ورلڈ کپ جیتنے والے لامین یمال نے کہا کہ میسی نے مجھے گلے لگاکر کہا کہ مستقبل تمہاری نسل کا ہے،اسی طرح آگے بڑھو۔

اسپین کے ۱۸؍ سالہ اسٹار فٹبال کھلاڑی لامین یمال نے فیفا ورلڈ کپ کے فائنل میں ارجنٹائناکے خلاف تاریخی فتح کے بعد فٹ بال کی دنیا کے عظیم کھلاڑی لیونل میسی کے ساتھ ہونے والی جذباتی اور ناقابلِ فراموش گفتگو کا احوال بیان کر دیا۔عالمی چمپئن بننے کے بعد میڈیا سے گفتگو کرتے ہوئے لامین یمال نے انکشاف کیا کہ فائنل کی آخری سیٹی بجتے ہی، جہاں ایک طرف ان کے ساتھی کھلاڑی فتح کا جشن منا رہے تھے، وہیں وہ سب سے پہلے اپنے بچپن کے ہیرو لیونل میسی کو خراجِ تحسین پیش کرنے گئے۔

یہ بھی پڑھئے: فیفا کی بہترین ۱۱؍ کھلاڑیوں کی ٹیم میں ووزنہا منتخب

نوجوان اسٹار نے اپنے جذبات کا اظہار کرتے ہوئے کہا’’سچ کہوں تو یہ بالکل دیوانگی ہے۔ اگر آپ چند سال پہلے مجھ سے کہتے کہ میں ۱۸؍ سال کی عمر میں فائنل میں لیونل میسی کے خلاف کھیل کر ورلڈ کپ اٹھاؤں گا، تو میں آپ کو پاگل سمجھتا۔ اِس وقت میں اپنے آنسو روکنے کی کوشش کر رہا ہوں کیونکہ یہ وہ لمحہ ہے جس کے میں نے بچپن سے خواب دیکھے ہیں۔‘‘انہوں نے مزید کہا کہ یہ تاریخی فتح ان کے خاندان، ان کے آبائی علاقے روکا فونڈا اور اسپین کے ان تمام مداحوں کے نام ہے جنہوں نے مشکل وقت میں ٹیم کا ساتھ دیا۔

فائنل کی سیٹی بجتے ہی، یمال سیدھے میسی کی طرف بڑھے اور اس شخص کا شکریہ ادا کرنے کیلئے پُرعزم تھے جس نے بچپن سے انہیں متاثر کیا۔ فٹ بال کی تاریخ کے عظیم ترین کھلاڑی کا سامنا کرنے کے تجربے کو سحر انگیز قرار دیتے ہوئے یمال نے بتایا کہ شکست کے باوجود لیونل میسی نے جس عاجزی کا مظاہرہ کیا وہ ان کے دل میں گھر کر گیا۔یمال کے مطابق’’جب فائنل ختم ہوا تو میں سیدھا میسی کے پاس گیا۔ انہوں نے نہایت عاجزی سے مجھ سے ہاتھ ملایا اور گلے لگاکر کہا’’یوں ہی آگے بڑھتے رہو، مستقبل تمہاری نسل کا ہے۔‘‘یہ الفاظ سونے کے تمغے کی طرح خاص ہیں۔اسپین کے نوجوان ہیرو نے اختتام پر کہا کہ اپنے آئیڈیل کے منہ سے یہ الفاظ سننا ان کے لئے ورلڈ کپ کے گولڈ میڈل کی طرح ہی خاص ہے اور وہ ان الفاظ کو اپنے پورے کریئر میں یاد رکھیں گے۔

یہ بھی پڑھئے: فیفا ورلڈ کپ فائنل نے امریکہ میں ناظرین کی تعداد کا نیا ریکارڈ قائم کر دیا

کھیل کے ماہرین کے مطابق فائنل کے بعد دونوں ستاروں کے درمیان اس مصافحے اور گفتگو نے عالمی کپ کے اس تاریخی معرکے کو ہمیشہ کے لئے یادگار بنا دیا ہے، جہاں فٹ بال کے ایک عظیم دور کی مشعل نئے ابھرتے ہوئے سُپر اسٹار کے ہاتھ میں منتقل ہوتی دکھائی دی۔