خواتین ورلڈ کپ کے میچ سے قبل ہرمن پریت کور کی قیادت میں ہندوستانی خواتین کی ٹیم بھی پاکستانی کھلاڑیوں سے مصافحہ نہیں کرے گی۔ دونوں ٹیمیں ۵؍ اکتوبر کو کولمبو میں ٹکرائیں گی۔

ایشیا کپ کے دوران ہندوستانی مردوں کی ٹیم کے موقف کی روشنی میں، ہرمن پریت کور کی زیر قیادت ہندوستانی خواتین ٹیم بھی پاکستانی کھلاڑیوں سے مصافحہ نہیں کرے گی۔ دونوں ٹیمیں ۵؍ اکتوبر کو کولمبو میں ٹکرائیں گی۔

یہ بھی پڑھئیے:یشسوی جیسوال ٹائم میگزین کے ٹاپ ۱۰۰؍ رائزنگ اسٹارز میں شامل

ہندوستان اور پاکستان کے درمیان کرکٹ تعلقات پہلے سے ہی تنزلی کا شکار ہیں اور صورتحال اس وقت خراب ہوئی جب پاکستان کرکٹ بورڈ (پی سی بی) اور ایشین کرکٹ کونسل (اے سی سی) کے سربراہ محسن نقوی نے دبئی میں سوریہ کمار یادو کی قیادت والی ہندوستانی ٹیم کو فاتح ٹرافی پیش کرنے سے انکار کردیا۔ ایشیا کپ۲۰۲۵ء کے فائنل میں  ہندوستان  نے پاکستان کو شکست دے کر ٹائٹل اپنے نام کیا  لیکن میچ کے بعد ٹرافی کی تقسیم کے تنازع نے کرکٹ کے منتظمین اور شائقین کے درمیان تناؤ بڑھا دیا۔ اس سے پاکستان کرکٹ ٹیم اور محسن نقوی کو کافی شرمندگی کا سامنا کرنا پڑا۔  ہندوستان  نے میچ میں پہلے ہی فیصلہ کر لیا تھا کہ وہ نقوی سے ٹرافی قبول نہیں کرے گا لیکن نقوی نے شرمناک حرکت کرتے ہوئے ٹرافی اور تمغے اپنے ساتھ لے گئے اور ایشین کرکٹ کونسل کے دفتر بھی بھیج دیا۔ اس واقعہ نے پی سی بی کی ساکھ پر سوالات کھڑے کر  دیئے۔
  بی سی سی آئی کے ایک سینئر عہدیدار نے پی ٹی آئی کو بتایا کہ’’بی سی سی آئی حکومت کی پالیسی کے مطابق ہے۔ ٹاس کے وقت کوئی مصافحہ نہیں ہوگا، میچ ریفری کے ساتھ کوئی فوٹو سیشن نہیں ہوگا  اور میچ کے اختتام پر کھلاڑیوں کے درمیان کوئی مصافحہ نہیں ہوگا۔ خواتین کی ٹیم بھی اسی پالیسی پر عمل کرے گی جو مردوں کی ٹیم کرتی ہے۔‘‘
 کولمبو میں ایک اور دلچسپ پہلو یہ ہوگا کہ ٹاس کون کرے گا۔ توقع ہے کہ کوئی سابق کھلاڑی یا کسی غیر جانبدار ملک کا کوئی ماہر اس کے لیے ذمہ دار ہوگا۔ یہ ماحول نیوزی لینڈ میں ہونے والے۲۰۲۲ء کے ون ڈے ورلڈ کپ سے بہت دور ہوگا، جب پاکستانی کپتان بسمہ معروف کی شیر خوار بیٹی کے ساتھ ہندوستانی کھلاڑیوں کی تصاویر وائرل ہوئی تھیں۔ اس بار ہرمن پریت کور اور پاکستان کی کپتان فاطمہ ثناء کے درمیان مبارکباد کے باضابطہ تبادلے کا بھی امکان نہیں ہے۔