شاہ رخ خان کی انتہائی متوقع فلم ’’کنگ‘‘ کی ریلیز تاریخ کا باضابطہ اعلان کر دیا گیا ہے۔ ریڈ چلیز انٹرٹینمنٹ نے خصوصی ٹیزر جاری کرتے ہوئے تصدیق کی کہ فلم ۲۴؍ دسمبر ۲۰۲۶ء کو ریلیز ہوگی۔ بڑے بجٹ، اسٹار کاسٹ اور ایکشن پیمانے کے باعث فلم کو بالی ووڈ کے سب سے مہنگے پروجیکٹس میں شمار کیا جا رہا ہے۔

کنگ خان شاہ رخ کی آنے والی فلم ’’کنگ‘‘ کی ریلیز تاریخ آخرکار سامنے آ گئی ہے، جس کے بعد مداحوں میں جوش و خروش کی لہر دوڑ گئی ہے۔ فلم کے پروڈیوسرز ریڈ چلیز انٹرٹینمنٹ نے انسٹاگرام پر ایک خصوصی ٹیزر جاری کرتے ہوئے اعلان کیا کہ یہ فلم ۲۴؍ دسمبر ۲۰۲۶ء کو سنیما گھروں میں نمائش کے لیے پیش کی جائے گی۔ پوسٹ کے کیپشن میں لکھا گیا، ’’ایک دھاڑ اتنی بلند کہ بادشاہت کو ہلا دے، کنگ ۲۴؍ دسمبر ۲۰۲۶ء۔‘‘ جس کے بعد سوشل میڈیا پر مداحوں نے زبردست ردعمل دیا۔ صارفین نے کمنٹس میں ’’ایک ہی بادشاہ ہے‘‘ اور ’’آخرکار بادشاہ واپس آ گیا‘‘ جیسے جملوں کے ساتھ اپنی خوشی کا اظہار کیا۔

 

 

 

 

 

View this post on Instagram

 

 

 

 

 

 

 

 

 

 

 

A post shared by Red Chillies Entertainment (@redchilliesent)

فلم کی ہدایت کاری کے فرائض سدھارتھ آنند انجام دے رہے ہیں، جبکہ اسے گوری خان، سدھارتھ آنند اور ممتا آنند نے مشترکہ طور پر پروڈیوس کیا ہے۔ ’’کنگ‘‘ میں شاہ رخ خان کے ساتھ ان کی بیٹی سہانا خان بھی نظر آئیں گی، جبکہ دیگر اہم کرداروں میں دپیکا پڈوکون، ابھیشیک بچن، انیل کپور، جیکی شروف، ارشد وارثی اور رانی مکھرجی شامل ہیں۔
فلم کی موسیقی سچن جگر ترتیب دے رہے ہیں جبکہ بیک گراؤنڈ اسکور انیرودھ روی چندر کا ہے۔ اس فلم کی شوٹنگ مئی ۲۰۲۵ء میں شروع ہوئی تھی اور اسے ممبئی کے علاوہ برلن، پراگ، بڈاپیسٹ اور وارسا جیسے بین الاقوامی مقامات پر فلمایا گیا ہے۔ رپورٹس کے مطابق، ’’کنگ‘‘ کا بجٹ تقریباً ۳۵۰؍ کروڑ روپے بتایا جا رہا ہے، جس میں مارکیٹنگ اخراجات شامل نہیں ہیں۔ اس بڑے پیمانے، بین الاقوامی لوکیشنز اور ہالی ووڈ طرز کے اسٹنٹس کی وجہ سے اسے ہندوستان کی سب سے مہنگی ایکشن فلموں میں شمار کیا جا رہا ہے۔

یہ بھی پڑھئے: میک موہن نے متعدد زبانوں کی فلموں میں کام کیا ہے

دلچسپ بات یہ ہے کہ ابتدائی طور پر یہ فلم ایک چھوٹے پیمانے کا پروجیکٹ تھی، جس کی ہدایت کاری سوجوئے گھوش کرنے والے تھے اور اس میں سہانا خان مرکزی کردار میں تھیں، جبکہ شاہ رخ خان کا کردار محدود کیمیو تک تھا۔ تاہم، اسکرپٹ کی صلاحیت کو دیکھتے ہوئے میکرز نے اسے بڑے پیمانے پر ایک مکمل ایکشن انٹرٹینر میں تبدیل کر دیا۔’’کنگ‘‘ کو پہلے ہی بالی ووڈ کی سب سے بڑی ریلیزز میں شمار کیا جا رہا ہے، اور کرسمس ۲۰۲۶ء پر اس کی ریلیز باکس آفس پر ایک بڑے مقابلے اور ریکارڈ توڑ کمائی کی توقعات کو جنم دے رہی ہے۔