اندھیری (مغرب) میں بیسٹ کی ۴؍ بسیں روٹ نمبر ۲۵۱؍ سے ٹکرا گئیں۔

اندھیری (مغرب) میں بیسٹ کی ۴؍ بسیں روٹ نمبر ۲۵۱؍ سے ٹکرا گئیں ۔ یہ حادثہ ۱۴؍ مئی جمعرات کی دوپہر ایک بجکر ۱۵؍منٹ پر امبولی ،ایس وی روڈ پرپیش آیا۔

اس حادثے میں شدید طورپرزخمی ہونے والے کنڈکٹر شیکھر بابو راؤت (۵۲)کی موت ہوگئی۔ حادثے کے فوری بعد اسے کوپر اسپتال لے جایاگیایہاں ڈاکٹرشوبھنکر نے معائنہ کیااور علاج شروع کرنے سے قبل ہی مردہ قرار دے دیا۔ جس کنڈکٹر کی موت ہوئی وہ ٹکرانے والی۲۵۱؍ بس کا کنڈکٹر نہیں تھا بلکہ پہلے سے کھڑی بس سے نیچے اترا تھا اور وہ بس کی زد میں آگیا۔ حادثے کاشکار ہونے والی بس کا ڈرائیور اورکنڈکٹر دونوں بیسٹ کے ملازم ہیں ۔

یہ بھی پڑھئے: ہائی سیکوریٹی نمبر پلیٹ نہ ہونے پر یکم جولائی سے جرمانہ عائد ہو گا

بیسٹ میں اپنی نوعیت کا یہ پہلا حادثہ ہےجب ایک ساتھ ۴؍بسیں ٹکرائیں ۔ ٹکرانے والی بسوں میں روٹس نمبر ۲۵۱؍ ۲۶۶؍ ۲۴۲؍ اور۲۴۹؍کی بسیں شامل ہیں ۔

اس تعلق سے بیسٹ میں رابطہ قائم کرنے پر بتایا گیا کہ معلوم کیا جارہا ہے کہ اگردرخت گرنے کے سبب بسیں پہلے سے کھڑی تھیں تو یہ بس کس طرح ان بسو ں سے ٹکرا گئی ، کیا کنٹرول کھودیا تھا یا کوئی اورمسئلہ پیدا ہوگیا تھا ۔ اس کے علاوہ یہ بھی بتایا گیا چونکہ کنڈکٹر بیسٹ کاملازم تھا اورڈیوٹی کےدوران اس کی موت ہوئی ہے اس لئے معاوضے کے علاوہ بیسٹ کے ضابطے کے مطابق اہل خانہ میں سے بیوی یا بالغ بیٹی یا بیٹے کو ملازمت دی جائے گی۔ یہ تفصیلات بیسٹ کے پی آر اودتا تریہ ڈگاڈےنےنمائندۂ انقلاب کے استفسار پر مہیا کرائیں ۔