کیا ہمارے بچّے صرف نقلچی یا نقل کرنے والے بن کر رہ جائیں گے؟ اور اس خطرے سے کیسے بچا جا سکتا ہے؟مصنوعی ذہانت یااے آئی نے تعلیم کی دنیا میں ایک نیا انقلاب برپا کر دیا ہے۔

کیا ہمارے بچّے صرف نقلچی یا نقل کرنے والے بن کر رہ جائیں گے؟ اور اس خطرے سے کیسے بچا جا سکتا ہے؟مصنوعی ذہانت یااے آئی نے تعلیم کی دنیا میں ایک نیا انقلاب برپا کر دیا ہے۔ آج ایک طالب علم چند سیکنڈ میں مضمون لکھوا سکتا ہے، نظم تیار کروا سکتا ہے، سوالات کے جوابات حاصل کر سکتا ہے، تقریر لکھوا سکتا ہے اور یہاں تک کہ مشکل ترین مسائل بھی حل کروا سکتا ہے۔ بظاہر یہ ایک بڑی سہولت ہے، لیکن اس سہولت کے پیچھے ایک سنگین خطرہ بھی چھپا ہوا ہے۔ کہیں ایسا تو نہیں کہ ہم اپنے بچّوں کو ذہین بنانے کے بجائے ذہانت کے محتاج بنا رہے ہیں؟

(۱) کیا اے آئی طلبہ کی تخلیقی صلاحیتیں ختم کر دے گا؟

اے آئی خود تخلیقی صلاحیتوں کا دشمن نہیں ہے، لیکن اس کا غیر ضروری اور اندھا دھند استعمال ضرور تخلیقی صلاحیتوں کو کمزور کر سکتا ہے۔ تخلیق کا تعلق سوچنے، غور کرنے، سوال اٹھانے، غلطیاں کرنے، تجربات کرنے اور نئے خیالات پیدا کرنے سے ہے۔ اگر طالب علم ہر مضمون اے آئی سے لکھوائے، ہر سوال کا جواب اس سے حاصل کرے اور ہر مشکل کا حل اسی سے پوچھے تو آہستہ آہستہ اس کی اپنی سوچنے کی صلاحیت متاثر ہو سکتی ہے۔ اس کے ہاتھ میں موبائل ہوگا، اس کے سامنے کمپیوٹر ہوگا، لیکن اس کے دماغ میں اپنے خیالات کی کمی ہوگی۔

یہ بھی پڑھئے: امریکہ میں اگر ٹرمپ الیکشن ہار گئے ہیں تو پھر صدر کے عہدے پر کیوں برقرار ہیں؟

(۲)  کیا طلبہ صرف نقلچی بن جائیں گے؟

یہ ایک حقیقی خطرہ ہے۔ جب طالب علم بغیر سمجھے اے آئی کے تیار کردہ مواد کو اپنے نام سے جمع کروانے لگیں گے تو ان کی شخصیت میں تین خطرناک تبدیلیاں پیدا ہو سکتی ہیں:(الف)سوچنے کے بجائے نقل کرنا: وہ اپنی سوچ استعمال کرنے کی زحمت نہیں کریں گے۔(ب) محنت کے بجائے شارٹ کٹ: انہیں ہر کام کا فوری حل چاہئے ہوگا۔ (ج)تخلیق کے بجائے رٹنا: وہ دوسروں کے خیالات کو دہرانے کے عادی ہو جائیں گے۔

ایسے طلبہ امتحانات میں اچھے نمبر حاصل کر بھی سکتے ہیں، لیکن عملی زندگی میں نئے مسائل کا سامنا کرنے اور ان کے نئے حل تلاش کرنے میں ناکام ہو سکتے ہیں۔

(۳)  اس خطرے سے کیسے بچا جائے؟

اے آئی کے دُور میں تعلیم کا مقصد صرف معلومات فراہم کرنا نہیں بلکہ آزادانہ سوچنے والے انسان تیار کرنا ہونا چاہیے۔

طلبہ کیلئے:

۱۔ کسی بھی موضوع پر پہلے خود سوچیں، پھر اے آئی سے مدد لیں۔  

۲۔ مضمون یا کہانی پہلے اپنے الفاظ میں لکھیں، بعد میں اے آئی سے مشورہ کر لیں۔ 

۳۔ اے آئی کے ہر جواب کو درست تسلیم نہ کریں، اس پر سوال اٹھائیں اور تحقیق کریں۔  

۴۔ روزانہ کچھ وقت کتابیں پڑھنے، لکھنے اور نئے خیالات پیدا کرنے کیلئے مختص کریں۔  

۵۔اے آئی سے تیار شدہ مواد کو جوں کا توں نقل کرنے کے بجائے اسے سمجھیں، پرکھیں اور اپنے خیالات شامل کریں۔  

۶۔ اپنی غلطیوں سے سیکھیں، کیونکہ غلطی بھی تخلیقی سفر کا ایک اہم حصہ ہے۔

یہ بھی پڑھئے: کیا ’گجرات لابی‘ یوگی کی سیاسی اُڑان پر قدغن لگا پائے گی؟

اساتذہ کے لیے:

۷۔  ایسے سوالات دیں جن کے جوابات صرف اے آئی سے حاصل نہ کیے جا سکیں۔  

۸۔  طلبہ کو کلاس روم میں اپنے خیالات کا اظہار کرنے کی ترغیب دیں۔

۹۔  صرف تحریری ہوم ورک نہیں بلکہ زبانی وضاحت، مباحثے اور عملی سرگرمیوں کو بھی اہمیت دیں۔

