سلمان خان کی آنے والی جنگی فلم ’’ماتر بھومی‘‘، جس کا نام پہلے ’’بیٹل آف گلوان‘‘ تھا، ایک نئی رکاوٹ کا شکار ہوگئی ہے۔ اطلاعات کے مطابق، سینٹرل بورڈ آف فلم سرٹیفیکیشن (سی بی ایف سی) نے ابھی تک فلم کو منظوری نہیں دی، جس کے باعث اس کی ریلیز ایک بار پھر غیر یقینی ہو گئی ہے۔

بالی ووڈ سپر اسٹار سلمان خان کی آنے والی جنگی فلم ’’ماتر بھومی‘‘، جسے پہلے ’’بیٹل آف گلوان‘‘ کے نام سے پیش کیا گیا تھا، ریلیز سے قبل ایک نئی رکاوٹ کا سامنا کر رہی ہے۔ میڈیا رپورٹس کے مطابق، سینٹرل بورڈ آف فلم سرٹیفیکیشن (سی بی ایف سی) نے تاحال فلم کو سرٹیفکیٹ جاری نہیں کیا، جس کے باعث اس کی ریلیز دوبارہ غیر یقینی صورتحال سے دوچار ہو گئی ہے۔ یہ فلم ۲۰۲۰ء میں وادیٔ گلوان میں ہندوستانی اور چینی فوجیوں کے درمیان ہونے والے تصادم سے متاثر ہو کر تیار کی گئی ہے۔ ابتدا میں اس کی ریلیز ۱۷؍ اپریل کو عید کے موقع پر طے کی گئی تھی، تاہم بعد میں منصوبے تبدیل کرتے ہوئے اگست کو ممکنہ ریلیز ونڈو کے طور پر دیکھا جانے لگا۔ اب سرٹیفیکیشن میں تاخیر کے بعد فلم کی اگست میں نمائش بھی شکوک کی زد میں آ گئی ہے اور ایک مرتبہ پھر ریلیز مؤخر ہونے کا امکان ظاہر کیا جا رہا ہے۔

یہ بھی پڑھئے: میڈیسن اسکوائر گارڈن میں ٹیلر سوئفٹ اور ٹریوس کیلسی رشتۂ ازدواج میں منسلک

فلم اپنی باضابطہ ریلیز سے پہلے ہی تنازعات میں گھر گئی تھی۔ جب اس کا پہلا ٹیزر آن لائن جاری کیا گیا تو چین کے سوشل میڈیا پلیٹ فارم ویبو پر متعدد صارفین نے اس پر اعتراض کرتے ہوئے الزام لگایا کہ فلم میں ۲۰۲۰ء کے گلوان وادی تصادم کو مسخ شدہ انداز میں پیش کیا گیا ہے۔ اسی تنازع کے دوران رواں برس جنوری میں ہندوستانی وزارت خارجہ سے بھی اس معاملے پر سوالات کیے گئے تھے۔ وزارت خارجہ کے ترجمان رندھیر جیسوال نے اس وقت واضح کیا تھا کہ فلموں کی تیاری، منظوری یا ریلیز سے متعلق فیصلے متعلقہ ملکی اداروں کے دائرۂ اختیار میں آتے ہیں اور وزارت خارجہ ایسے منصوبوں یا فلم سازی کے معاملات میں مداخلت نہیں کرتی۔

یہ بھی پڑھئے: سلمان خان کی فلم ’’ماتر بھومی‘‘ میں بڑی تبدیلیاں، چینی نغمہ شامل

یہ معاملہ اس وقت مزید نمایاں ہوا تھا جب بعض رپورٹس میں دعویٰ کیا گیا کہ وزارت خارجہ نے گلوان تصادم پر مبنی فلم پر اعتراض کیا ہے۔ ان قیاس آرائیوں پر ردعمل دیتے ہوئے رندھیر جیسوال نے دوٹوک انداز میں کہا تھا کہ وزارت خارجہ فلمی منصوبوں کی نگرانی نہیں کرتی اور اس نوعیت کے فیصلے متعلقہ حکام کرتے ہیں۔ ذرائع کے مطابق فلم سازوں نے حال ہی میں فلم کا نام ’’بیٹل آف گلوان‘‘ سے تبدیل کر کے ’’ماتر بھومی‘‘ رکھ دیا ہے اور اس مناسبت سے بعض دیگر تبدیلیاں بھی کی جا رہی ہیں۔ اطلاعات کے مطابق اگرچہ یوم آزادی کے موقع پر اگست میں فلم کی ریلیز کو ہدف بنایا گیا تھا، تاہم موجودہ صورتحال میں اس منصوبے میں مزید تاخیر خارج از امکان نہیں۔

یہ بھی پڑھئے: سلمان خان کی ’’ماتربھومی‘‘ تنازع کا شکار، گلوان زاویہ میں نرمی کی کوشش

فلم کا پہلا ٹیزر ۲۷؍ دسمبر ۲۰۲۵ء کو سلمان خان کی ۶۰؍ ویں سالگرہ کے موقع پر جاری کیا گیا تھا، جسے شائقین کی جانب سے خاصی توجہ حاصل ہوئی تھی۔ ’’ماتر بھومی‘‘ میں سلمان خان ۱۶؍  بہار رجمنٹ کے کمانڈر کرنل سنتوش بابو کا کردار ادا کر رہے ہیں، جنہوں نے ۲۰۲۰ء کے گلوان وادی تصادم کے دوران ہندوستانی فوجیوں کی قیادت کرتے ہوئے سرحد پر کارروائیوں میں اہم کردار ادا کیا تھا۔ فلم کی دیگر کاسٹ میں ابھیلاش چودھری، انکور بھاٹیا اور چترانگدا سنگھ شامل ہیں، جبکہ موسیقی ہمیش ریشمیا نے ترتیب دی ہے۔ فلم کی ہدایت کاری اپوروا لاکھیا کر رہے ہیں، جبکہ اسے سلمان خان فلمز کے بینر تلے سلمیٰ خان پروڈیوس کر رہی ہیں۔ خیال رہے کہ سلمان خان کو آخری مرتبہ فلم ’’سکندر‘‘ میں دیکھا گیا تھا، جس کی ہدایت کاری اے آر مروگاداس نے کی تھی، جبکہ فلم میں رشمیکا مندانا بھی اہم کردار میں نظر آئی تھیں۔