ہندوستانی سنیما میں آنے والی ایکشن فلم Dhurandhar: The Revenge کی ریلیز سے پہلے ہی غیر معمولی توقعات پیدا ہو گئی ہیں۔ رنویر سنگھ کی اداکاری سے سجی اس فلم کے بارے میں اندازہ لگایا جا رہا ہے کہ یہ باکس آفس پر بڑے ریکارڈ قائم کر سکتی ہے۔ اسی وجہ سے متعدد ہندوستانی اور ہالی ووڈ فلموں نے اپنی ریلیز کی تاریخیں تبدیل کر دی ہیں، جن میں Project Hail Mary اور کئی بڑی ہندوستانی فلمیں شامل ہیں۔

ہندوستانی فلمی صنعت میں اس وقت سب سے زیادہ توجہ جس فلم پر مرکوز ہے وہ ’’دھرندھر: دی ریوینج‘‘ ہے ۱۹؍ مارچ ۲۰۲۶ء کو سنیما گھروں میں ریلیز ہونے والی ہے۔ یہ فلم گزشتہ سپر ہٹ فلم ’’دھرندھر‘‘ کا سیکوئل ہے۔ پہلی فلم نے ہندوستان میں ۷۰۰؍ کروڑ روپے سے زیادہ جبکہ عالمی سطح پر ۱۲۰۰؍ کروڑ روپے سے زائد کمائی کی تھی۔ اسی کامیابی کے باعث سیکوئل سے بھی غیر معمولی توقعات وابستہ کی جا رہی ہیں۔ تجارتی تجزیہ کاروں کے مطابق ’’دھرندھر ۲‘‘ ہندوستان میں ایک ہزار کروڑ روپے سے زیادہ کی کمائی کر سکتی ہے، جبکہ عالمی باکس آفس پر اس کی آمدنی ۱۵۰۰؍ کروڑ روپے سے بھی تجاوز کر سکتی ہے۔

یہ بھی پڑھئے: ’’دی کیرالا اسٹوری ۲‘‘ کا نام تبدیل کرنے کی درخواست مسترد

فلم کے گرد اسی غیر معمولی توقعات اور شائقین کے جوش نے فلمی مارکیٹ پر واضح اثر ڈالا ہے، جس کے نتیجے میں کئی دیگر فلموں نے اپنی ریلیز کی تاریخیں تبدیل کر دی ہیں۔ ہالی ووڈ کی بڑی سائنس فکشن فلم Project Hail Mary جس میں Ryan Gosling مرکزی کردار ادا کر رہے ہیں، پہلے ۲۰؍ مارچ ۲۰۲۶ء کو امریکہ کے ساتھ ساتھ ہندوستان میں بھی ریلیز ہونے والی تھی۔تاہم، ’’دھرندھر‘‘ کے گرد پیدا ہونے والے بڑے پیمانے کے جوش و خروش کو دیکھتے ہوئے اس فلم کی ہندوستانی ریلیز کو ایک ہفتہ آگے بڑھا دیا گیا ہے۔ اب یہ فلم ہندوستان میں ۲۶؍ مارچ ۲۰۲۶ء کو انگریزی، ہندی، تمل اور تیلگو زبانوں میں آئی میکس اور دیگر پریمیم سنیمااسکرینوں پر نمائش کے لیے پیش کی جائے گی۔

ہندوستانی فلموں کی ریلیز میں تبدیلیاں
’’دھرندھر۲‘‘ کی ریلیز کے باعث کئی ہندوستانی فلموں نے بھی اپنی ریلیز تاریخیں تبدیل کر دی ہیں۔ جن فلموں کی تاریخیں تبدیل کی گئی ہیں ان میں شامل ہیں یش کی ’’ٹاکسک‘‘، جو اَب ۴؍ جون ۲۰۲۶ء کو ریلیز ہوگی، اجے دیوگن کی ’’دھمال ۴‘‘ جو اب ۴؍ جولائی ۲۰۲۶ء کو ریلیز ہوگی، تیلگو فلم ’’ڈکیت‘‘ جو اب ۱۰؍ اپریل کو ریلیز ہوگی ۔ اسی طرح دو دیگر تیلگو فلموں کی تاریخیں بھی تبدیل کی گئی ہیں۔ رام چرن کی ’’پیڈی‘‘ جو اب ۳۰؍ اپریل ۲۰۲۶ء کو اور نانی کی ’’دی پیرا ڈائز‘‘ ۲۱؍ اگست ۲۰۲۶ء کو ریلیز ہوگی۔

یہ بھی پڑھئے: سلمان خان فلم ’’وارِثو‘‘ کے فلمساز کے ساتھ کام کریں گے

فلمی صنعت پر ممکنہ اثر
فلمی تجزیہ کاروں کا کہنا ہے کہ کسی ایک فلم کی ریلیز کی وجہ سے اتنی بڑی تعداد میں دیگر فلموں کی تاریخیں تبدیل ہونا غیر معمولی بات ہے۔ ان کے مطابق ’’دھرندھر‘‘ کے ارد گرد پیدا ہونے والی توقعات اس بات کی نشاندہی کرتی ہیں کہ فلم ممکنہ طور پر اس سال کی سب سے بڑی باکس آفس ریلیز ثابت ہو سکتی ہے۔