۲۲؍ برس ۱۶۱؍ اقساط پر مشتمل مشہور چیٹ شو ’کافی ود کرن‘ اپنے نویں اور آخری سیزن کے ساتھ رخصت ہونے جارہا ہے۔ شو کے میزبان کرن جوہر نے شاہ رخ خان کی آخری مہمان کے طور پر آمد کی خبروں کی نہ تصدیق کی ہے اور نہ تردید۔ ان کا کہنا ہے کہ وہ مستقبل قریب میں کسی دوسرے چیٹ شو کی میزبانی بھی نہیں کرنا چاہتے۔

بالی ووڈ کے معروف فلم ساز اور ہدایت کار کرن جوہر نے اپنے مقبول ٹیلی ویژن چیٹ شو ’کافی ود کرن‘ (Koffee With Karan) کے اختتام کے ساتھ ہی ایک اور اہم اعلان کیا ہے۔ ان کا کہنا ہے کہ وہ اس شو کے بعد کسی دوسرے چیٹ شو کی میزبانی کرنے کا ارادہ نہیں رکھتے۔ دوسری جانب شو کے آخری سیزن کے آخری مہمان کے طور پر شاہ رخ خان کے نام کی قیاس آرائیاں بھی تیز ہوگئی ہیں، تاہم کرن جوہر نے اس بارے میں واضح جواب دینے کے بجائے اپنے مخصوص انداز میں تجسس برقرار رکھا ہے۔ مینز ایکس پی (MensXP) کی رپورٹ کے مطابق کرن جوہر نے ’دی ہالی ووڈ رپورٹر انڈیا‘ کو دیے گئے انٹرویو میں کہا کہ ’کافی ود کرن‘ ایک ایسا برانڈ اور دانشورانہ ملکیت ہے جسے مستقبل میں کوئی دوسرا شخص بھی آگے بڑھا سکتا ہے، لیکن وہ خود اس فارمیٹ میں واپس نہیں آنا چاہتے۔
کرن جوہر نے کہا، ’’کافی ایک آئی پی ہے، اس لیے اسے کوئی بھی چلا سکتا ہے! لیکن نہیں، میں اپنی زندگی کے اس حصے سے نکل کر دوبارہ اسی کام کو شروع نہیں کرنا چاہتا۔‘‘ انہوں نے مزید کہا کہ اس شو نے انہیں کئی برس تک بڑے فلمی ستاروں سے گفتگو کرنے اور ان کے ساتھ یادگار لمحات گزارنے کا موقع دیا، جس کے لیے وہ شکر گزار ہیں، لیکن اب وہ ایسے دوسرے کام کرنا چاہتے ہیں جن میں مہمانوں کے جوڑے طے کرنے، انہیں فون کرنے اور شو کی تیاریوں کا مسلسل بوجھ نہ اٹھانا پڑے۔ انہوں نے واضح کیا کہ ’’میں مستقبل قریب میں اس انداز میں واپس نہیں آرہا۔‘‘ تاہم کرن نے یہ امکان مکمل طور پر مسترد نہیں کیا کہ شو کا فارمیٹ کسی دوسرے میزبان کے ساتھ جاری رہ سکتا ہے۔ 

یہ بھی پڑھئے: آشوتوش رانا منفی کرداروں سے شہرت پانے والا باصلاحیت اداکار

کیا شاہ رخ خان ہوں گے آخری مہمان؟
’کافی ود کرن‘ کے آخری سیزن کے اعلان کے بعد سے ناظرین کے درمیان یہ سوال مسلسل زیرِ بحث ہے کہ شو کے آخری ایپی سوڈ میں کون سا ستارہ مہمان بنے گا۔ شاہ رخ خان اور کرن جوہر کی تقریباً تین دہائیوں پر محیط دوستی اور فلمی شراکت داری کے پیش نظر یہ قیاس آرائی کی جارہی ہے کہ شاہ رخ اس شو کے آخری مہمان ہوسکتے ہیں۔ کرن جوہر نے جب ان سے پوچھا گیا کہ کیا شاہ رخ خان آخری ایپی سوڈ میں شرکت کریں گے تو انہوں نے نہ ہاں کہا اور نہ انکار۔ ان کے الفاظ تھے، ’’نہ تصدیق، نہ تردید۔ کچھ بھی ظاہر نہیں کیا گیا! میری خاموشی کو اب آپ جس طرح چاہیں سمجھ لیجیے۔ جو چاہیں نتیجہ نکالیں، میں کچھ نہیں کہہ رہا۔‘‘ اس جواب نے قیاس آرائیوں کو مزید تقویت دی ہے، لیکن فی الحال کرن جوہر کی جانب سے شاہ رخ خان کے آخری مہمان ہونے کی باضابطہ تصدیق نہیں ہوئی ہے۔ 

