انڈر۔۱۹؍ ایشیا کپ کیلئے ہندوستانی ٹیم کے کپتان منتخب ہونے والے آیوش مہاترے نے   ۱۱۰؍ رنوں کی شاندار اننگز کھیل کر ممبئی کو سید مشتاق علی ٹرافی ایلیٹ گروپ’ اے‘ کے میچ میں ودربھ کے خلاف ۱۳؍گیندیں باقی رہتے ۷؍ وکٹوں سے فتح دلادی۔

ممبئی کا ۱۹۳؍ رنوں کے ہدف کے تعاقب میں آغاز اچھا نہیں رہا صرف ۲۱؍ رن پر اپنے ۲؍ وکٹ کھو دئیے۔ اجنکیا رہانے ودربھ کے خلاف بغیر کوئی رن بنائے اور ہارڈک تامورے ایک رن پر آؤٹ ہو کر واپس پویلین گئے۔ اس کے بعد بلے بازی کیلئے آئے سری کمار یادو نے آیوش مہاترے کے ساتھ مضبوط شراکت قائم کی اور دونوں نے مل کر ۸۸؍ رنوں کی پارٹنرشپ نبھائی۔

بارہویں اوور میں یش ٹھاکر نے سری کمار یادو کو آؤٹ کر کے یہ شراکت توڑ دی۔ یادو نے ۳۰؍ گیندوں میں ۳۵؍ رن بنائے، جس میں ۴؍ چوکے اور ایک چھکا شامل تھا۔ اس کے بعد بیٹنگ کرنے آئے شِیوم دوبے نے آیوش مہاترے کے ساتھ جارحانہ بلے بازی کرتے ہوئے صرف ۱۷ء۵؍اوورز میں ۳؍ وکٹ پر ۱۹۳؍ رن بنا کر ٹیم کو فتح دلوائی۔آیوش مہاترے نے ۵۳؍گیندوں میں ۸؍ چوکے اور۸؍ چھکے لگائے اور اپنی ٹیم کیلئے  ناٹ آؤٹ ۱۱۰؍ رنوں کی اننگز کھیلی۔ انہوں نے صرف ۴۹؍گیندوں میں اپنی سنچری مکمل کی جو ان کی ٹی۔۲۰؍کیریئر کی پہلی سنچری ہے۔ 

پرنس یادو (۳؍وکٹ) اور سمرجیت (۲؍ وکٹ) کی مؤثر بولنگ کے بعد یش دھول (۷۱؍ رن) اور آیوش بدونی (۴۱) کی شاندار بیٹنگ کی بدولت دہلی نے جمعہ کے روز سید مشتاق علی ٹرافی کے ایلیٹ گروپ ’ڈی‘ کے مقابلے میں تمل ناڈو کو ۶؍ وکٹ سے شکست دے دی۔

۱۹۹؍ رنوں کے تعاقب میں دہلی کو یش دھول اور پریانش آریہ کی اوپننگ شراکت نے مضبوط آغاز فراہم کیا۔ دونوں نے پہلے وکٹ کیلئے ۵۲؍ رن جوڑے۔ چھٹے اوور میں سونو یادو نے پریانش آریہ کو آؤٹ کر کے تمل ناڈو کو پہلی کامیابی دلائی۔ پریانش نے ۱۵؍گیندوں پر ۳۵؍ رن کی جارحانہ اننگز کھیلی جس میں ۶؍چوکے اور ایک چھکا شامل تھا۔ کپتان نتش رانا۲۶؍ گیندوں پر ۳۴؍ رن بنا کر پویلین لوٹے۔

 

 

۱۸؍ویںاوور میں یش دھول کی اننگز کا خاتمہ ہوا۔ یش نے ۴۶؍گیندوں پر ۴؍ چوکے اور ۴؍ چھکوں کی مدد سے ۷۱؍ رن اسکور کئے۔آخری اوور میں دہلی کو فتح کیلئے۱۲؍  رن درکار تھے۔ ہمت سنگھ نے ۴؍گیندوں پر ۱۱؍ رنبنائے جبکہ انوج راوت نے ایک چوکا لگایا۔ میچ کی آخری گیند پر ہمت سنگھ کے چھکے نے دہلی کو ۶؍وکٹ سے یادگار فتح دلائی۔

 

 

سید مشتاق علی ٹرافی کے ایلیٹ گروپ ’سی‘ میں پنجاب اور ہریانہ کے دلچسپ مقابلے میں جمعہ کے روز ہریانہ نے سپر اوور میں پنجاب کو شکست دی۔ مقررہ اووروں میں دونوں ٹیموں کا اسکور ۲۰۷۔ ۲۰۷؍برابر رہنے کے بعد ہونے والے سپر اوور میں انشل کمبوج نے پہلی ہی گیند پر ابھشیک شرما اور سنویر سنگھ کو صفر پر آؤٹ کر دیا۔ اس کے بعد ہریانہ کو جیت کے لئے صرف ۲؍ رنوں کی ضرورت تھی۔ نشانت سندھُو نے چوکا لگا کر ہریانہ کو جیت دلائی۔

اس سے قبل کپتان انکت کمار (۲۶؍ گیندوں پر ۵۱) اور نشانت سندھُو (۳۱؍ گیندوں پر ۶۱) نے ہریانہ کیلئے۹؍ وکٹ پر ۲۰۷؍ رنوں کا چیلنجنگ اسکور بنایا۔ سمت کمار نے ۱۴؍ گیندوں میں ۲۸؍ رنوں کا تعاون دیا۔ یشوردھن دلال ۲۷؍ اور سامنت جاکھڑ ۱۹؍ رن بنا کر آؤٹ ہوئے۔

پنجاب کی جانب سے اشوِنی کمار نے ۴؍ اوور میں ۳۱؍رن دے کر ۳؍ وکٹیں حاصل کیں۔ جواب میں پنجاب نے ابھشیک شرما کو صرف ۶؍ رن پر جلد ہی کھو دیا اور پربھسمرن سنگھ ۲۰؍رن پر آؤٹ ہوئے، دونوں کو انشل کمبوج نے آؤٹ کیا۔ لیکن انمول پریت سنگھ کی۳۷؍ گیندوں پر ۸۱؍ رن کی تیز اننگز اور سنویر سنگھ کی ۱۶؍ گیندوں پر۳۰؍ رنوں کی اننگز نے یقینی بنایا کہ پنجاب نے مقررہ ۲۰؍  اوورز میں ۷؍ وکٹوں پر ۲۰۷؍ رن بنا کر اسکور کو برابر کر دیا۔

کولکاتا میں کھیلے گئے حیدرآباد بمقابلہ مہاراشٹر کے میچ میں اَرشن کلکرنی کی ۵۴؍گیندوں پر ناٹ آؤٹ ۸۹؍ رن اور پرتھوی شا کی ۳۶؍ گیندوں پر۶۶؍ رنوں کی زبردست اننگز کے دم پر مہاراشٹر نے حیدر آباد کو۸؍ گیند رہتے ہی ۸؍ وکٹوں سے شکست دے دی۔حیدرآباد نے پہلے بلے بازی کرتے ہوئے مقررہ اوور میں۸؍ وکٹ پر ۱۹۱؍رن بنائے تھے۔