فلم ’’ڈنکی‘‘ میں شاہ رخ خان کے ساتھ کام کرنے والے اداکار وکرم کوچر نے انکشاف کیا ہے کہ فلم کی شوٹنگ مکمل ہونے کے بعد آج تک ان کی سپر اسٹار شاہ رخ خان سے دوبارہ ملاقات نہیں ہوئی۔ انہوں نے بتایا کہ وہ ہر سال شاہ رخ خان کو ان کے منیجر کے ذریعے سالگرہ کی مبارک باد بھیجتے ہیں، کیونکہ براہِ راست رابطہ نہیں ہے۔

بالی ووڈ اداکار وکرم کوچر نے، جنہوں نے ہدایت کار راجکمار ہیرانی کی فلم ’’ڈنکی‘‘ میں بالیندر ’’بگّو‘‘ لکھن پال کا کردار ادا کیا تھا، سپر اسٹار شاہ رخ خان کے ساتھ اپنے تعلقات اور فلم کی شوٹنگ کے دوران گزرے لمحات پر کھل کر گفتگو کی ہے۔ ایک حالیہ انٹرویو میں وکرم کوچر نے بتایا کہ ’’ڈنکی‘‘ کی شوٹنگ ختم ہونے کے بعد ان کی شاہ رخ خان سے دوبارہ ملاقات نہیں ہوئی، تاہم وہ آج بھی ہر سال ان کی سالگرہ پر مبارک باد کا پیغام ان کے منیجر کے ذریعے بھیجتے ہیں۔ وکرم کوچر نے کہا کہ ’’میں ڈنکی کے بعد شاہ رخ خان سے نہیں ملا۔ میں ہر سال ان کی سالگرہ پر ان کے منیجر کے ذریعے مبارک باد بھیج دیتا ہوں۔‘‘ انہوں نے مزیدکہا کہ ’’یہ بالکل فطری بات ہے کہ اتنے بڑے سپر اسٹار کے لیے ہر شخص کو یاد رکھنا آسان نہیں ہوتا، لیکن انہوں نے مجھے نہیں بھلایا، اور میرے لیے یہی بہت بڑی بات ہے۔‘‘

یہ بھی پڑھئے: سشمتا مکھرجی کو ایک کروڑ کا قرض چکانے کیلئے ’سی گریڈ‘ فلموں میں کام کرنا پڑا تھا

اداکار نے شاہ رخ خان کی شخصیت کی تعریف کرتے ہوئے کہا کہ فلم کی تقریباً دو سالہ شوٹنگ کے دوران انہوں نے شاہ رخ کو نہایت عاجز، خوش اخلاق اور ہر ساتھی فنکار کا احترام کرنے والا انسان پایا۔ ان کے مطابق اتنی غیر معمولی شہرت کے باوجود شاہ رخ خان کے رویے میں کسی قسم کا غرور نہیں تھا۔ وکرم نےکہا کہ ’’وہ واقعی ایک قیمتی انسان ہیں۔ ان کے ساتھ کام کرتے ہوئے کبھی محسوس نہیں ہوا کہ وہ دنیا کے سب سے بڑے ستاروں میں سے ایک ہیں۔ وہ ہر شخص سے احترام اور محبت سے پیش آتے ہیں۔‘‘ انہوں نے یہ بھی بتایا کہ اگرچہ وہ شاہ رخ خان کے مشہور بنگلے ’’منت‘‘ نہیں گئے اور نہ ہی فلم کے بعد ان سے ذاتی ملاقات ہوئی، لیکن ’’ڈنکی‘‘ کے دوران گزارا گیا وقت ان کے لیے زندگی کا یادگار تجربہ ہے۔ وکرم کے مطابق شاہ رخ خان شوٹنگ کے دوران ہر اداکار کو اہمیت دیتے تھے اور سیٹ پر ایسا ماحول بناتے تھے کہ ہر فنکار خود کو ٹیم کا لازمی حصہ محسوس کرتا تھا۔ 

یہ بھی پڑھئے: فہد فاضل نا کام آغاز سے ہندوستان کے منفرد اداکار تک کا سفر

وکرم کوچر اس سے قبل بھی متعدد انٹرویوز میں شاہ رخ خان کی سخاوت اور پیشہ ورانہ رویے کا ذکر کر چکے ہیں۔ انہوں نے پہلے بتایا تھا کہ شاہ رخ خان نے ’’ڈنکی‘‘ کی پوری ٹیم کو اپنے گھر ’’منت‘‘ مدعو کیا تھا اور ہر فنکار کی سالگرہ کو خصوصی انداز میں منایا جاتا تھا۔ ان کے مطابق یہ چھوٹی چھوٹی باتیں شاہ رخ خان کو دوسروں سے ممتاز بناتی ہیں۔ واضح رہے کہ ’’ڈنکی‘‘ دسمبر ۲۰۲۳ء میں ریلیز ہوئی تھی اور اس کی ہدایت کاری راجکمار ہیرانی نے کی تھی۔ فلم میں شاہ رخ خان، تاپسی پنو، بومن ایرانی، وکی کوشل اور وکرم کوچر نے اہم کردار ادا کیے تھے۔ شاہ رخ خان اب اپنی آنے والی فلم ’’کنگ‘‘ کی تیاری میں مصروف ہیں، جو رواں سال کی سب سے بڑی بالی ووڈ ریلیز میں شمار کی جا رہی ہے۔