سنجو سیمسن کی شاندار اننگز پر تعریفوں کے ڈھیر لگنا فطری تھا اور بجا بھی، مگر ٹی ۲۰؍ ورلڈ کپ کے سیمی فائنل میں وانکھیڈے اسٹیڈیم پر ہونے والے سنسنی خیز مقابلے کی گرد بیٹھنے کے بعد یہ واضح ہو گیا کہ فائنل تک ہندوستان کی رسائی صرف ایک کھلاڑی کی کارکردگی کا نتیجہ نہیں تھی۔

سنجو سیمسن کی شاندار اننگز پر تعریفوں کے ڈھیر لگنا فطری تھا اور بجا بھی، مگر ٹی ۲۰؍ ورلڈ کپ کے سیمی فائنل میں وانکھیڈے اسٹیڈیم پر ہونے والے سنسنی خیز مقابلے کی گرد بیٹھنے کے بعد یہ واضح ہو گیا کہ فائنل تک ہندوستان کی رسائی صرف ایک کھلاڑی کی کارکردگی کا نتیجہ نہیں تھی۔سرخیوں سے ہٹ کر جسپریت بمراہ، اکشر پٹیل، شیوم دوبے اور ہاردک پانڈیا نے بھی ایسے لمحات پیدا کیے جنہوں نے اس اتار چڑھاؤ سے بھرپور مقابلے کا رخ متعین کیا۔
سیمسن کی اننگز میں قسمت کا عنصر بھی شامل تھا، جو اکثر بڑی اننگز کے ساتھ ہوتا ہے۔ ان کی اننگز کے آغاز میں ہیری بروک باؤنڈری کے قریب ایک کیچ تھامنے میں ناکام رہے، جس پر بعد میں انگلینڈ کو افسوس ہوا۔ یہ موقع ملنے کے بعد کیرالا کے بلے باز نے بھرپور فائدہ اٹھایا اور اعتماد کے ساتھ کھیلتے ہوئے۸۹؍ رنز کی شاندار اننگز اسکور بنایا۔ یہ ٹورنامنٹ میں ان کی مسلسل دوسری نصف سنچری تھی جو بڑے اسٹیج پر آئی اور جس نے ہندوستان کے مضبوط اسکور کی بنیاد رکھی۔
تاہم جب سیمسن مرکزِ نگاہ بنے ہوئے تھے، اس دوران دوسرے کھلاڑی بھی خاموشی سے میچ کا رخ بدلنے والے لمحات پیدا کر رہے تھے۔ جسپریت بمراہ نے ایک بار پھر ثابت کیا کہ دباؤ کے لمحات میں وہ دنیا کے بہترین گیندبازوں میں کیوں شمار ہوتے ہیں۔ انگلینڈ کی اننگز کے آغاز میں انہوں نے ہیری بروک کو ایک نہایت چالاک سست گیند پر الجھا دیا جس پر بلے باز نے مشکل شاٹ کھیلا۔
گیند فضا میں بلند ہوئی اور اکشرپٹیل نے کور کے علاقے سے دوڑ کر شاندار کیچ لے کر ہندوستان کی واپسی کی بنیاد رکھی۔ بمراہ کے اسپیل میں رفتار کی باریک تبدیلیاں، درست لینتھ اور بلے بازوں کو مشکل فیصلے کرنے پر مجبور کرنے کی صلاحیت نمایاں رہی۔ اکشر پٹیل نے بھی کئی حوالوں سے میچ پر اثر ڈالا۔ بہترین کیچ کے بعد انہوں نے گیند بازی میں بھی اثر دکھایا اور ٹام بینٹن کو ایک چالاک سست گیند پر بولڈ کر دیا۔ بینٹن نے بڑا شاٹ کھیلنے کی کوشش کی مگر گیند کی رفتار اور موومنٹ سے دھوکہ کھا گئے۔
اکشر کا سب سے حیران کن لمحہ فیلڈنگ میں آیا جب ول جیکس کی کٹی ہوئی گیند ڈیپ پوائنٹ کی جانب گئی۔ اکشر باؤنڈری لائن تک دوڑے، توازن کھوتے ہوئے گیند کو میدان میں واپس اچھالا اور خود رسی سے ٹکرانے سے پہلے اسے اندر پھینک دیا۔ وہاں موجود شیوم دوبے نے آسانی سے کیچ مکمل کیا۔
دوبے کی اہمیت صرف یہیں تک محدود نہیں رہی۔ میچ کے آخری اوور میں انہیں گیند دی گئی۔ جوفرا آرچر نے تین بلند چھکے لگا کر انگلینڈ کی امیدیں جگا دیں، لیکن اس سے پہلے جیکب بیتھل کے رن آؤٹ نے انگلینڈ کی امیدوں کو تقریباً ختم کر دیا تھا۔ اس مرحلے میں ہاردک پانڈیا کا کردار بھی نمایاں رہا۔ انہوں نے  ۱۹؍ویں اوور میں سیم کرن کو آؤٹ کیا جب کہ مڈ وکٹ باؤنڈری کے قریب تلک ورما نے کیچ لیا۔ اس کے فوراً بعد ہاردک نے لانگ آف سے تیز تھرو کر کے بیتھل کو رن آؤٹ کرایا جسے سنجو سیمسن نے وکٹ کیپر کے طور پر مکمل کیا۔
بیٹنگ میں بھی ہاردک اور دوبے نے اہم کردار ادا کیا۔ شیوم دوبے نے مڈل اوورز میں ۲۵؍ گیندوں پر ۴۳؍ رنز کی جارحانہ اننگز اسکور بنایا اور اسپنرز خصوصاً عادل رشید کے خلاف بلند چھکے لگائے۔ بعد میں ہاردک کے ساتھ غلط فہمی کے باعث وہ رن آؤٹ ہوگئے۔ اس کے بعد ہاردک پانڈیا نے آخری اوورز میں تیز رفتار کیمیو کھیلا۔ انہوں نے جیمی اوورٹن کی رفتار کا فائدہ اٹھاتے ہوئے باؤنڈریز لگائیں اور ہندوستان کا مجموعہ  ۲۰۰؍سے آگے پہنچا دیا۔ آخر میں ول جیکس کے اوور میں دو زبردست چھکے لگا کر ٹیم کو  ۲۵۰؍رن  تک پہنچانے میں مدد دی، اگرچہ بعد میں جوس بٹلر نے انہیں رن آؤٹ کر دیا۔

