ایم پی جے کا معروف سماجی خدمت گار میدھا پاٹکر کے ہمراہ اس مسئلے پر باہمی صلاح ومشورہ اور مل جل کر قانونی لڑائی پر اتفاق۔

باندرہ کی غریب نگر بستی ریلوے کے ذریعے اجاڑے جانے کے بعد موومنٹ فار پیس اینڈ جسٹس (ایم پی جے) کی جانب سے حالات کا جائزہ لیا گیا اور متاثرین کی قانونی مدد اور ان کی باز آبادکاری کے لئے آواز بلند کرنے کا اعلان کیا گیا۔ اس ضمن میں خاص طور پر سماجی خدمت گار میدھا پاٹکر کے ہمراہ ایم پی جے کے صدر محمد سراج نے باہم تبادلہ خیال کیا۔ واضح ہوکہ۱۹؍ مئی سے ریلوے ٹریک سے متصل غریب نگر میں انسدادِ تجاوزات مہم شروع کی گئی تھی اور اس دوران تقریباً ۵۰۰؍ مکانات، درجنوں دکانیں اور دو مساجد منہدم کر دی گئی تھیں۔ غریب نگر کئی دہائیوں سے سیکڑوں محنت کش خاندان رہتے تھے ۔ مقامی افراد کے مطابق متعدد خاندان گزشتہ ۴۰؍ برس سے یہاں آباد تھے، جبکہ آبادی کا  بڑا حصہ مسلمانوں پر مشتمل تھا۔

یہ بھی پڑھئے : ممبئی میں بارش، درجۂ حرارت میں کمی، یکم جون سے مزید بارش کی پیش گوئی

ایم پی  جے کے صدر محمد سراج نے بے گھر خاندانوں سے ملاقات کی اور ان کے مسائل معلوم کئے۔ ان کا کہنا تھا کہ یہ کارروائی اس لئے بھی متنازع بن گئی ہے کیونکہ متاثرین کا دعویٰ ہے کہ ان کی مناسب بازآبادکاری کئے بغیر انہیں بے دخل کر دیا گیا ہے۔ مہاراشٹر حکومت کی موجودہ پالیسی کے تحت ۲۰۱۱ء سے قبل قائم جھوپڑ پٹیوں کے مکینوں کو متبادل رہائش فراہم کرنا ضروری ہے لیکن غریب نگر کے معاملے میں اس اصول پر عمل نہیں کیا گیا۔انہوں نے مزید بتایا کہ اس تعلق سے انہوں نے معروف سماجی خدمت گار اور ’گھر بچاؤ گھر بناؤ آندولن‘ کی سربراہ میدھا پاٹکر سے تفصیلی گفتگو کی اور آئندہ کے لائحۂ عمل پر تبادلۂ خیال کیا ہے۔ غریب نگر کے متاثرین کے حقوق، بازآبادکاری اور انصاف کے حصول کے لئے مل جل کر قانونی لڑائی لڑی جائےگی، ہم سب متاثرین کے ساتھ ہیں۔