۲؍ بار کی اولمپک میڈل فاتح پی وی سندھو پیر سے یہاں شروع ہونے والی بی ڈبلیو ایف ورلڈ بیڈمنٹن چمپئن شپ میں گھریلو شائقین کے سامنے نئے اعتماد کے ساتھ تاریخ رقم کرنے کی کوشش کریں گی۔

۲؍ بار کی اولمپک میڈل فاتح پی وی سندھو پیر سے یہاں شروع ہونے والی بی ڈبلیو ایف ورلڈ بیڈمنٹن چمپئن شپ میں گھریلو شائقین کے سامنے نئے اعتماد کے ساتھ تاریخ رقم کرنے کی کوشش کریں گی۔ ہندوستان ۱۷؍ سال بعد اس چمپئن  شپ کی میزبانی کر رہا ہے اور سندھو سمیت تمام ہندوستانی کھلاڑی اس کا بھرپور فائدہ اٹھانے کی کوشش کریں گے۔

یہ بھی پڑھئے: دوسرے ٹیسٹ کے لیے ٹیم میں تبدیلیاں کرنا ہوں گی: کمنز

۹؍ویں نمبر کی سیڈڈ سندھو کو اچھا ڈرا ملا ہے۔ وہ آئرلینڈ کی ۱۴۱؍ ویں رینکنگ کی حامل سوفیا نوبل کے خلاف اپنے مہم کا آغاز کریں گی۔پری کوارٹر فائنل میں سندھو کا مقابلہ چین کی تیسری سیڈڈ وانگ ژی یی سے اور کوارٹر فائنل میں انڈونیشیا کی پتری کوسوما وردانی سے ہو سکتا ہے جبکہ ٹاپ سیڈڈ اور اولمپک چمپئن آن  سیناگ  فائنل کے درمیان ممکنہ رکاوٹ بن سکتی ہیں۔ ہندوستان کے ویمنز سنگلز میں انّتی ہڈا بھی شامل ہیں جو پہلی بار ورلڈ چمپئن شپ میں حصہ لے رہی ہیں۔ ان کا پہلا میچ میانمار کی تھیت ہجار تھجارسے ہوگا۔ مردوں کے ڈبلیوز میں ساتوک سائراج رنکی ریڈی اور چراغ شیٹی کی پانچویں سیڈڈ جوڑی کا ہدف ایک بار پھر پوڈیم پر پہنچنا ہوگا۔ یہ جوڑی اس سے پہلے بھی ورلڈ چمپئن شپ میں ۲؍ بار برونز میڈل جیت چکی ہے۔ انہوں نے ۲۰۲۲ء اور ۲۰۲۵ء میں تیسری پوزیشن حاصل کی تھی۔انہیں پہلے راؤنڈ میں بائی ملی ہے اور وہ دوسرے راؤنڈ سے اپنی مہم کا آغاز کریں گے۔ لیکن سب سے بڑی تشویش ساتوک کے کندھے کا بار بار زخمی ہونا ہے، جس کی وجہ سے وہ کچھ ٹورنامنٹ سے باہر بھی رہے ہیں۔ایم آر ارجن اور ہریہرن اماساکرونن کی دوسری ہندوستانی مینز ڈبلیوز جوڑی بھی اپنی دھاک بٹھانے کی کوشش کرے گی۔ وہ آئرلینڈ کے اسکاٹ گلڈیا اور پال رینالڈز کے خلاف اپنے سفر کا آغاز کریں گے۔

یہ بھی پڑھئے: ہاکی:ہندوستان اور انگلینڈ کے درمیان سخت مقابلہ ہوگا

مینز سنگلز زمرے میں آیوش شیٹی کے کھیل پر بھی خاص نظر ہوگی۔ ۲۱؍ سالہ آیوش کا پہلا مقابلہ موجودہ چمپئن اور دنیا کے نمبر ایک کھلاڑی شی یو چی سے ہوگا۔ آیوش کو اس چینی کھلاڑی کے خلاف اپنے پچھلے تینوں مقابلوں میں شکست کا سامنا کرنا پڑا ہے۔۱۴؍ ویں سیڈڈ لکشیا سین آسٹریلیا کے کولنز ویلنٹائن فلیمون کے خلاف اپنے مقابلے کا آغاز کریں گے۔ انہوں نے ۲۰۲۱ء میں ورلڈ چمپئن شپ میں برونز میڈل جیتا تھا اور وہ اس کارکردگی کو دہرانے کے لئے پُرعزم ہیں۔ویمنز ڈبلیوز میں تریسا جالی اور گایتری گوپی چند اسپین کی پاؤلا لوپیز اور لوسیا روڈریگیز کے خلاف اپنا پہلا میچ کھیلیں گی۔ورلڈ چمپئن شپ میں پہلی بار حصہ لینے والی سمرن سنگھی اور کویپریہ سیلووم کی ویمنز ڈبلیوز جوڑی پہلے راؤنڈ میں اسپین کی نکول کارولا اور کارمین ماریہ جمینج کا مقابلہ کرے گی۔

یہ بھی پڑھئے:رحمت کی سنچری کی بدولت افغانستان کی شاندار فتح، سیریز پر بھی قبضہ