بی جے پی لیڈروں نے خواتین ریزرویشن پر وزیراعظم کے خطاب کا دفاع کیا مگر اپوزیشن نے انتخابی ضابطہ ٔ اخلاق کی خلاف ورزی قراردیا، الیکشن کمیشن میں شکایت۔

خواتین ریزرویشن  کےنام پر لوک سبھا کی سیٹیں  بڑھانے کیلئے پیش کئے گئے آئینی ترمیمی  بل کو پاس کرانے میں ناکامی کے بعد سنیچر کو کیاگیا  وزیراعظم نریندر مودی کا ’’قوم کے نام خطاب‘‘   ملک بھر میں   موضوع بحث بن گیا ہے۔   اپوزیشن اور ملک کے دانشور طبقہ نے ’’انتخابی تشہیر‘‘، سرکاری مشنری کا غلط استعمال  اور انتخابی ضابطہ اخلاق کی کھلی خلاف ورزی قراردیا ہےجبکہ بی جے پی  اوراس کے لیڈروں  نے مودی کو ’’خواتین کے حقوق کا چمپئن‘‘ بنا کر پیش کرتے ہوئے  دفاع کیا ہے۔   

مغربی بنگال کی وزیر اعلیٰ ممتا بنرجی نے اتوار کے روز وزیر اعظم نریندر مودی پر سخت حملہ کرتے ہوئے الزام لگایا کہ وہ سیاسی فائدے کے لیے سرکاری نظام کا غلط استعمال کر رہے ہیں۔ انہوں نے کہا کہ حالیہ دنوں میں وزیر اعظم کا قوم سے خطاب دراصل انتخابی مہم کا حصہ تھا، جسے سرکاری پلیٹ فارم کے ذریعے پیش کیا گیا۔

یہ بھی پڑھئے: اکولہ کے ایڈیشنل ڈسٹرکٹ کلکٹر ہفتہ وصولی کے الزام میں معطل

’’غیر قانونی انتخابی مہم، ضابطہ اخلاق کی خلاف ورزی‘‘

بنگال میں ہگلی ضلع کے تارکیشور میں ایک انتخابی جلسے سے خطاب کرتے ہوئے ممتا بنرجی نے خواتین ریزرویشن پر  وزیراعظم نریندر مودی کے قوم کے نام خطاب کو ’’غیر قانونی انتخابی مہم‘‘  اورانتخابی ضابطہ اخلاق کی خلاف ورزی قرار دیا۔  انہوں نے کہا کہ ’’انہوں نے سیاسی مہم کیلئے حکومت کی مشنری کا غلط استعمال کیا۔ ہم اس کی مذمت کرتے ہیں اور اس کے خلاف شکایت درج کرائیں گے۔‘‘

بی جے پی کو ممتا بنرجی کا منہ توڑ جواب

خواتین کو بااختیار بنانے  کے نام پر وزیراعظم کے دعوؤں کا سخت جواب دینے کے ساتھ ہی ممتا بنرجی نے انہیں   کھلا چیلنج بھی دیا ہے۔  بنگال کی وزیراعلیٰ نے وزیراعظم کے ’’قوم کے نام خطاب‘‘ کا منہ توڑ جواب دیتے ہوئے کہا کہ ’’لوک سبھا میں ہمارے اراکین کی تعداد میں خواتین  ۳۷ء۹؍  فیصد ہیں۔ راجیہ سبھا میں یہ فیصد ۴۶؍ ہے۔ ‘‘ انہوں نے  وزیراعظم  مودی کے اس دعویٰ کو دروغ گوئی قرار دیا کہ اپوزیشن  نے ۳۳؍ فیصد خواتین ریزرویشن کا راستہ روک دیا ہے اور کہا کہ ٹی ایم سی من مانے طریقے سے پارلیمنٹ کی سیٹیں بڑھانے کے خلاف ہے۔ 

یہ بھی پڑھئے: پونے ایئر پورٹ پر حادثے کے سبب گھنٹوں تک پروازیں معطل رہیں

۲۹؍ منٹ میں ۵۸؍ بار کانگریس کا ذکر

   کانگریس صدر ملکارجن کھرگے نے   اپنےسخت رد عمل  میں کہا ہے کہ ’’ وزیر اعظم نے ایک سرکاری خطاب کو سیاسی تقریر میں تبدیل کر دیا، جس میں الزامات تراشی اور جھوٹے دعوے کیے گئے۔‘‘ انہوں نے الزام لگایا کہ انتخابی ضابطہ ٔ  اخلاق نافذ ہونے کے باوجود وزیر اعظم نے سرکاری مشینری کا غلط استعمال کرتے ہوئے اپوزیشن، خصوصاً کانگریس کو نشانہ بنایا، جو جمہوریت اور آئین کے خلاف ہے۔ کانگریس صدر نے نشاندہی کی کہ ۲۹؍ منٹ کے اپنے خطاب میں  وزیراعظم نے  ۵۹؍ بار کانگریس کا ذکر کیا جبکہ خواتین کا ذکر برائے نام تھا جو اُن کی ترجیحات کو بیان کرتا ہے۔ 

 منوج جھا نےبھی سوال اٹھایا

راجیہ سبھا کے  رکن اور آر جے ڈی کے قومی ترجمان منوج کمار جھا نے وزیر اعظم نریندر مودی کے’’قوم سے خطاب‘‘پر الیکشن کمیشن کو مخاطب کیا۔ سوشل میڈیا پوسٹ میں  انہوں نے چیف الیکشن کمشنر گیانیش کمار کو ٹیگ کرکے لکھا ہے کہ ’’گیانیش جی، ہو سکتا ہے آپ اتفاق نہ کریں، لیکن روایت کو مدنظر رکھتے ہوئے، میں ایک درخواست کرنا چاہوں گا۔ ہمارے معزز وزیر اعظم کا  ’قوم سے خطاب‘ انتخابی تقریر نظر آیا، اس لیے میری عاجزانہ درخواست ہے کہ اسے ان کے انتخابی اخراجات میں شامل کیا جائے۔‘‘

 ہندوستانی سیاست میں نئی پستی: کپل سبل

کپل سبل نے سنیچر کو وزیراعظم خطاب مکمل ہوتے ہی  جاری کئے گئے ایک بیان میں اسے ہندوستانی سیاست کی نئی پستی سے تعبیرکیا۔ اس افسوس کے ساتھ کہ’’میں جانتا ہوں کہ الیکشن کمیشن یا کوئی ادارہ کچھ نہیں کرےگا۔‘‘ وزیراعظم  کے ذریعہ انتخابی ضابطہ اخلاق کی بار بار  خلاف ورزی   کئے جانے کا حوالہ دیتے ہوئے سبل نے دردمندی کے ساتھ کہا کہ ’’میں اپنے وزیراعظم سے بس اتنا کہنا چاہتا ہوں کہ آپ نے دفتر وزیراعظم کو اتنی پستی میں کیوں پہنچا دیا۔ ماضی میں کبھی کسی وزیراعظم نے ایسا نہیں کیا۔ آپ الیکشن جیت سکتے ہیں مگر ادارے کو تباہ نہ کریں۔‘‘

یہ بھی پڑھئے: پیارے خان کے بیان پر نونیت رانا بھڑک اٹھیں، اشتعال انگیز الزامات