ہالی ووڈ کی مقبول فلم فرنچائز ’’فاسٹ اینڈ فیوریس‘‘ کے آخری حصے میں مرحوم اداکار پال واکر کے کردار برائن او کونر کی ممکنہ واپسی ایک بار پھر زیرِ بحث آگئی۔ پال واکر کے بھائی کوڈی واکر، جنہوں نے ’’فیوریس ۷‘‘ کی شوٹنگ کے دوران اپنے بھائی کی موت کے بعد کچھ مناظر مکمل کرنے میں مدد کی تھی، نے واضح کیا ہے کہ وہ دوبارہ فزیکل اسٹینڈ اِن کے طور پر کام نہیں کرنا چاہتے۔ ان کے مطابق اگر پال واکر کے کردار کو واپس لانے کا فیصلہ کیا جاتا ہے تو جدید مصنوعی ذہانت اور پہلے سے موجود فوٹیج کی مدد سے یہ کام کیا جا سکتا ہے، تاہم حتمی فیصلہ پال واکر کی بیٹی میڈو کا ہونا چاہیے۔

پال واکر کے بھائی نے آخری ’’فاسٹ اینڈ فیوریس‘‘ فلم میں اپنے مرحوم بھائی کے کردار کے لیے بطور فزیکل اسٹینڈ اِن دوبارہ کام کرنے سے انکار کر دیا ہے۔ ان کا کہنا ہے کہ اس کے بجائے مصنوعی ذہانت (اے آئی) کی مدد سے اس کردار کو دوبارہ تخلیق کیا جا سکتا ہے۔ کوڈی واکر، جنہوں نے ۲۰۱۵ء کی فلم ’’فیوریس ۷‘‘ کی تکمیل میں اپنے بھائی کی موت کے بعد ان کی جگہ کچھ مناظر میں کام کیا تھا، نے کہا کہ اس معاملے میں حتمی فیصلہ پال واکر کی بیٹی میڈو کا ہونا چاہئے۔ ان کا کہنا تھا، ’’میرا مؤقف یہ ہے کہ میڈو جو کچھ دیکھنا چاہتی ہے، وہی ہونا چاہیے، کیونکہ یہ اس کے والد ہیں۔‘‘ کوڈی واکر نے انٹرٹینمنٹ ویکلی سے گفتگو کرتے ہوئے کہا، ’’میں دوبارہ ایسا کرنے میں دلچسپی نہیں رکھتا۔ مجھے اس انداز سے بہت محبت ہے جس طرح ان کے کردار کو فرنچائز سے رخصت کیا گیا۔ انہوں نے اسے مارا نہیں، نہ ہی کوئی گھسا پٹا طریقہ اختیار کیا۔ یہ بہت خوبصورت تھا، برائن اپنے بچوں کی پرورش کر رہا ہے۔‘‘ انہوں نے مزید کہا، ’’لیکن اگر وہ ایسا کرنا چاہتے ہیں اور میڈو بھی اسے دیکھنا چاہتی ہے تو انہیں میری یا کیلب کی ضرورت نہیں ہے۔ ۲۰۱۴ء میں اے آئی کوئی عام چیز نہیں تھی، اس لیے انہوں نے ایسا کیا تھا۔ ان دیگر فاسٹ فلموں کی کئی سالوں کی ایسی فوٹیج موجود ہے جو کبھی استعمال نہیں ہوئی۔ وہ اس شعبے میں بہترین ہیں اور وہ اس کا کوئی حل نکال سکتے ہیں۔‘‘

یہ بھی پڑھئے: ہانیہ عامر کا ناقدین کو جواب، ریپ سانگ جاری کیا، گانے میں راکھی ساونت کی انٹری

