بالی ووڈ کے معروف ہدایت کار راجکمار ہیرانی نے تصدیق کی ہے کہ ان کی بلاک بسٹر فلم ’’تھری ایڈیٹس‘‘ کے سیکوئل پر کام جاری ہے۔ تاہم یہ فلم اصل کہانی کے کالج کے دنوں میں واپس نہیں جائے گی بلکہ تقریباً ۱۵؍ سے ۲۰؍ سال بعد رینچو، فرحان اور راجو کی زندگیوں کو پیش کرے گی۔ ہیرانی کے مطابق تینوں کردار اب شادی شدہ، بچوں کے والد اور درمیانی عمر کے چیلنجز سے دوچار ہوں گے۔

ہندوستانی سنیما کی سب سے مقبول اور کامیاب فلموں میں شمار ہونے والی ’’تھری ایڈیٹس‘‘کے مداحوں کے لیے خوشخبری ہے۔ فلم کے ہدایت کار راجکمار ہیرانی نے انکشاف کیا ہے کہ فلم کے سیکوئل پر باقاعدہ کام جاری ہے اور کہانی کی تیاری ابھی تحریری مرحلے میں ہے۔ حال ہی میں ایک انٹرویو کے دوران ہیرانی نے بتایا کہ نئی فلم اصل فلم کے کالج کے ماحول کو دہرانے کے بجائے مرکزی کرداروں کی زندگیوں کے ایک نئے باب کو دریافت کرے گی۔ ان کے مطابق کہانی تقریباً ۱۵؍ سے ۲۰؍ سال بعد کے دور میں ترتیب دی جا رہی ہے، جہاں عامر خان (رینچو)، آر مادھون (فرحان) اور شرمن جوشی (راجو) اپنی زندگی کے بالکل مختلف مرحلے میں نظر آئیں گے۔

یہ بھی پڑھئے: راجکمار ہیرانی نے ’’پی کے ‘‘ایلین کو مرکزی کردار میں کیوں منتخب کیا ؟

راجکمار ہیرانی نے واضح کیا کہ یہ فلم کسی تعلیمی ادارے یا کالج کی زندگی کے گرد نہیں گھومے گی۔ ان کے مطابق تینوں کردار اب بالغ، شادی شدہ اور بچوں کے والد ہیں، جو درمیانی عمر کے بحران، خاندانی ذمہ داریوں اور زندگی کی نئی الجھنوں کا سامنا کر رہے ہوں گے۔ہدایت کار نے کہا کہ کہانی کا بنیادی سوال یہی ہے کہ دو دہائیاں گزرنے کے بعد ان کرداروں کی زندگی کہاں پہنچی اور وہ اب کن مسائل سے نبرد آزما ہیں۔ ان کے مطابق اسکرپٹ پر ابھی کافی کام باقی ہے اور فلم ابھی ابتدائی ترقیاتی مرحلے میں ہے۔
۲۰۰۹ء میں ریلیز ہونے والی ’’تھری ایڈیٹس‘‘نے نہ صرف باکس آفس پر ریکارڈ کامیابی حاصل کی تھی بلکہ تعلیمی نظام، والدین کی توقعات اور نوجوانوں کے خوابوں سے متعلق سماجی مباحث کو بھی جنم دیا تھا۔ فلم کا مشہور جملہ ’’آل اِز ویل‘‘ آج بھی عوامی ثقافت کا حصہ سمجھا جاتا ہے۔ ہیرانی نے اس بات کا بھی عندیہ دیا کہ سیکوئل صرف تفریح تک محدود نہیں ہوگا بلکہ اس میں ایک مضبوط سماجی پیغام بھی شامل ہوگا۔ جب ان سے پوچھا گیا کہ کیا نئی فلم بھی اصل فلم کی طرح کسی اہم سماجی مسئلے کو اجاگر کرے گی تو انہوں نے جواب دیا کہ اس بار بھی ایک بڑا موضوع مرکزی حیثیت رکھے گا۔

یہ بھی پڑھئے: سلمان خان ، فرحان اختر کے ساتھ تاریخی منظر پر مبنی فلم ۲؍حصوں میں بنانا چاہتے ہیں

فلم سے وابستہ ذرائع کے مطابق سیکوئل میں اصل مرکزی کاسٹ کی واپسی متوقع ہے۔ اس حوالے سے عامر خان پہلے ہی اس منصوبے کی موجودگی کی تصدیق کر چکے ہیں۔ توقع کی جا رہی ہے کہ رینچو، فرحان اور راجو کے کرداروں کو نئی زندگی کے تجربات کے ساتھ دوبارہ پیش کیا جائے گا۔ اس دوران فلم میں ممکنہ نئے کرداروں کے حوالے سے بھی قیاس آرائیاں جاری ہیں۔ کئی رپورٹس میں دعویٰ کیا گیا ہے کہ وکی کوشل فلم میں ایک اہم کردار ادا کر سکتے ہیں۔ بعض غیر مصدقہ اطلاعات میں انہیں ’’چوتھا ایڈیٹ‘‘ قرار دیا جا رہا ہے، تاہم فلم سازوں یا اداکار کی جانب سے ابھی تک اس حوالے سے کوئی باضابطہ اعلان نہیں کیا گیا۔