ٹیلر سوئفٹ نے ’دی لائف آف اے شو گرل: اینکور‘ کی ریلیز کے بعد اسپاٹیفائی پر ۲۰۲۶ء کے دو ریکارڈ اپنے نام کرلیے، جن میں ایک ہی دن میں سب سے زیادہ اسٹریم کی جانے والی خاتون فنکار اور گانے کا ریکارڈ بھی شامل ہے۔

ٹیلر سوئفٹ نے ’’دی لائف آف اے شو گرل: اینکور‘‘ کی ریلیز کے بعد ۲۰۲۶ء میں اسپاٹیفائی کے دو ریکارڈ اپنے نام کرلیے ہیں، جن میں ایک ہی دن میں سب سے زیادہ اسٹریم کی جانے والی خاتون فنکار کا ریکارڈ بھی شامل ہے۔ چار گانوں پر مشتمل اس مجموعے کی نصف شب ریلیز کے بعد اس کا مرکزی گانا ’’پیشنٹ زیرو‘‘ بھی رواں سال اسپاٹیفائی پر ایک ہی دن میں کسی خاتون فنکار کا سب سے زیادہ اسٹریم کیا جانے والا گانا بن گیا ہے۔ ٹیلر سوئفٹ نے نئی موسیقی کی ریلیز سے قبل اشاروں اور پہیلیوں کے ذریعے مداحوں میں تجسس پیدا کیا۔ پہلا اشارہ ’لا اینڈ آرڈر: ایس وی یو‘ کے ایمی ایوارڈز اسکیچ کے دوران سامنے آیا، جہاں جاسوس کا کردار ادا کرتے ہوئے سوئفٹ نے کہا، ’’میرے خیال میں ہمیں جس چیز کی تلاش ہے، وہ سب کے سامنے موجود ہے۔‘‘ اس کے بعد انہوں نے کیمرے کی جانب دیکھتے ہوئے کہا، ’’Saccharide. Aries. From the vineyard. North or south۔‘‘ مداحوں نے فوری طور پر اس اشارے کو سمجھ لیا اور نوٹ کیا کہ ان الفاظ کے تیسرے حروف کو ملانے سے ’’Encore‘‘ بنتا ہے۔

یہ بھی پڑھئے: چمبور: انوشکا شرما، وراٹ کوہلی کے آرڈر سے اس ریسٹورنٹ کی قسمت بدلی

سوئفٹ نے منگل کو اعلان کیا تھا کہ وہ رواں ہفتے اپنا نیا گانا ’’پیشنٹ زیرو‘‘ ریلیز کریں گی اور اپنی ویب سائٹ پر اس گانے کی محدود تعداد میں تین مختلف سی ڈیز فروخت کے لیے پیش کی تھیں۔ ایک روز بعد انہوں نے انکشاف کیا کہ اس کے بجائے جمعہ کو ’’دی لائف آف اے شو گرل: اینکور‘‘ ریلیز کیا جائے گا، جس میں چار نئے گانے شامل ہوں گے: ’’پیشنٹ زیرو‘‘، ’’کلیولینڈ!‘‘، ’’پنک کلاؤڈنگ‘‘ اور ’’بیبی لون‘‘۔ اپنے ۲۰۲۵ء کے البم میں نئے گانوں کا اضافہ کرنے کی وجہ بیان کرتے ہوئے سوئفٹ نے سوشل میڈیا پر لکھا، ’’تقریباً ایک سال قبل آپ لوگوں نے ایک ایسا ناقابلِ تصور کام کیا، جس نے مجھے واقعی حیران کردیا۔ آپ نے ’دی لائف آف اے شو گرل‘ کو تاریخ میں کسی بھی البم کی سب سے بڑی پہلے ہفتے کی فروخت دی۔‘‘ انہوں نے مزید کہا، ’’میں میکس اور شیل بیک، اس البم پر میرے دونوں ساتھیوں، کے ساتھ جشن منانے کے لیے سویڈن گئی۔ دراصل ہم صرف اس لمحے کی خوشی اور اس کے لیے اپنی شکرگزاری محسوس کرنا چاہتے تھے، لیکن وہاں ایک اسٹوڈیو بھی تھا اور ہم نے وہی کیا جو ہم اس وقت کرتے ہیں جب ہم کچھ بھی محسوس کرتے ہیں: ہم نے مزید گانے لکھے۔‘‘

یہ بھی پڑھئے: سدھارتھ ملہوترا کی ۱۱؍ برس ’دی ون‘ کے ساتھ بڑی واپسی، پہلے دن ۹؍ کروڑ کی کمائی

سوئفٹ نے کہا، ’’مجھے امید ہے کہ آپ کو یہ گانے پسند آئیں گے، کیونکہ یہ اس البم کے لیے آپ کی بے پناہ محبت اور پذیرائی کے نتیجے میں خالص شکرگزاری کے جذبے سے وجود میں آئے ہیں۔ ’دی لائف آف اے شو گرل: دی اینکور‘، جس میں چار نئے گانے شامل ہیں، جمعہ کو ریلیز ہورہا ہے اور اس کے لیے پیشگی آرڈر اور سیو کا آپشن بھی دستیاب ہے۔‘‘ ٹیلر سوئفٹ اب ’پیشنٹ زیرو‘ کی میوزک ویڈیو ایم ٹی وی وی ایم ایز میں پہلی مرتبہ پیش کریں گی، جہاں انہیں افتتاحی ’’آرٹسٹ ڈائریکٹر ایوارڈ‘‘ بھی دیا جائے گا۔ اس میوزک ویڈیو کی سنیماٹوگرافی آسکر ایوارڈ یافتہ ایمانوئل لوبیزکی نے کی ہے، جبکہ سوئفٹ کے ساتھ ڈکوٹا جانسن اور کولن فیرل بھی ویڈیو میں اداکاری کرتے نظر آئیں گے۔