عالمی موسمیاتی ادارے (WMO) کی تازہ رپورٹ کے مطابق جنوری سے ستمبر ۲۰۲۶ء کے دوران عالمی اوسط درجۂ حرارت صنعتی دور سے پہلے کی سطح کے مقابلے میں ۴۷ء۱؍ ڈگری سیلسیس زیادہ رہا۔ بحرالکاہل میں طاقت پکڑتا ال نینو اس گرمی میں مزید اضافہ کرسکتا ہے، جبکہ اس کے اثرات ۲۰۲۷ء تک برقرار رہنے کا امکان ہے۔ ماہرین نے خبردار کیا ہے کہ انسانی سرگرمیوں سے پیدا ہونے والی عالمی حدت اور قدرتی موسمیاتی رجحان کا امتزاج شدید موسمی واقعات کے خطرات بڑھا رہا ہے۔

دنیا ایک ایسے دور میں داخل ہو رہی ہے جہاں گرمی کے ریکارڈ مسلسل ٹوٹ رہے ہیں اور شدید موسمی واقعات کی شدت میں اضافہ ہورہا ہے۔ عالمی موسمیاتی ادارے (World Meteorological Organization – WMO) کی پیر کو جاری ہونے والی تازہ رپورٹ کے مطابق ۲۰۲۶ء بھی دنیا کے گرم ترین برسوں میں شامل ہونے کی راہ پر ہے۔ اس کی بڑی وجہ انسانی سرگرمیوں سے پیدا ہونے والی عالمی حدت کے ساتھ بحرالکاہل میں تیزی سے طاقت پکڑتا ال نینو (El Niño) ہے، جسے بعض ماہرین غیر معمولی طور پر طاقتور یا ’سپر سائزڈ‘ ال نینو قرار دے رہے ہیں۔ رپورٹ کے مطابق جنوری سے ستمبر ۲۰۲۶ء تک عالمی سطح پر اوسط درجۂ حرارت صنعتی دور سے پہلے کی اوسط کے مقابلے میں تقریباً ۴۷ء۱؍ ڈگری سیلسیس زیادہ ریکارڈ کیا گیا۔ سال کے آخری مہینوں میں ال نینو کے اثرات مزید نمایاں ہونے کی توقع ہے، اس لیے سالانہ اوسط میں بھی اضافہ ہوسکتا ہے۔ یورپی موسمیاتی سروس کوپرنیکس (Copernicus) کے مطابق ۲۰۲۶ء کا صنعتی دور سے پہلے کی سطح کے مقابلے میں ۵ء۱؍ ڈگری سیلسیس سے زیادہ گرم رہنا تقریباً یقینی ہے۔ اس طرح ۲۰۲۴ء کے بعد یہ دوسرا کیلنڈر سال ہوسکتا ہے جس میں یہ حد عبور ہوگی۔ تاہم ایک سال کا ۵ء۱؍ ڈگری سے تجاوز کرنا پیرس معاہدے کے طویل مدتی درجۂ حرارت کے ہدف کی باضابطہ خلاف ورزی کے مترادف نہیں ہے۔
ڈبلیو ایم او کی رپورٹ میں بتایا گیا ہے کہ گزشتہ ۱۲؍ برس انفرادی طور پر ریکارڈ کے گرم ترین برس رہے ہیں، جبکہ گزشتہ ۴؍ برس درجۂ حرارت کے اعتبار سے پہلے چار مقامات پر ہیں۔ سمندروں کی سطح اور سمندر کی سطح پر پانی کا درجۂ حرارت بھی ریکارڈ بلندی پر پہنچ چکا ہے۔ گلیشیئرز کا سکڑنا جاری ہے اور میٹھے پانی کے ذخائر میں ۲۰۱۴ء سے مسلسل کمی دیکھی جارہی ہے۔ رپورٹ کے مطابق ۲۰۲۵ء میں برفانی ذخائر کا سالانہ نقصان اس قدر تھا کہ اگر پگھلی ہوئی برف کو پانی کی شکل میں جمع کیا جاتا تو ہر سیکنڈ ۵؍ اولمپک سوئمنگ پول بھرنے کے برابر پانی حاصل ہوتا۔ اقوام متحدہ کے موسمیاتی معلومات کے سربراہ جان کینیڈی (John Kennedy) نے جنیوا میں صحافیوں سے گفتگو کرتے ہوئے کہا کہ تمام موسمیاتی اشاریے ایک ہی سمت کی نشاندہی کررہے ہیں۔ گرین ہاؤس گیسوں کے باعث فضا میں پھنسنے والی حرارت سمندروں، فضا، پگھلتی برف اور بلند ہوتی سمندری سطح میں ظاہر ہورہی ہے۔ 

