لیجنڈری اداکار اور فلمساز گرو دت اپنی منفرد فلموں کیلئے مشہور ہیں۔ ان کی زندگی پر فلم بنائی جارہی ہے جس پر کام شروع ہے۔ گرو دت کا کردار ادا کرنے کیلئے وکی کوشل کو موزوں ترین اداکار سمجھا جارہا ہے۔

لیجنڈری فلمساز اور اداکار گرو دت کی زندگی پر ایک فلم پر کام جاری ہے اور بنانے والے مرکزی کردار کیلئے وکی کوشل کو شامل کرنے کا ارادہ رکھتے ہیں۔ مڈ ڈے کی ایک رپورٹ میں انکشاف کیا گیا ہے کہ الٹرا میڈیا اینڈ انٹرٹینمنٹ گروپ گرو دت کی فلموں کے حقوق کا مالک ہے۔ اب وہ ان فلموں کو نہ صرف ویب سیریز میں ڈھالنے کا ارادہ رکھتے ہیں بلکہ ان کی زندگی پر بائیوپک بھی بنائیں گے۔ الٹرا کے سی او او اور ڈائریکٹر رجت اگروال نے ادارہ کو بتایا کہ ’’ بایوپک ہمیشہ چیلنجنگ ہوتی ہیں کیونکہ انہیں کسی فرد کی عظمت اور کامیابیوں کی تقلید کرنے کی ضرورت ہوتی ہے، ہمیں پروڈیوسرز اور جدید دور کے ڈائریکٹر کے ساتھ تعاون کرنے میں خوشی ہوگی، جو گرو دت کے پرستار ہیں، اور دیکھیں گے کہ پروجیکٹ کہاں جاتا ہے۔‘‘

یہ بھی پڑھئے:پریش راول ویلن سے مزاحیہ کرداروں میں نام کمانے والے اداکار

انہوں نے مزید کہا کہ ’’میں نے دو انتہائی قابل احترام ہدایتکاروں سے بات کی ہے، جو ان کی فلموں کو ویب سیریز میں دوبارہ بنانے میں دلچسپی رکھتے ہیں، اور ان کی زندگی پر فلم بھی بنانا چاہتے ہیں۔ جب سب کچھ واضح ہوجائے گا تو اس کے بارے میں تفصیل سے بات کی جاسکے گی۔ ہم ان کے خاندان کے افراد سے رابطے میں ہیں۔‘‘ جب ان سے پوچھا گیا کہ بایوپک میں کون اداکاری کرے گا، تو انہوں نے جواب دیا، ’’کسی ایک اداکار کا نام لینا مشکل ہوگا کیونکہ انڈسٹری میں بہت سے باصلاحیت اداکار ہیں لیکن مجھے لگتا ہے کہ وکی کوشل گرو دت جی کی جذباتی گہرائی لا سکتے ہیں۔‘‘

یہ بھی پڑھئے:کارتک آرین اور سری لیلا کی رومانٹک بلاعنوان فلم فروری ۲۰۲۶ء میں ریلیز ہوسکتی ہے

اس کے علاوہ گرودت کی مشہور کلاسک فلمیںپیاسا (۱۹۵۷ء)، کاغذ کے پھول (۱۹۵۹ء)، چودھویں کا چاند (۱۹۶۰ء) اور صاحب بی بی اور غلام (۱۹۶۲ء) کو ۹؍ جولائی کو ان کے یوم پیدائش کے موقع پر دوبارہ ریلیز کیا جائے گا۔ اسی کے بارے میں بات کرتے ہوئے، انہوں نے کہا کہ ’’ان کی تمام فلموں کو اصل بلیک اینڈ وائٹ ورژن میں بحال کر دیا گیا ہے تاکہ وہی پرانی یادیں مل سکیں۔ تاہم، ہم سامعین کے ردعمل کو دیکھنے کیلئے چند گانوں کو رنگین کرنے پر غور کر رہے ہیں۔ نامور فلمسازوں کی جانب سے ان کی لازوال میراث پر کیوریٹڈ نمائشیں اور پینل ڈسکشنز بھی ہوں گے۔‘‘