پاکستان پہلی مرتبہ عالمی مقابلۂ حسن مس ورلڈ میں شرکت کرنے جا رہا ہے۔ ۲۴؍ سالہ انیقہ جمال اقبال کو مس ورلڈ پاکستان ۲۰۲۶ء کا تاج پہنایا گیا ہے اور وہ مقابلے کی ۷۳؍ سالہ تاریخ میں پاکستان کی پہلی نمائندہ ہوں گی۔ اس سے قبل پاکستان نے مس یونیورس، مس ارتھ اور دیگر بین الاقوامی مقابلوں میں شرکت کی ہے، تاہم مس ورلڈ میں یہ پہلی باضابطہ شرکت ہوگی۔

پاکستان عالمی مقابلۂ حسن مس ورلڈ میں پہلی مرتبہ شرکت کرنے جا رہا ہے، جہاں ۲۴؍ سالہ انیقہ جمال اقبال ملک کی نمائندگی کریں گی۔ اس طرح پاکستان مقابلے کی ۷۳؍ سالہ تاریخ میں پہلی بار اس عالمی ایونٹ کا حصہ بنے گا۔انیقہ جمال اقبال کو حال ہی میں لاہور میں منعقدہ ایک تقریب کے دوران مس ورلڈ پاکستان ۲۰۲۶ء کا تاج پہنایا گیا۔ اس انتخاب کے بعد وہ آئندہ مس ورلڈ مقابلے میں پاکستان کی سرکاری نمائندہ کے طور پر شرکت کریں گی۔ انیقہ جمال اقبال بزنس اور اکنامکس میں گریجویشن مکمل کر چکی ہیں اور اس وقت ماسٹرز کی تعلیم حاصل کر رہی ہیں۔ وہ اس سے قبل بھی مختلف مقابلوں میں حصہ لے چکی ہیں اور اب عالمی سطح پر پاکستان کی نمائندگی کے لیے تیار ہیں۔ اگرچہ پاکستان کی مس ورلڈ میں یہ پہلی شرکت ہوگی، تاہم ملک اس سے قبل مس یونیورس، مس ارتھ، مس گلوبل اور دیگر بین الاقوامی مقابلوں میں نمائندگی کر چکا ہے۔

یہ بھی پڑھئے: ’’ترس‘‘سے’’ شیمپین‘‘ تک، کوریوگرافر وجے گانگولی نے شروَری کی تعریف کی

بین الاقوامی مقابلوں میں پاکستان کی موجودگی کو نئی سمت۲۰۲۳ء میں اس وقت ملی، جب ایریکا رابن نے مس یونیورس مقابلے میں پاکستان کی پہلی نمائندہ کے طور پر شرکت کی۔ ایریکا رابن نے ابتدائی سوئمنگ سوٹ مرحلے میں روایتی لباس کے بجائے برقینی پہن کر عالمی توجہ حاصل کی تھی۔ ان کے اس فیصلے کو بین الاقوامی سطح پر سراہا گیا، تاہم پاکستان میں اس پر شدید بحث چھڑ گئی اور مختلف مذہبی و سیاسی حلقوں کی جانب سے تنقید بھی سامنے آئی۔ رپورٹس کے مطابق اس وقت پاکستان میں قائم کسی بھی مقامی کمپنی نے ایریکا رابن کی مالی معاونت نہیں کی تھی۔ مس یونیورس پاکستان کی فرنچائز اس وقت یوگین گروپ کے پاس تھی، جبکہ مس ورلڈ پاکستان کی نمائندگی کا انتظام مس پاکستان ورلڈ آرگنائزیشن کر رہی ہے۔

یہ بھی پڑھئے: فلم ’’بجرنگی بھائی جان‘‘ کو ۱۱؍سال مکمل، سلمان خان فلمز نے جشن منایا

پاکستان ایک اسلامی جمہوریہ ہے، جہاں سماجی اور مذہبی روایات کا معاشرتی زندگی پر گہرا اثر ہے۔ یہی وجہ ہے کہ کئی دہائیوں تک ملک میں خواتین کی بین الاقوامی مقابلۂ حسن میں شرکت ایک حساس موضوع سمجھی جاتی رہی۔ ماضی میں مس ورلڈ مقابلے میں روایتی سوئمنگ سوٹ راؤنڈ کو نمایاں حیثیت حاصل تھی، جسے پاکستان کی جانب سے شرکت نہ کرنے کی ایک بڑی وجہ قرار دیا جاتا رہا۔ وقت کے ساتھ مقابلوں کے انداز اور معیار میں تبدیلی آئی ہے اور اب ان پلیٹ فارمز پر صرف ظاہری حسن ہی نہیں بلکہ تعلیم، سماجی خدمات، شخصیت، قیادت اور مختلف سماجی موضوعات پر امیدواروں کے خیالات کو بھی اہمیت دی جاتی ہے۔

یہ بھی پڑھئے: ریلیز سے قبل ’’جنا نائیگن ‘‘ میں بڑی تبدیلیاں، نئے مناظر اور گانے شامل

اسی بدلتے ہوئے رجحان کے باعث حالیہ برسوں میں پاکستان کی نوجوان خواتین عالمی پلیٹ فارمز پر اپنی موجودگی کو کریئر، نمائندگی اور سماجی شعور اجاگر کرنے کا ذریعہ سمجھنے لگی ہیں۔ اگرچہ ایسے مقابلوں میں شرکت پر اب بھی ملک کے بعض قدامت پسند اور مذہبی حلقوں کی جانب سے اعتراضات سامنے آتے رہتے ہیں، تاہم نجی اداروں کی معاونت سے پاکستان کی بین الاقوامی مقابلوں میں شرکت کا سلسلہ بتدریج وسیع ہو رہا ہے۔ انیقہ جمال اقبال کی آئندہ مس ورلڈ میں شرکت کو اسی بدلتے ہوئے رجحان کی ایک اہم مثال قرار دیا جا رہا ہے، جہاں وہ عالمی سطح پر پاکستان کی نمائندگی کریں گی۔