پاکستان نے جنوبی افریقہ کو آخری اور فیصلہ کن ٹی ۲۰؍ انٹرنیشنل کرکٹ میچ میں ۴؍وکٹوں سے شکست دے کر تین میچوں کی سیریز ۱۔۲؍ سے جیت لی، پاکستان نے۱۴۰؍ رنز کا ہدف ۱۹؍ اوورز میں ۶؍ وکٹوں کے نقصان پر حاصل کیا۔

پاکستان نے جنوبی افریقہ کو آخری اور فیصلہ کن ٹی ۲۰؍ انٹرنیشنل کرکٹ میچ میں ۴؍وکٹوں سے شکست دے کر تین میچوں کی سیریز ۱۔۲؍ سے جیت لی، پاکستان نے۱۴۰؍ رنز کا ہدف ۱۹؍ اوورز میں ۶؍ وکٹوں کے نقصان پر حاصل کیا، بابراعظم نے۶۸؍رنز کی شاندار اننگز کھیل کر ٹیم کو فتح دلوائی، بابراعظم میچ اور فہیم اشرف سیریز کے بہترین کھلاڑی قرار پائے۔ 

Babar Azam dethrones Rohit Sharma atop the Men’s T20I run-scoring charts 🌟

Read More 👉 https://t.co/g13x1O3xlB pic.twitter.com/ZjxMkRn7hW

— ICC (@ICC) November 1, 2025

لاہور کے قذافی اسٹیڈیم میں کھیلے جانے والے  آخری ٹی ۲۰؍میچ میں پاکستانی قائد سلمان علی آغا نے ٹاس جیت کر پہلے بو لنگ کا فیصلہ کیا جو درست ثابت ہوا، جنوبی افریقن ٹیم پہلے بیٹنگ کرتے ہوئے مقررہ اوورز میں ۱۳۹؍ رنز بنا کر آئوٹ ہو گئی، مہمان ٹیم کی اننگز کا آغاز انتہائی مایوس کن رہا اور پہلے ہی اوور میں شاہین شاہ آفریدی نے مسلسل دو گیندوں پر ڈی کوک اور پریٹوریس کو آئوٹ کر کے حریف ٹیم کی مضبوط بیٹنگ لائن اپ کی کمر توڑ دی جس کے بعد کوئی بھی کھلاڑی بڑی اننگز نہ کھیل سکا۔ڈی کوک اور پریٹوریس بغیر کوئی رن بنائے چلتے بنے۔ ہینڈرکس ۳۴، بریوز ۲۱،کپتان ڈونووان فریرا ۲۹؍رن ، اینڈائل ۱۳ ،لیزاد ولیمز ۵، میتھیو برٹزکے ایک ، جارج لینڈ صفر پر آئوٹ ہوئے، کاربن بوچ ۳۰؍ رنز بنا کر ناٹ آئوٹ رہے، شاہین آفریدی نے ۳، عثمان طارق اور فہیم اشرف نے ۲۔۲؍ جبکہ سلمان مرزا اور محمدنواز نے ایک، ایک وکٹ لیا۔ 
جواب میں پاکستانی ٹیم نے مطلوبہ ہدف ۱۹؍ اوورز میں ۶؍ وکٹوں کے نقصان پر پورا کیا، اوپنر صائم ایوب دوسرے ہی اوور میں بغیر کوئی رن بنائے پویلین لوٹ گئے، اس کے بعد بابراعظم اور صاحبزادہ فرحان نے ٹیم کا اسکور۴۴؍رن  تک پہنچا دیا، یہاں پر فرحان ۱۹؍رنز بنا کر فریرا کی گیند کا نشانہ بنے، اس موقع پر بابراعظم نے کپتان سلمان علی آغا کے ساتھ مل کر ۷۶؍ قیمتی رنز جوڑ کر ٹیم کو فتح کے قریب پہنچا دیا، سلمان ۳۳؍ رنز بنا کر ولیمز کی گیند کا شکار بنے، ۱۲۵؍رن  کے مجموعی اسکور پر پاکستان کو چوتھا نقصان اٹھانا پڑا جب بابراعظم ۶۸؍ رنز کی عمدہ اننگز کھیلنے کے بعد بوچ کی گیند پر کیچ آئوٹ ہو گئے، حسن نواز ۵؍ اور محمد نواز صفر پر چلتے بنے، عثمان خان ۶؍ اور فہیم اشرف ۴؍ رنز بنا کر ناٹ آئوٹ رہے۔  کاربن بوچ اور ولیمز نے دو، دو فریرا اور اینڈائل نے ایک، ایک وکٹ لی۔ 

یہ بھی پڑھئے:انڈیا اے نے جنوبی افریقہ اے کو ۳؍ وکٹ سے شکست دے دی

پاکستان اور ساؤتھ افریقہ کی  ون ڈے سیریز کی تیاری
پاکستان ساؤتھ افریقہ ون ڈے سیریز،پاکستان اور ساؤتھ افریقہ کی ٹیمیں فیصل آباد پہنچ گئیں،کل پریکٹس کریں گی۔پی سی بی حکام نے بتایا کہ پاکستان ساؤتھ افریقہ ون ڈے سیریز کھیلنے کیلئے پاکستان اور ساؤتھ افریقہ کی ٹیمیں فیصل آباد پہنچ گئیں۔پی سی بی حکام نے بتایا کہ ساؤتھ افریقہ کی کرکٹ ٹیم کل بروز پیر سہ پہر ۲؍ بجے سے ۵؍ بجے تک قذافی اسٹیڈیم میں پریکٹس کرے گی۔ پاکستان کرکٹ ٹیم کل شام۶؍ بجے پریکٹس کرے گی۔ دونوں ٹیموں کے مابین پہلا ایک روزہ انٹرنیشنل میچ ۴؍نومبر بروز منگل کھیلا جائے گا۔ میچ ڈے اینڈ نائٹ مصنوعی روشنیوں میں کھیلا جائے گا۔