پال واکر نے ’’فاسٹ اینڈ فیوریس‘‘ فرنچائز میں برائن او کونر کا کردار ادا کیا تھا۔ وہ ۴۰ سال کی عمر میں ۳۰؍ نومبر ۲۰۱۳ء کو کیلیفورنیا کے شہر سانتا کلاریٹا میں ایک کار حادثے میں ہلاک ہوگئے تھے۔ اس وقت ’’فیوریس ۷‘‘ کی شوٹنگ جاری تھی۔ لاس اینجلس کاؤنٹی کے طبی معائنہ کار نے قرار دیا تھا کہ پال واکر کی موت شدید جسمانی اور حرارتی زخموں کے باعث ہوئی۔ وہ جس پورشے کیریرا جی ٹی میں سفر کر رہے تھے، وہ حادثے کا شکار ہونے کے بعد آگ کی لپیٹ میں آگئی تھی۔ ان کی موت کو حادثاتی قرار دیا گیا تھا۔ اس وقت کوڈی اور یکلب واکر کے ساتھ اداکار جان بروتھرٹن نے بھی فلم کی باقی شوٹنگ کے دوران پال واکر کے لیے اسٹینڈ اِن کے طور پر کام کیا تھا، جبکہ ویژول ایفیکٹس کے ماہرین نے فوٹیج اور ڈیجیٹل ایفیکٹس کی مدد سے پال واکر کی ظاہری شکل کو دوبارہ تخلیق کیا۔ اسی وجہ سے فلم میں پال واکر کے کردار برائن کو ختم کرنے کے بجائے اسے ون ڈیزل کے کردار ڈومینک ٹوریٹو سے الگ ہوتے ہوئے دکھایا گیا۔ برائن نے میا، جس کا کردار جورڈانا بریوسٹر نے ادا کیا، اور اپنے بچوں کے ساتھ خاندانی زندگی گزارنے کا انتخاب کیا۔

 آنے والی فلم ’’فاسٹ فورایور‘‘ سے توقع کی جا رہی ہے کہ یہ طویل عرصے سے جاری ’’فاسٹ اینڈ فیوریس‘‘ فرنچائز کا اختتام ہوگی۔ ون ڈیزل نے گزشتہ برس کہا تھا کہ وہ آخری فلم میں برائن کو دوبارہ کہانی کا حصہ بنانا چاہتے ہیں۔ انہوں نے ۲۰۲۵ء میں وینٹی فیئر سے گفتگو کرتے ہوئے کہا تھا، ’’اسٹوڈیو نے مجھ سے کہا، ’ون، کیا ہم براہِ کرم اپریل ۲۰۲۷ء میں فاسٹ اینڈ فیوریس کا اختتام کر سکتے ہیں؟‘ میں نے کہا، ’تین شرائط ہیں۔‘‘‘ ان کے مطابق پہلی شرط یہ تھی کہ فرنچائز کو دوبارہ لاس اینجلس لایا جائے، دوسری شرط کار کلچر اور اسٹریٹ ریسنگ کی جانب واپسی تھی، جبکہ تیسری شرط ڈوم اور برائن او کونر کو دوبارہ ایک ساتھ لانا تھی۔ ون ڈیزل نے کہا تھا، ’’فائنل میں آپ کو یہی دیکھنے کو ملے گا۔‘‘

یہ بھی پڑھئے: باکس آفس: اکشے اور سیف کی فلم ’حیوان‘ کا خراب آغاز، پہلے دن صرف ۳؍ کروڑ کی کمائی

مئی ۲۰۲۶ء میں کانز فلم فیسٹیول میں ’’دی فاسٹ اینڈ دی فیوریس‘‘ کی ۲۵ویں سالگرہ کی خصوصی اسکریننگ کے دوران ون ڈیزل پال واکر کو یاد کرتے ہوئے جذباتی ہوگئے۔ انہوں نے کہا، ’’میرے لیے اسے دیکھنا بہت مشکل ہے کیونکہ اس فلم میں بہت سے ایسے لمحات ہیں جنہیں آپ دیکھتے ہیں، لیکن میں انہیں مختلف انداز میں دیکھتا ہوں۔‘‘ انہوں نے مزید کہا، ’’آپ جو منظر دیکھتے ہیں، میں اس میں وہ لمحہ دیکھتا ہوں جب پابلو نے مجھے بتایا تھا کہ اس کی ایک سال کی بیٹی ہے۔‘‘ ون ڈیزل نے پال واکر کو ان کے عرفی نام ’’پابلو‘‘ سے یاد کیا۔ ’’فاسٹ اینڈ فیوریس‘‘ فرنچائز کا آغاز ۲۰۰۱ء میں فلم ’’دی فاسٹ اینڈ دی فیوریس‘‘ سے ہوا تھا، جس میں خفیہ پولیس افسر برائن او کونر کو لاس اینجلس کے اسٹریٹ ریسرز کے ایک گروپ کی تحقیقات کرتے دکھایا گیا، جس کی قیادت ڈومینک ٹوریٹو کر رہا تھا۔ اس کے بعد یہ فرنچائز ۱۱؍ فیچر فلموں تک پھیل چکی ہے، جن میں اسپن آف فلم ’’فاسٹ اینڈ فیوریس پریزینٹس: ہابز اینڈ شا‘‘ بھی شامل ہے۔ اس فرنچائز نے دنیا بھر کے باکس آفس پر مجموعی طور پر ۷؍ ارب ڈالر سے زائد کا بزنس کیا ہے۔