اسٹینڈ اپ کامیڈین سمے رائنا نے اپنے ’’اسٹیل لائیو‘‘ شو کے دوران امیتابھ بچن اور پروگرام ’’کون بنے گا کروڑ پتی‘‘ سے متعلق بیانات دے کر تنازع کھڑا کر دیا۔ انہوں نے انکشاف کیا کہ شو میں اپنی دادی کے حوالے سے بیان حقیقت پر مبنی نہیں تھا بلکہ ماحول کے مطابق کہا گیا تھا۔ انہوں نے عوامی شخصیات کے رویے اور انٹرنیٹ کلچر پر بھی بات کی، جبکہ رنویر الہبادیہ سے جڑے ایک واقعے کا ذکر بھی کیا۔

اسٹینڈ اپ کامیڈین سمے رائنا نے اپنے حالیہ ’’اسٹیل لائیو‘‘ شو کے دوران متعدد متنازع بیانات دے کر سوشل میڈیا پر بحث چھیڑ دی ہے۔ انہوں نے نہ صرف بالی ووڈ کے لیجنڈ اداکار امیتابھ بچن کا ذکر کیا بلکہ اپنے ماضی کے تجربات، خاص طور پر کون بنے گا کروڑ پتی میں شرکت کے حوالے سے بھی کئی انکشافات کیے۔ شو کے دوران سمے رائنا نے بتایا کہ انہوں نے ۲۰۲۵ء میں ’’کون بنے گا کروڑ پتی‘‘ میں شرکت کے وقت ایک ذاتی بات میں سچائی کا سہارا نہیں لیا تھا۔ انہوں نے کہا: ’’دادی مر گئی ہے میری۔ ۷؍ سال ہو گئے ہیں میرے دادی کو مار کے۔‘‘ انہوں نے مزید اعتراف کرتے ہوئے کہا کہ ’’سر میری دادی آپ کی بہت بڑی فین ہے۔‘‘ اس کے ساتھ انہوں نے وضاحت کی کہ یہ بات انہوں نے ’’یونہی ‘‘ کہی تھی۔

یہ بھی پڑھئے: جاوید اختر کی فلمی دنیا میں واپسی، دو اسکرپٹ مکمل، پروڈکشن کا جلد آغاز

اس موقع پر سمے رائنا نے عوامی شخصیات کے رویے پر بات کرتے ہوئے کہا کہ ’’آپ ہندوستانی انٹرنیٹ پر ایماندار نہیں ہیں۔ آپ ہو بھی نہیں سکتے۔ آپ گیم کھیلتے ہیں، آپ وقت دیکھ کر رول ادا کرتے ہیں۔‘‘ ان کے مطابق لوگ اکثر حالات کے مطابق اپنے انداز اور رویے کو بدل لیتے ہیں، خاص طور پر جب وہ عوامی پلیٹ فارمز پر ہوں۔ انہوں نے مزید بتایا کہ ’’کون بنے گا کروڑ پتی‘‘ میں شرکت کے دوران انہوں نے جان بوجھ کر اپنی شخصیت کا ایک مختلف اور زیادہ مہذب رخ پیش کیا۔ ان کے الفاظ میں: ’’میں سمجھتا تھا کہ کے بی سی میں مجھے سوبر نظر آنا چاہئے۔ ‘‘انہوں نے اس بات کا بھی اعتراف کیا کہ ہاٹ سیٹ پر بیٹھے ہوئے ان کے ذہن میں کئی متنازع خیالات آئے لیکن انہوں نے انہیں ظاہر نہیں کیا۔

ایک موقع پر انہوں نے ایک ایسا جملہ بھی شیئر کیا جسے انہوں نے شو میں کہنے سے گریز کیا تھا۔ انہوں نے کہا: ’’سر، آپ نے اسے پولیو کا اشتہار کیا، پھر بھی اپنے بیٹے کو پاؤں پر کیوں نہیں کھڑا کر پائے۔‘‘ اس بیان کو انہوں نے ایک مثال کے طور پر پیش کیا کہ وہ کس طرح اپنے خیالات کو روک کر رکھتے ہیں۔ شو کے دوران سمے رائنا نے رنویر الہبادیہ کے ساتھ ایک واقعے کا ذکر بھی کیا، جو ’’انڈیاز گوٹ لیٹنٹ‘‘ سے جڑا ہوا تھا اور جس پر پہلے بھی تنازع ہو چکا ہے۔ انہوں نے بتایا کہ رنویر نے ایک سوال کو کئی بار دہرایا تھا، جس کے بعد ایک مخصوص ورژن کو حتمی شکل دی گئی۔

یہ بھی پڑھئے: انٹرنیٹ ڈراما میں دلچسپی نہیں: دھرندھر کی کامیابی پر خاموشی کے بعد دپیکا پڈوکون

سمے رائنا کے ان بیانات اور ان کے انداز نے سامعین کو دو حصوں میں تقسیم کر دیا ہے۔ ایک طرف کچھ افراد ان کے کھلے اور بے باک انداز کو سراہ رہے ہیں، جبکہ دوسری جانب کئی صارفین اسے غیر مناسب قرار دے رہے ہیں۔ ان کے شو کے کلپس سوشل میڈیا پر بڑے پیمانے پر وائرل ہو رہے ہیں اور اس پر بحث کا سلسلہ جاری ہے۔ تاحال امیتابھ بچن کی جانب سے ان بیانات پر کوئی ردعمل سامنے نہیں آیا، تاہم اس معاملے نے انٹرنیٹ پر ایک نئی بحث کو جنم دے دیا ہے۔