یہ بھی پڑھئے: غزہ میں تودہ گرنے سے ۵؍ فلسطینی جاں بحق

ال نینو کیا ہے اور یہ درجۂ حرارت کیوں بڑھاتا ہے؟
ال نینو بحرالکاہل کے استوائی خطے میں سمندر کی سطح کے پانی کے غیر معمولی طور پر گرم ہونے کا قدرتی موسمیاتی رجحان ہے۔ عموماً یہ ہر ۲؍ سے ۷؍ برس کے وقفے سے نمودار ہوتا ہے اور دنیا کے مختلف حصوں میں بارش، ہواؤں اور درجۂ حرارت کے معمولات کو متاثر کرتا ہے۔ اس کے دوران بحرالکاہل میں جمع حرارت کا ایک حصہ فضا میں منتقل ہوتا ہے، جس سے عالمی اوسط درجۂ حرارت عارضی طور پر بڑھ جاتا ہے۔ موجودہ ال نینو کا اثر اس لیے زیادہ تشویش کا باعث ہے کہ یہ پہلے سے گرم ہوتی زمین کے ساتھ مل رہا ہے۔ انسانی سرگرمیوں، بالخصوص کوئلہ، تیل اور گیس جیسے فوسل فیول جلانے سے خارج ہونے والی گرین ہاؤس گیسیں طویل مدت سے زمین کا درجۂ حرارت بڑھا رہی ہیں۔ سمندر اس اضافی حرارت کا تقریباً ۹۰؍ فیصد جذب کرتے ہیں۔ ال نینو کے دوران سمندر میں پہلے سے موجود حرارت کا کچھ حصہ فضا میں منتقل ہوتا ہے، جس سے گرمی کی شدت میں مزید اضافہ ہوسکتا ہے۔ اس کا مطلب یہ نہیں کہ ال نینو خود زمین میں نئی حرارت پیدا کرتا ہے، بلکہ یہ سمندر میں جمع حرارت کی تقسیم کو تبدیل کرتا ہے۔
امریکی ادارے نیشنل اوشیانک اینڈ ایٹموسفیرک ایڈمنسٹریشن (NOAA) کے کلائمیٹ پریڈکشن سینٹر نے ۸؍ اکتوبر کی اپنی رپورٹ میں بتایا تھا کہ ال نینو جنوری سے مارچ ۲۰۲۷ء تک طاقتور سے بہت طاقتور مرحلے میں رہنے کا امکان رکھتا ہے۔ ادارے کے موسمیاتی ماڈلز کے مطابق اکتوبر سے دسمبر ۲۰۲۶ء کے دوران تاریخی شدت کے ال نینو کا امکان ۸۳؍ فیصد تھا۔ بحرالکاہل کے بعض حصوں میں سمندر کی سطح کے پانی کا درجۂ حرارت معمول سے ۴؍ ڈگری سیلسیس سے بھی زیادہ ریکارڈ کیا گیا۔اس رجحان کے اثرات دنیا کے ہر خطے میں یکساں نہیں ہوتے۔ کہیں شدید گرمی اور خشک سالی کا خطرہ بڑھتا ہے تو کہیں غیر معمولی بارش، سیلاب اور جنگلاتی آگ کے امکانات پیدا ہوتے ہیں۔ اس کی شدت اور اثرات کا انحصار اس بات پر بھی ہوتا ہے کہ ال نینو کتنی دیر برقرار رہتا ہے اور بحرالکاہل کے علاوہ بحرِ ہند اور بحرِ اوقیانوس کی صورت حال کیا ہے۔ WMO نے خبردار کیا ہے کہ موجودہ ال نینو سے منسلک موسمیاتی شدت ۲۰۲۷ء تک جاری رہ سکتی ہے۔
البتہ ماہرین نے ’سپر ال نینو‘ کی اصطلاح کے استعمال میں احتیاط کی تاکید بھی کی ہے۔ ڈبلیو ایم او کے مطابق یہ کوئی باقاعدہ اور معیاری عملی درجہ بندی نہیں ہے۔ ادارے کا کہنا ہے کہ ابھی ایسا ثبوت موجود نہیں جس سے یہ ثابت ہو کہ موسمیاتی تبدیلی ال نینو کے واقعات کی تعداد یا ان کی شدت میں اضافہ کررہی ہے۔ تاہم پہلے سے گرم سمندر اور فضا اس رجحان کے اثرات کو زیادہ شدید بنا سکتے ہیں، کیونکہ شدید گرمی اور موسلا دھار بارش جیسے واقعات کے لیے توانائی اور نمی کی دستیابی بڑھ جاتی ہے۔

