ٹورنٹو فلم فیسٹیول نے آسکر ایوارڈ یافتہ ہدایتکار کرسٹوفر نولن کی آنے والی فلم ’’دی اوڈیسی‘‘ کی ریلیز سے قبل ان کی تمام ۱۲؍ ہدایت کردہ فلموں کی خصوصی نمائش کا اعلان کیا ہے۔ ’’Christopher Nolan: Grand Designs‘‘ کے عنوان سے یہ ریٹروسپیکٹو پروگرام ۸؍ جولائی سے ۲۰؍ اگست تک جاری رہے گا۔

دنیا کے ممتاز فلمی میلوں میں شمار ہونے والا ٹورنٹو فلم فیسٹیول اس سال عالمی شہرت یافتہ فلمساز کرسٹوفر نولن کے اعزاز میں ایک خصوصی ریٹروسپیکٹو پروگرام پیش کرے گا، جس میں ان کی بطور ہدایتکار تمام ۱۲؍ فلموں کی نمائش کی جائے گی۔ فیسٹیول انتظامیہ کی جانب سے جاری بیان کے مطابق، ’’کرسٹوفر نولن: گرینڈ ڈیزائن‘‘ کے عنوان سے یہ پروگرام ۸؍ جولائی سے ۲۰؍ اگست تک ٹورنٹو انٹرنیشنل فلم فیسٹیول TIFF لائٹ باکس میں منعقد ہوگا۔ اس خصوصی ریٹروسپیکٹو میں نولن کی فلموں کو ۳۵؍ ایم ایم اور ۷۰؍ ایم ایم فلم فارمیٹس میں پیش کیا جائے گا، جو ان کی اینالاگ فلم سازی سے دیرینہ وابستگی اور بڑے اسکرین کے تجربے سے محبت کی عکاسی کرتا ہے۔ متعدد فلموں کی اسکریننگ TIFF لائٹ باکس کے جدید ترین اور بڑے سنیما ہال میں ۷۰؍ ایم ایم فارمیٹ میں کی جائے گی۔

یہ بھی پڑھئے: زویا اختر کے ٹائیگر بے بی آفس میں چوری، ۶۶؍ ہارڈ ڈسک غائب

فیسٹیول کے مطابق، یہ پروگرام نہ صرف نولن کے فنی سفر کو خراج تحسین پیش کرے گا بلکہ نئی نسل کے ناظرین کو ان کی فلم سازی کے تکنیکی اور تخلیقی پہلوؤں کو قریب سے دیکھنے کا موقع بھی فراہم کرے گا۔ ریٹروسپیکٹو کی نمایاں جھلکیوں میں ۱۸؍ جولائی کو فلم ’’باربی‘‘ اور ’’اوپن ہائمر‘‘ کی خصوصی مشترکہ اسکریننگ شامل ہے، جسے ’’Barbenheimer‘‘ رجحان کی یادگار علامت کے طور پر دیکھا جا رہا ہے۔ ۲۰۲۳ء میں دونوں فلمیں ایک ہی دن ریلیز ہوئی تھیں اور سوشل میڈیا سے لے کر عالمی باکس آفس تک ایک ثقافتی رجحان بن گئی تھیں۔

اسی طرح، ۲۴؍ جولائی کو فلم ’’دی رائٹ اسٹف‘‘ کی خصوصی اسکریننگ بھی رکھی گئی ہے، جس سے قبل خلائی تحقیق کے ایک ماہر کے ساتھ گفتگو ہوگی۔ نولن اس فلم کو ماضی میں اپنی پسندیدہ فلموں میں شمار کر چکے ہیں۔ کرسٹوفر نولن کا ٹورنٹو انٹرنیشنل فلم فیسٹیول سے تعلق بھی خاص اہمیت رکھتا ہے۔ انہوں نے پہلی بار ۱۹۹۸؍ میں اپنی ڈیبیو فلم ’’فالوونگ‘‘ کے ساتھ TIFF میں شرکت کی تھی، جب یہ فلم ’’ڈسکوری‘‘ سیکشن میں دکھائی گئی۔ اس کے بعد وہ ۲۰۱۷ء میں فلم ’’ڈن کرک‘‘ کی خصوصی IMAX اسکریننگ کے لیے دوبارہ فیسٹیول میں شریک ہوئے تھے۔

یہ بھی پڑھئے: کم بجٹ ہارر فلم Obsession کی ہالی ووڈ میں دھوم، بجٹ ۷؍ کروڑ، کمائی ۸۰۰؍ کروڑ

TIFF کی چیف پروگرامنگ آفیسر انیتا لی نے کہا کہ ’’کرسٹوفر نولن عصر حاضر کے سب سے بااثر فلم سازوں میں سے ایک ہیں۔ ان کی ہر نئی فلم ایک ثقافتی واقعہ بن جاتی ہے۔ یہ پروگرام سامعین کو اس تخلیقی وسعت، تکنیکی جدت اور بصری پیمانے کو سمجھنے کا موقع فراہم کرے گا جو آج کے جدید سنیما کی تعریف کرتا ہے۔‘‘ نولن کی فلموں نے گزشتہ دو دہائیوں میں تنقیدی اور تجارتی دونوں سطحوں پر غیرمعمولی کامیابیاں حاصل کی ہیں۔ فلم ’’میمنٹو‘‘ سے لے کر فلم ’’انسیپشن‘‘ کے ذہن کو موڑنے والے خوابوں کے تصور تک، اور فلم ’’انٹرسٹیلار‘‘ کی سائنسی و جذباتی وسعت سے لے کر ’’ڈن کرک‘‘ کی جنگی شدت تک، نولن نے ہر بار اپنے انداز سے فلمی بیانیے کو نئی جہت دی۔

ان کی سپر ہیرو ٹرائیلوجی ’’بیٹ مین بیگنس‘‘، ’’دی ڈارک نائٹ‘‘ اور ’’دی ڈارک نائٹ رائزیس‘‘ کو سپر ہیرو سنیما کی نئی تعریف قرار دیا جاتا ہے، جبکہ ’’اوپن ہائمر‘‘ نے انہیں بہترین ہدایتکار کا اکیڈمی ایوارڈ دلایا۔ اب نولن کی اگلی فلم ’’دی اوڈیسی‘‘ پر دنیا بھر کی نظریں مرکوز ہیں، جو یونانی شاعر ہومر کی کلاسیکی رزمیہ داستان پر مبنی ہے۔ اس فلم میں میٹ ڈیمن، ٹام ہالینڈ، زینڈایا، اینی ہیتھوے، لوپیتا یونگ، رابرٹ پیٹنسن اور شارلیز تھیورن شامل ہیں۔ فلم ’’دی اوڈیسی‘‘ کی عالمی ریلیز ۱۷؍ جولائی کو متوقع ہے، اور اسی کے پیش نظر TIFF کا یہ ریٹروسپیکٹو نولن کے فلمی سفر کا ایک جامع جشن تصور کیا جا رہا ہے۔