوریہ دروپدی مرمو سے ملاقات کی۔ صدرِ جمہوریہ نے ہندوستانی خواتین کرکٹ ٹیم کی ہرکھلاڑی کو مبارک باد دی۔

 خواتین کا آئی سی سی کرکٹ عالمی کپ ۲۰۲۵ء جیتنے والی ہندوستانی خواتین کرکٹ ٹیم کے اراکین نے  جمعرات کو  راشٹرپتی بھون میں صدرِ جمہوریہ دروپدی مرمو سے ملاقات کی۔ صدرِ جمہوریہ نے ہندوستانی خواتین کرکٹ ٹیم کی ہرکھلاڑی کو مبارک باد دی اور کہا کہ انہوں نے عالمی کپ جیت کر تاریخ رقم کی ہے۔ ملک اور بیرون ملک میں مقیم کروڑوں ہندوستانی اس کامیابی کا جشن منا رہے ہیں۔
صدرجمہوریہ دروپدی مرمو نے کہا کہ یہ ٹیم ہندوستان کی عکاسی کرتی ہے۔ یہ مختلف خطوں، مختلف سماجی پس منظر اور مختلف صورتحال کی نمائندگی کرتی ہے لیکن یہ ایک ہی ٹیم، ٹیم انڈیا ہے ۔ یہ ٹیم ہندستان کی بہترین تصویر پیش کرتی ہے۔ صدرجمہوریہ نے کہا کہ اس ٹیم نے سات مرتبہ کی عالمی چمپئن  اور اُس وقت تک کوئی بھی میچ نہ ہارنے والی آسٹریلیائی ٹیم کو شکست دے کر سبھی ہندوستانیوں کا اپنی صلاحیت پر یقین مضبوط کیا ہے۔ مضبوط ٹیم کے خلاف مشکل فائنل میچ میں بڑے فرق سے فتح حاصل کرنا ٹیم انڈیا کی شاندار کارکردگی کی یادگار مثال ہے۔
صدرجمہوریہ نے کہا کہ آپ سب مثالی کردار بن گئی ہیں۔ نئی نسل، خاص طور پر لڑکیاں، آپ سے تحریک حاصل کرکے زندگی میں آگے بڑھیں گی۔ انہوں نے اس اعتماد کااظہار کیا کہ جس صلاحیت کے ساتھ آپ نے تاریخ رقم کی ہے، اسی سلسلے کے تحت آپ مستقبل میں بھی ہندوستانی کرکٹ کو دنیا میں سرکردہ مقام پربرقرار رکھیں گی۔
 صدرجمہوریہ ہند نے کہا کہ ٹیم کی کھلاڑیوں نے امید اور مایوسی کے حوالے سے نشیب و فراز کا سامنا کیا ہوگا۔ بعض اوقات شاید نیند بھی اڑ گئی ہوگی، لیکن آپ سب نے ہر چیلنج پر قابو پایا۔ انہوں نے کہا کہ نیوزی لینڈ کے خلاف جیت کے بعد عوام کا بھروسہ مزید مضبوط ہو گیا تھا کہ نشیب و فراز کے باوجود ہماری بیٹیاں فتح حاصل کریں گی۔

یہ بھی پڑھئے:گیندبازی کی بنیاد پر ہندوستان آگے ،سیریز میں برتری حاصل کی

صدرجمہوریہ دروپدی مرمو نے اس بات پر زور دیا کہ آپ کی کامیابی کے پیچھے آپ کی محنت، بہترین کھیل، عزم، اور آپ کے کنبوں اور کرکٹ کے شائقین کی دعائیں شامل ہیں۔ انہوں نے کہا کہ کرکٹ جیسے ٹیم پرمبنی کھیل میں ہر کھلاڑی کا مکمل طور پرپرعزم رہنا ضروری ہوتا ہے۔ انہوں نے ہیڈ کوچ، بولنگ کوچ، فیلڈنگ کوچ اور سپورٹ اسٹاف سب کی تعریف کی۔ انہوں نے نیک خواہشات کا اظہار کیا کہ آپ اپنی شاندار کارکردگی جاری رکھیں اور ٹیم انڈیا کے لیے مزید کامیابیاں حاصل کریں۔