انگریزوں کو اصل پر خاش مسلمانوں سے تھی۔ وہ چاہتے تھے کہ مسلمانوں کے ایمان کا سودا کریں، اس پس منظر میں بالغ نظر اور دردمند علماء نے محسوس کیا کہ مسلمانوں کے ایمان کی حفاظت کی تدبیر کرنی چاہئے چنانچہ انہوں نے طے کیاکہ ہندوستان کے گوشے گوشے میں دینی درس گاہوں کا جال بچھا دیا جائے ۔

آج  کل دینی مدارس کو زکوٰۃ دینے کے سلسلہ میں مختلف جہتوں سے بحث کی جارہی ہے۔ بعض حضرات کی رائے ہے کہ مصارف ِ زکوٰۃ میں مدارس کا ذکر تو نہیں ہے؟ اس لئے مدارس کو زکوٰۃ نہیں دینی چاہئے۔ بعض ذمہ دارانِ مدارس وہ بھی ہیں جو بذاتِ خود مدارس کو مصرف ِ زکوٰۃ سمجھتے ہیں  اور جو رقم موصول ہوتی ہے اس کو مدرسے کے ہر کام میں خرچ کرتے ہیں۔ اس لئے اس سلسلہ میں ایک متوازن طرز عمل اختیار کرنے کی ضرورت ہے۔ یہ بھی ایک حقیقت ہے کہ زکوٰۃ کے  مصارف متعین هیں، مدارس اپنی ذات کے اعتبار سے زکوٰۃ کے مستحق نہیں هہیں؛ لیکن بالواسطہ  ضرور ہیںکیونکہ وہ مستحقین ِ زکوٰۃ کے وکیل ہیںاور ان کی کفالت کرتے ہیں۔ اور یہ بھی ایک حقیقت ہے کہ مدارس جن لوگوں پر خرچ کرتے ہیں وہ شرعاً زکوٰۃ کے اولین مستحق ہیں۔

یہ بھی پڑھئے: کیا آپ راہِ خدا میں خرچ کرنے کیلئے تیار ہیں؟

اس مسئلہ پر غور کرنے کے لئے دو باتیں پیش نظر رکھنی ضروری ہیں : اول یہ کہ زکوٰۃ کا مقصد کیا ہے ؟ اور زکوٰۃ کی ادائیگی میں کیا رعایت ملحوظ ہے ؟ دوسرے کیا یہ مقصد دینی مدارس کو زکوٰۃ ادا کرنے سے حاصل ہوجاتا ہے ؟ واضح رہے کہ قرآن مجید نے زکوٰۃ کے آٹھ مصارف ذکر کئے ہیں، فقیر، مسکین یعنی غریب اور بہت زیادہ غریب، عاملین یعنی زکوٰۃ کی جمع و تقسیم کا کام انجام دینے والے لوگ، مؤلفۃ القلوب یعنی وہ نومسلم جن کو اسلام پر استقامت کے لئے یا وہ غیر مسلم جن کو اسلام کی ترغیب کے لئے کچھ دیا جائے، غلام، مقروض،  اﷲ کی راہ میں جہاد کرنے والے اور مسافر۔ (التو بۃ:  ۶۰ ) 

ان مصارفِ زکوٰۃ پر غور کرنے سے صاف معلوم ہوتا ہے کہ زکوٰۃ کے بنیادی طورپر دو مقاصد ہیں: غربا کی حاجت پوری کرنا، اسلام کی بلندی اور اس کی دعوت و اشاعت اور حفاظت و صیانت کے نظام کو تقویت پہنچانا ۔ 

مصرف زکوٰۃ کی روح کو سامنے رکھ کر دینی مدارس کے نظام اور اس کے کردار پر غور کیجئے… دینی مدارس کی حیثیت عام درس گاہوں کی نہیں ہے۔عام درس گاہوں کا مقصد بچوں کو ایسی تعلیم سے آراستہ کرنا ہے جو آئندہ ان کو ملازمت دلائے اور زیادہ سے زیادہ کمانے کے لائق بنائے، جس تعلیم سے جس قدر مستقبل کی معاشی فلاح و بہبود متعلق ہے، وہ اسی قدر لوگوں کے لئے مرکز توجہ بھی ہے اور گراں بھی؛ بلکہ سرکاری تعلیم گاہوں کی زبوں حالی اور بے سروسامانی نے اب تعلیم کو ایک نہایت ہی نفع بخش اور نفع رساں تجارت بنا دیا ہے؛ لیکن دینی مدارس کی حیثیت اس سے مختلف ہے ، خاص کر ہندوستان میں اس کا ایک خاص پس منظر ہے ۔ 

