سری نگر کی این آئی اے کی خصوصی عدالت نے کشمیر سے تعلق رکھنے والے تین افراد، جو امریکہ اور جرمنی میں مقیم ہیں، کو سوشل میڈیا کے مبینہ غلط استعمال کے ایک مقدمے میں جنوری کے آخر تک عدالت میں پیش ہونے کا حکم دیا ہے۔ جموں کشمیر پولیس کے مطابق ان پر الزام ہے کہ وہ سوشل میڈیا کو تشدد بھڑکانے، امن و امان خراب کرنے اور علاحدگی پسند ایجنڈے کو فروغ دینے کیلئے استعمال کر رہے تھے۔

سری نگر کی ایک خصوصی این آئی اے عدالت نے کشمیر سے تعلق رکھنے والے تین افراد کے خلاف اشتہارِ ا علان (پروکلیمیشن) جاری کیا ہے، جو اس وقت امریکہ اور جرمنی میں مقیم ہیں۔ عدالت نے انہیں جنوری کے آخر تک پیش ہونے کی ہدایت دی ہے۔ جموں و کشمیر پولیس کے مطابق ان افراد پر سوشل میڈیا پلیٹ فارمز کو مبینہ طور پر ’ہتھیار‘ کے طور پر استعمال کرنے کا الزام ہے، تاکہ سڑکوں پر تشدد بھڑکایا جا سکے، معمولاتِ زندگی کو درہم برہم کیا جا سکے، عوامی املاک کو نقصان پہنچایا جا سکے، امن و امان کو خراب کیا جا سکے اور بڑے پیمانے پر بے چینی پھیلائی جا سکے۔ 

PHOTO | The Special NIA Court in Srinagar has issued a proclamation under Section 82 CrPC against accused in a CIK case for anti-national propaganda. The case involves allegations of spreading fake and secessionist content through social media to incite unrest. The accused have… pic.twitter.com/moP4N8ldG3

— Press Trust of India (@PTI_News) December 30, 2025

مبین احمد شاہ اور عزیز الحسن عشائی، جنہیں ٹونی عشائی کے نام سے بھی جانا جاتا ہے (دونوں سری نگر سے تعلق رکھتے ہیں )، اور کوپواڑہ کے رہائشی رفعت وانی کو ایف آئی آر میں نامزد کیا گیا ہے۔ کاؤنٹر انٹیلی جنس کشمیر (CIK)، جو جموں کشمیر پولیس کا انٹیلی جنس ونگ ہے، نے ایک بیان میں کہا کہ شاہ اور عشائی امریکہ میں مقیم ہیں جبکہ رفعت وانی جرمنی میں مقیم ہے۔ سی آئی کے کے بیان میں کہا گیا:’’این آئی اے ایکٹ کے تحت نامزد خصوصی جج کی عدالت، سری نگر، نے ملزمان کے خلاف ضابطۂ فوجداری۱۹۷۳ء کی دفعہ۸۲؍ کے تحت پروکلیمیشن جاری کی ہے۔‘‘

یہ بھی پڑھئے: مغربی بنگال میں بیان بازی تیز، امیت شاہ کو ممتا بنرجی کا جواب

یہ کیس تعزیراتِ ہند کی دفعات۱۵۳-اے اور۵۰۵؍ اور غیر قانونی سرگرمیاں (انسداد) ایکٹ (UAPA) کی دفعہ ۱۳؍ کے تحت درج کیا گیا ہے۔ حکام کے مطابق یہ مقدمہ ’قابلِ اعتماد انٹیلی جنس معلومات‘ کی بنیاد پر درج کیا گیا، جن سے یہ انکشاف ہوا کہ وادی کے اندر اور باہر سرگرم’غیر سماجی اور ملک دشمن عناصر‘ علاحدگی پسند قوتوں کے اشارے پر ایک منظم سازش کے تحت کام کر رہے تھے۔ سی آئی کے نے مزید کہا:’’تحقیقات سے یہ بات سامنے آئی ہے کہ یہ عناصر خود کو نیوز پورٹلز، صحافیوں اور فری لانسرز کے طور پر ظاہر کر رہے تھے، جبکہ حقیقت میں وہ فیس بک، ایکس اور وہاٹس ایپ جیسے سوشل میڈیا پلیٹ فارمز کو استعمال کر کے جعلی، گمراہ کن، مبالغہ آمیز، علاحدگی پسند اور سیاق و سباق سے ہٹ کر مواد تیار، اپ لوڈ اور پھیلانے میں مصروف تھے۔‘‘

یہ بھی پڑھئے: ’’ہم نے بھروسہ کیا مگربی جے پی نے دھوکہ دیا‘‘

وادی کی پولیس کے مطابق اس ڈجیٹل غلط معلوماتی مہم کا جان بوجھ کر مقصد یہ تھا کہ سڑکوں پر تشدد بھڑکایا جائے، معمولاتِ زندگی کو متاثر کیا جائے، عوامی املاک کو نقصان پہنچایا جائے، امن و امان کو خراب کیا جائے اور بڑے پیمانے پر بے چینی پیدا کی جائے، تاکہ ہندوستان کے خلاف نفرت کو فروغ دیا جا سکے اور ایک علاحدگی پسند ایجنڈے کو آگے بڑھایا جا سکے جس کا مقصد یونین آف انڈیا کے خلاف بددلی پیدا کرنا ہے۔ پولیس نے مزید کہا:’’اشتہاری قرار دیئے جانے کے باوجود یہ ملزمان اپنی دشمنانہ سرگرمیاں جاری رکھے ہوئے ہیں اور سوشل میڈیا پلیٹ فارمز پر انتہائی سرگرم ہیں، جہاں وہ بڑے پیمانے پر تشدد بھڑکانے اور جموں و کشمیر میں امن و امان کو غیر مستحکم کرنے کی نیت سے جھوٹا، من گھڑت اور اشتعال انگیز مواد پھیلا رہے ہیں۔ ‘‘