بالی ووڈ اداکار رنویر سنگھ کے بارے میں ایک دلچسپ انکشاف سامنے آیا ہے۔ آئی پی ایل کے بانی للت مودی نے بتایا ہے کہ ان کی زندگی پر بننے والی مجوزہ بایوپک پر کام جاری ہے اور رنویر سنگھ نے خود ان سے ملاقات کرکے ان کا کردار ادا کرنے میں دلچسپی ظاہر کی تھی۔ مودی کے مطابق اسکرپٹ پر کام جاری ہے، تاہم ابھی یہ فیصلہ نہیں ہوا کہ فلم میں رنویر سنگھ ہی مرکزی کردار ادا کریں گے یا کوئی اور اداکار اس کردار کیلئے منتخب کیا جائے گا۔

فلم ’’دھرندھر‘‘ کی کامیابی کے بعد رنویر سنگھ مسلسل خبروں میں ہیں۔ ایک طرف ان کی پیشہ ورانہ زندگی اور آنے والے منصوبوں پر بحث جاری ہے تو دوسری جانب ان کے بارے میں نئے انکشافات بھی سامنے آ رہے ہیں۔ فلم ’’ڈان ۳‘‘ سے علاحدگی کے بعد جہاں ان کا نام فینٹسی زومبی تھرلر ’’پرلے‘‘ سے جوڑا جا رہا ہے، وہیں اب آئی پی ایل کے بانی للت مودی نے ان کے ایک ممکنہ نئے منصوبے سے متعلق اہم بات کہی ہے۔ اے این آئی سے گفتگو کرتے ہوئے للت مودی نے انکشاف کیا کہ ان کی زندگی پر مبنی ایک بایوپک زیرِ تیاری ہے اور اس کی اسکرپٹ لکھی جا رہی ہے۔ انہوں نے کہا، ’’وہاں ایک بایوپک پر کام جاری ہے۔ ابھی اس کی اسکرپٹ کی تیاری جارہی ہے۔ میں پہلے ہی سینکڑوں انٹرویوز کر چکا ہوں۔ میرے پاس سنیہا راجانی کی قیادت میں ایک پوری ٹیم ہے، جو سونی کو چلاتی تھی، لیکن وہ اس وقت صرف کہانی کو اسکرپٹ کر رہے ہیں۔‘‘

یہ بھی پڑھئے: مراٹھی فلموں کے مہانایک اشوک صراف نے ہندی میں بھی نام کمایا

للت مودی نے مزید بتایا کہ رنویر سنگھ نے خود ان سے ملاقات کی تھی اور ان کا کردار ادا کرنے میں دلچسپی ظاہر کی تھی۔ انہوں نے کہا، ’’رنویر میرا کردار ادا کرنا چاہتا ہے، اس نے آکر مجھ سے ملاقات کی۔ میں اسے کھیلتے ہوئے دیکھنا چاہوں گا لیکن اگر اس کے پاس وقت ہو، کیونکہ اب وہ بہت بڑا اسٹار بن چکا ہے۔ میں رنویر کو پہلے نہیں جانتا تھا۔ میں دیپیکا کو اچھی طرح جانتا تھا لیکن رنویر سے کبھی نہیں ملا تھا۔ پھر ایک دن مجھے فون آیا کہ رنویر آپ سے ملنا چاہتے ہیں۔ وہ چند سال پہلے لندن آئے تھے اور مجھ سے ملاقات کی تھی۔‘‘ انہوں نے مزید کہا کہ رنویر سنگھ نے خود اس کردار میں دلچسپی ظاہر کی تھی۔ مودی کے مطابق، ’’انہوں نے اپنی زندگی میں کہا تھا کہ اگر وہ کوئی ایک کردار ادا کرنا چاہیں تو وہ بطور کمشنر للت مودی کا کردار ادا کرنا پسند کریں گے۔ یہ میں نے ان سے نہیں پوچھا تھا۔ میرے خیال میں وہ ایک شاندار اداکار ہیں۔ دھرندھر میں انہوں نے جو کام کیا ہے وہ واقعی حیرت انگیز ہے۔ اب وہ آج بھی یہ کردار ادا کرنا چاہتے ہیں یا نہیں، یہ الگ بات ہے کیونکہ ہم دو سال پہلے اس بارے میں بات کر رہے تھے۔ لیکن اب ہم اس کہانی کو اسکرپٹ کر رہے ہیں اور اس پر بہت زیادہ کام ہو رہا ہے۔‘‘

یہ بھی پڑھئے: رنویر سنگھ اور ایف ڈبلیو آئی سی ای تنازع میں نیا موڑ، عدم تعاون کی ہدایت واپس

للت مودی نے یہ بھی واضح کیا کہ ابھی تک یہ طے نہیں ہوا کہ فلم میں ان کا کردار رنویر سنگھ ادا کریں گے یا کسی اور اداکار کو منتخب کیا جائے گا۔ ان کا کہنا تھا کہ رنویر سنگھ گزشتہ چند برسوں میں جس سطح کے اسٹار بن چکے ہیں، اس کے پیش نظر مستقبل کے فیصلے کئی عوامل کو مدنظر رکھ کر کیے جائیں گے۔