شاہ رخ خان سے شروع ہوا تھا شو کا سفر
’کافی ود کرن‘ کا آغاز ۲۰۰۴ء میں ہوا تھا۔ اس کے پہلے ایپی سوڈ میں شاہ رخ خان اور کاجول مہمان بن کر آئے تھے۔ اس وقت شاید کسی نے اندازہ نہیں لگایا تھا کہ کرن جوہر کا یہ چیٹ شو ہندوستانی تفریحی دنیا کے مقبول ترین پروگراموں میں شامل ہوجائے گا۔ ۲۲؍ برس کے دوران اس شو کے ۸؍ سیزن اور ۱۶۱؍ ایپی سوڈ نشر ہوئے۔ اس دوران بالی ووڈ کے بڑے اداکاروں، ہدایت کاروں، فلمی خاندانوں اور دیگر شعبوں کی معروف شخصیات نے شرکت کی۔ شو کی خاص بات اس کا بے تکلف انداز، تیز رفتار سوالات کا سلسلہ اور مشہور شخصیات سے متعلق غیر متوقع انکشافات رہے۔ کئی مرتبہ مہمانوں کے بیانات نے فلمی دنیا میں بحث چھیڑی، جبکہ بعض گفتگوؤں نے تنازعات کو بھی جنم دیا۔ کرن جوہر نے اپنے آخری سیزن کے اعلان کے وقت اس سفر کو یاد کرتے ہوئے کہا تھا کہ شو نے انہیں دوستوں، خاندانوں، محبت کرنے والوں اور بعد میں سابقہ جوڑوں تک کو ایک ہی صوفے پر بٹھانے کا موقع دیا۔ انہوں نے یہ بھی تسلیم کیا کہ اس پروگرام کے دوران بعض بیانات نے ان کے لیے تنازعات اور تنقید بھی پیدا کی۔ 

یہ بھی پڑھئے: اگلا جیمس بانڈ کون ہوگا؟ رابرٹ پیٹنسن بھی دوڑ میں شامل

آخری سیزن میں سلمان خان سے آغاز
شو کے نویں اور آخری سیزن کا آغاز ۱۴؍ اکتوبر ۲۰۲۶ء کو ہوا۔ پہلے ایپی سوڈ میں سلمان خان مہمان بنے، جبکہ دوسرے ایپی سوڈ میں تلگو فلمی دنیا کی معروف جوڑی وجے دیوراکونڈا اور رشمیکا مندانا نے شرکت کی۔ آخری سیزن میں مختلف فلمی صنعتوں اور نسلوں سے تعلق رکھنے والی شخصیات کو شامل کیا گیا ہے۔ اس طرح شو نے صرف ہندی فلم انڈسٹری تک محدود رہنے کے بجائے جنوبی ہندوستانی سنیما اور نئی نسل کے اداکاروں کو بھی جگہ دی ہے۔ ہندوستان ٹائمز کی ایک رپورٹ کے مطابق شاہ رخ خان کے آخری مہمان بننے کی توقع ہے اور ان کے شو کے لیے کچھ حصوں کی شوٹنگ بھی ہوچکی ہے، تاہم کرن جوہر نے اس کی تصدیق نہیں کی۔ ’کافی ود کرن‘ کی رخصتی محض ایک ٹیلی ویژن پروگرام کا اختتام نہیں، بلکہ ہندوستانی پاپ کلچر کے ایک ایسے دور کا اختتام ہے جس میں فلمی ستاروں کی نجی زندگی، ان کے تعلقات اور ان کے بے ساختہ بیانات بھی تفریحی خبروں کا اہم حصہ بن گئے۔ اب ناظرین کی توجہ اس بات پر ہے کہ آیا شاہ رخ خان واقعی آخری بار اس صوفے پر بیٹھیں گے یا کرن جوہر اپنے اس طویل سفر کا اختتام کسی اور مہمان کے ساتھ کریں گے۔