۱۰۔  طلبہ کی جانچ اس بات پر کریں کہ انہوں نے کیا سوچا، کیسے سوچا اور اپنے نتیجے تک کیسے اے آئی پہنچے۔

۱۱۔  اے آئی کو دشمن سمجھنے کے بجائے اسے ایک تعلیمی معاون کے طور پر استعمال کرنا سکھائیں۔

والدین کے لیے:

۱۲۔  بچّوں کو ہر مسئلے کا فوری حل فراہم نہ کریں۔

۱۳۔  گھر میں سوال پوچھنے، بحث کرنے اور آزادانہ رائے دینے کا ماحول پیدا کریں۔

۱۴۔  بچّوں کو کتابوں، کھیلوں، مشاہدے اور عملی تجربات سے جوڑیں۔

۱۵۔  ان کے تیار کردہ کام کی تعریف کریں، صرف اے آئی سے حاصل کردہ بہترین نتائج کی نہیں۔

تعلیمی اداروں اور حکومت کے لیے:

۱۶۔  نصاب میں تخلیقی، تحریر، تنقیدی سوچ اور مسئلہ حل کرنے کی صلاحیت کو مرکزی حیثیت دی جائے۔

۱۷۔  اساتذہ کواے آئی کے مثبت اور منفی استعمال کی تربیت دی جائے۔

۱۸۔   امتحانی نظام کو اس انداز میں تبدیل کیا جائے کہ رٹنے ر اور نقل کے بجائے سمجھ، تجزیے اور تخلیقی صلاحیتوں کو جانچا جائے۔

(۴)  اے آئی کے دَور میں استاد کی اہمیت مزید بڑھ جائے گی! 

یہ تصوّر غلط ہے کہ اے آئی استاد کی جگہ لے لے گا۔ اے آئی معلومات فراہم کر سکتا ہے، لیکن ایک اچھا استاد طالب علم کی شخصیت بناتا ہے۔اے آئی سوال کا جواب دے سکتا ہے، لیکن ایک استاد طالب علم کے اندر سوال پیدا کرنے کی صلاحیت پیدا کرتا ہے۔اے آئی مضمون لکھ سکتا ہے، لیکن طالب علم کے اندر احساس، درد، مشاہدہ، تجربہ اور زندگی کی حقیقتوں کو سمجھنے کی صلاحیت پیدا کرنا استاد کا کام ہے۔اے آئی معلومات کا خزانہ ہے، لیکن تخلیقی ذہن کا مالک انسان ہی ہونا چاہئے۔

یہ بھی پڑھئے: گاؤں میں شادیوں کی بہار ہے جو کسانوں کیلئے پریشانیوں کا باعث بھی ہے

(۵)  ہمیں کس قسم کے طلبہ تیار کرنے ہیں ؟

ہمیں ایسے طلبہ نہیں چاہئے جو اے آئی کے سامنے بے بس ہوں، بلکہ ایسے طلبہ چا ہئے جواے آئی کو اپنے مقاصد کیلئے استعمال کرنا جانتے ہوں۔اسلئےہمیں ایسے بچّے چاہئیں جو:

*اے آئی سے جواب لینے کے بجائے اس سے بہتر سوال پوچھ سکیں۔

*دوسروں کے خیالات کی نقل کرنے کے بجائے اپنے خیالات پیش کر سکیں۔

*معلومات جمع کرنے کے بجائے ان کا تجزیہ کر سکیں۔

*. ٹیکنالوجی کے غلام بننے کے بجائے اس کے ذمہ دار مالک بن سکیں۔

*مشین کی رفتار سے نہیں بلکہ انسانی ذہانت تخیّل اور بصیرت سے آگے بڑھ سکیں۔

اختتامی کلمات:

اے آئی کو دماغ کا متبادل نہیں، دماغ کا معاون بنائیے!

تعلیم کے مستقبل کا سب سے بڑا چیلنج یہ نہیں ہوگا کہ بچّے اے آئی استعمال کر رہے ہیں یا نہیں بلکہ اصل سوال یہ ہوگا کہ اے آئی استعمال کرنے کے بعد بھی کیا بچّے خود سوچنے کے قابل ہیں؟

ہمیں یہ نہیں بھولنا چاہیے کہ دنیا کی تمام بڑی ایجادات پہلے کسی انسان کے ذہن میں ایک خیال کی صورت میں پیدا ہوئیں۔ نہ کمپیوٹر نے پہلا سوال پیدا کیا تھا، نہ ا ے آئی نے پہلا خواب دیکھا تھا۔ یہ سب انسانی تخلیقی ذہن کی بدولت ممکن ہوا۔

اگر ہم نے بچّوں کو ہر کام کیلئے اے آئی کا محتاج بنا دیا تو ممکن ہے کہ ہمارے پاس معلومات سے بھرپور مگر تخلیقی صلاحیتوں سے محروم ایک نسل تیار ہو جائے۔ جوبھلے ہی اپنے آپ کو بڑے فخر سے اے آئی جنریشن کہے مگر حقیقت یہ ہے کہ وہ نسل کسی قسم کا کوئی مثبت کردار ادا نہیں کرپائے گی بلکہ اس نسل کا نام تک نہیں ہو گا تاریخ کے صفحات پر !