ہندوستانی کرکٹ ٹیم کے سابق کپتان روہت شرما نے اپنے کیریئر میں بطور بلے باز اور کپتان کئی کامیابیاں حاصل کی ہیں، لیکن ۲۰۲۳ء میں ون ڈے ورلڈ کپ نہ جیت پانے کا افسوس اب بھی ان کے دل میں زندہ ہے۔

ہندوستانی کرکٹ ٹیم کے سابق کپتان روہت شرما نے اپنے کیریئر میں بطور بلے باز اور کپتان کئی کامیابیاں حاصل کی ہیں، لیکن ۲۰۲۳ء میں ون ڈے ورلڈ کپ نہ جیت پانے کا افسوس اب بھی ان کے دل میں زندہ ہے۔ روہت اپنے اس ادھورے خواب کو ۲۰۲۷ء میں پورا کرنا چاہتے ہیں اور اس کے لیے وہ سخت محنت کر رہے ہیں۔
 ۳۰؍اپریل ۱۹۸۷ء کو ناگپور کے ایک عام گھرانے میں پیدا ہونے والے روہت شرما اس وقت ہندوستان کرکٹ کے سب سے مقبول اور بڑے ناموں میں سے ایک ہیں۔ ۳۹؍ سال کے ہونے والے روہت کے دل میں ملک کے لیے کھیلنے اور ٹائٹل جیتنے کی خواہش کم نہیں ہوئی۔ اپنی کپتانی میں ہندوستان کو ٹی۲۰؍ ورلڈ کپ ۲۰۲۴ء اور چیمپئن ٹرافی کا فاتح بنانے والے روہت کا آخری خواب یہ ہے کہ وہ جنوبی افریقہ میں ہونے والے ون ڈے ورلڈ کپ ۲۰۲۷ء میں ہندوستان کو چیمپئن بنائیں۔
درحقیقت روہت کئی بار اپنے انٹرویوز میں کہہ چکے ہیں کہ جب انہوں نے کرکٹ کھیلنا شروع کیا تھا تو اس وقت صرف ون ڈے ورلڈ کپ ہوتا تھا۔ انہوں نے اپنے کیریئر کے آغاز میں ہی ملک کے لیے ون ڈے ورلڈ کپ جیتنے کا خواب دیکھا تھا، جو ابھی تک پورا نہیں ہوا۔ اسی لیے اب ان کی نظر ون ڈے ورلڈ کپ ۲۰۲۷ء پر ہے۔
ہندوستان ٹیم نے ۲۰۱۱ء کا ون ڈے ورلڈ کپ جیتا تھا، لیکن ایم ایس دھونی کی قیادت میں روہت اس ٹیم کا حصہ نہیں تھے، جبکہ وہ ۲۰۰۷ء کی ٹی۲۰؍ ورلڈ کپ جیتنے والی ہندوستانی ٹیم کا حصہ تھے۔ اس ٹیم میں شامل نہ ہونے کا افسوس روہت کو ہمیشہ رہا۔ بعد میں وہ۲۰۱۵ء اور ۲۰۱۹ءکے ورلڈ کپ میں ٹیم کا حصہ رہے، لیکن ٹیم کی کارکردگی توقعات کے مطابق نہیں رہی۔ ۲۰۱۹ء ورلڈ کپ میں روہت نے ۵؍ سنچریوں سمیت ۶۴۸؍ رنز بنا کر سب سے زیادہ رنز بنانے والے کھلاڑی کا اعزاز حاصل کیا، لیکن ٹیم سیمی فائنل سے آگے نہ جا سکی۔
۲۰۲۳ء میں روہت کو بطور کپتان ہندوستان کو چیمپئن بنانے کا موقع ملا۔ انہوں نے بطور کپتان اور اوپننگ بلے باز شاندار کارکردگی دکھائی۔ وہ ۱۱؍ میچوں میں ۵۹۷؍ رنز بنا کر دوسرے سب سے زیادہ رنز بنانے والے کھلاڑی رہے۔ پورے ٹورنامنٹ میں ہندوستانی ٹیم ناقابل شکست رہی، لیکن فائنل میں آسٹریلیا نے ہندوستان کا ورلڈ کپ جیتنے کا خواب توڑ دیا۔ اس شکست سے نکلنے میں روہت کو کافی وقت لگا۔

یہ بھی پڑھئے:فلم ’’پیڈی‘‘ میں ڈانس نمبر کے لیے شروتی ہاسن کو خطیر رقم ملی

روہت ٹیسٹ اور ٹی۲۰؍ سے ریٹائرڈ ہو چکے ہیں اور اب ون ڈے ٹیم کے کپتان بھی نہیں ہیں، لیکن بطور کھلاڑی وہ۲۰۲۷ء میں ایک آخری بارہندوستان کو ورلڈ کپ جتانے کی کوشش کرنا چاہتے ہیں۔ اس کے لیے وہ اپنے فارم اور فٹنس پر سخت محنت کر رہے ہیں۔ جو روہت پہلے اپنی فٹنس پر تنقید کا نشانہ بنتے تھے، وہ اب ۳۹؍ سال کی عمر میں ۲۹؍ سال جیسی فٹنس کے ساتھ سب کو حیران کر رہے ہیں۔

یہ بھی پڑھئے:فیفا اور اے ایف سی نے افغان خواتین کو بین الاقوامی میچوں میں شرکت کی اجازت دی

روہت کو امید ہے کہ وہ اپنے اس خواب کو پورا کر سکیں گے اور ملک کے لیے ایک بڑی کامیابی حاصل کریں گے۔ دیکھنا یہ ہے کہ ۲۰۲۷ء میں ان کا یہ خواب حقیقت بن پاتا ہے یا نہیں۔ روہت شرما اس وقت ون ڈے فارمیٹ کے دنیا کے بہترین اوپننگ بلے بازوں میں شمار ہوتے ہیں۔ ’’ہٹ مین‘‘ کے نام سے مشہور دائیں ہاتھ کے بیٹر روہت ۲۸۲؍ ون ڈے میچوں کی ۲۷۴؍ اننگز میں ۳۳؍ سنچریاں اور ۶۱؍نصف سنچریاں اسکور کرتے ہوئے۱۱۵۷۷؍ رنز بنا چکے ہیں۔