یہ بھی پڑھئے:اداکارہ شمی نے ہیروئن سے دادی نانی تک کے کردار ادا کئے

میدان کے باہر بھی وانکھیڈے اسٹیڈیم کا ماحول کسی ڈرامے سے کم نہیں تھا۔ صنعت کار مکیش امبانی اپنے بیٹے آکاش امبانی کے ساتھ موجود تھے اور ہندوستان کی کارکردگی پر تالیاں بجاتے دکھائی دیے۔ ایک دلچسپ لمحے میں جسپریت بمراہ کی گیند سیم کرن کے بلے کو چھوتے ہوئے واپس بمراہ کی طرف گئی۔ اسٹینڈ میں موجود ساکشی دھونی نے اسے کیچ سمجھ کر خوشی منائی، مگر ان کے پیچھے کھڑے مہندر سنگھ دھونی نے اشارہ کر کے بتایا کہ گیند زمین کو لگ چکی ہے۔

یہ بھی پڑھئے:میسی کی موجودگی میں ٹرمپ نے رونالڈو کی تعریف کی

ادھر اداکار انیل کپور اور ورون دھون کو ہندوستان کی جیت پر خوشی سے اچھلتے دیکھا گیا، جب کہ ایک اور منظر میں عالیہ بھٹ اور رنبیر کپور اپنے ننھے بچے کے ساتھ میچ کے آخری لمحات دیکھتے ہوئے نظر آئے۔ آخرکار اگرچہ سرخیوں میں سنجو سیمسن کی اننگز رہی، لیکن اس سیمی فائنل کی اصل کہانی کئی پرتوں پر مشتمل تھی - جسپریت بمراہ کی گیندبازی، اکسر پٹیل کی شاندار فیلڈنگ، شیوم دوبے کی جارحانہ بیٹنگ اور ہاردک پانڈیا کا دھماکہ خیز اختتام۔ مسلسل بدلتے ہوئے میچ کے بہاؤ میں یہی وہ لمحات تھے جنہوں نے خاموشی سے ہندوستان کو فائنل تک پہنچا دیا۔