یہ بھی پڑھئے: ڈنمارک: تعلیمی وظائف میں کٹوتی کے خلاف طلبہ سڑکوں پر نکل آئے

کوپ ۳۱؍ سے پہلے عالمی لیڈروں کو انتباہ

یہ رپورٹ ایسے وقت میں سامنے آئی ہے جب دنیا کے ممالک ۹؍ سے ۲۰؍ نومبر تک ترکی میں اقوام متحدہ کی موسمیاتی کانفرنس کوپ ۳۱ (COP31) میں شرکت کی تیاری کررہے ہیں۔ اقوام متحدہ کے سیکریٹری جنرل انتونیو غطریس (António Guterres) نے موجودہ صورت حال کو ’’موسمیاتی شدت کے ایک نئے دور‘‘ سے تعبیر کرتے ہوئے کہا کہ غیر معمولی طاقتور ال نینو ایسی زمین سے ٹکرا رہا ہے جو انسانی سرگرمیوں کے باعث پہلے ہی حد سے زیادہ گرم ہوچکی ہے۔ ان کے مطابق موسمیاتی ریکارڈ مسلسل ٹوٹ رہے ہیں اور اس کے انسانی نقصانات میں سب سے پہلے اور سب سے زیادہ وہ لوگ متاثر ہورہے ہیں جو اس بحران کے ذمہ دار سب سے کم ہیں۔ غطریس نے عالمی لیڈروں سے اپیل کی کہ وہ گرین ہاؤس گیسوں کے اخراج میں تیزی سے کمی لائیں، فوسل فیول سے صاف توانائی کی جانب منتقلی کی رفتار بڑھائیں اور موسمیاتی تبدیلی سے زیادہ متاثر ہونے والے کمزور ممالک کو مالی وسائل اور تحفظ فراہم کریں۔ ان کا کہنا تھا کہ محض خطرات کی نشاندہی کافی نہیں، بلکہ ان سے نمٹنے کے لیے عملی اقدامات ضروری ہیں۔ 
ماہرین کے نزدیک موجودہ صورت حال کا ایک اہم پہلو یہ ہے کہ ال نینو کے اثرات فوری طور پر ختم نہیں ہوں گے۔ اس کے باعث ۲۰۲۶ء کے آخری مہینوں میں عالمی درجۂ حرارت مزید بلند ہوسکتا ہے، جبکہ ۲۰۲۷ء میں بھی گرمی کے نئے ریکارڈ بننے کا خدشہ ہے۔ موسمیاتی تبدیلی اور قدرتی موسمیاتی اتار چڑھاؤ کے اس امتزاج سے زراعت، آبی ذخائر، صحت عامہ اور قدرتی ماحول پر دباؤ بڑھ سکتا ہے۔ ایسے میں پیشگی موسمیاتی پیش گوئی، آفات سے نمٹنے کی تیاری اور اخراج میں کمی کے اقدامات کو عالمی سطح پر مزید اہمیت حاصل ہوگئی ہے۔