یہ بھی پڑھئے: روزہ متنوع قسم کے اعمال کا مجموعہ ہے

مسلم دورِ حکومت تک وہ علوم جن کو آج ’’ جدید علوم ‘‘ کہا جاتا ہے ، اس قدر شاخ درشاخ نہ ہوتے تھے ، جیساکہ آج ہم دیکھ رہے ہیں ، بعض فنون مدون ہوچکے تھے؛ لیکن ان پر ایک آدھ کتابوں کی تدریس کے ساتھ تجربہ کافی سمجھا جاتا تھا، بعض فنون مدون بھی نہ ہوئے تھے اور ان کے تجربات سینہ بہ سینہ منتقل ہوتے آئے تھے، جیسے مختلف شعبوں کی انجینئرنگ اور زراعت وغیرہ، اس کیلئے حکومت کی طرف سے عمومی نوعیت کی درس گاہیں ہوتی تھیں،  ان میں زبان ، مذہب ، اخلاق اور طب وغیرہ کی تعلیم مشترک طورپر ہوتی تھی اور مختلف قوموں کے لوگ مل جل کر تعلیم حاصل کیا کرتے تھے ۔ 

جب ہندوستان سے مسلمانوں کے اقتدار کا سورج غروب ہونے لگا اور انگریز نہایت چالبازی کے ساتھ اپنے قدم بڑھانے لگے ، تو انہوں نے سونے کی اس چڑیا کے بال و پر نوچنے کو کافی نہ سمجھا ؛ بلکہ ہندوستان کو مستقل طورپر اپنے زیر اثر رکھنے کی غرض سے رعایا کی فکر و  نظر میں تبدیلی کو بھی ضروری سمجھا اور اس کے لئے چہاررخی تدبیریں کیں، چونکہ  ان کو زیادہ خطرہ مسلمانوں سے تھا جو اُن کے پہلے اقتدار میں تھے، اس لئے انہوں نے ہندوؤں اور مسلمانوں کو اور خاص کر مسلمانوں کو اپنی فکری یورشوں کا نشانہ بنایا اور اسلام کے خلاف بے سروپا اعتراضات اور خلاف واقعہ شکوک و شبہات پھیلانے کا سلسلہ شروع کیا تاکہ ہندوستانیوں کی نئی نسل اپنے مذہب کے بارے میں غیر مطمئن اور بدگمان ہوجائے۔

یہ بھی پڑھئے: آج کی تراویح میں مالِ غنیمت، غزوۂ بدر اور پھر زکوٰۃ کے مصارف کی بابت سنئے!

  انگریزوں کو اصل پُرخاش مسلمانوں سے تھی اور وہ چاہتے تھے کہ کسی طرح مسلمانوں کے ایمان کا سودا کریں ، اس پس منظر میں بالغ نظر اور دردمند علماء نے محسوس کیا کہ سیاسی اقتدار تو اب رُخصت ہونے کو ہے، کسی طرح مسلمانوں کے ایمان کی حفاظت کی تدبیر کرنی چاہئے؛  چنانچہ انہوں نے طے کیاکہ ہندوستان کے گوشے گوشے میں دینی درس گاہوں کا جال بچھا دیا جائے اور ایک ایسی نسل کو وجود بخشا جائے جومادی منافع کے پیچھے دوڑنے کے بجائے اپنی دنیا کو قربان کرکے مسلمانوں کے دین و ایمان کی حفاظت پر کمربستہ رہے، فاقہ مستی اسے گوارہ ہو، معمولی کھانا اور معمولی پہننے پر وہ قناعت کرسکے اورخس پوش جھونپڑیوں میں چٹائیوں پر بیٹھ کر اپنے آپ کو خدا کے دین کی حفاظت اور سربلندی کے لئے وقف رکھے ۔ چنانچہ اس منصوبہ کے تحت پورے ملک میں مدارس و مکاتب کا قیام عمل میں آیا اورایک ایسے تعلیمی نظام کی تشکیل کی گئی جو اپنے اخراجات میں حکومت کا محتاج نہ ہو؛ بلکہ اگر حکومت مدد کرنا بھی چاہے تو اسے قبول نہ کیا جائے اور ہر طرح سرکاری مداخلت سے آزاد رہ کر یہاں سے دین کی حفاظت و اشاعت کے جذبہ سے سرشار اور ایثار و قربانی سے سرمست بادہ خواروں کی ایک بہت بڑی تعداد پیدا کی جائے؛ چنانچہ بالغ نظر اور دردمند علماء  پنی اس کوشش میں کامیاب رہے ۔

گزشتہ ڈیڑھ دو سو سال میں اسلام کے خلاف اس ملک میں جتنی یورشیں ہوئی ہیں، ان کا مقابلہ انہی بے نوا فقیروں اور ناسمجھ مسلمانوں کی تنقیدوں کا ہدف بننے والے مولویوں کا کارنامہ ہے۔