ایک رپورٹ میں اس بات کا جائزہ لیا گیا کہ کس طرح اے آئی کمپنیاں روبوٹس کو تربیت دینے کیلئے لوگوں کو روزمرہ کے جسمانی کام انجام دیتے ہوئے خود کو ریکارڈ کرنے کے پیسے دے رہی ہیں۔ جرمن اسٹارٹ اپ مائیکرو اے جی آئی (Microagi) کے ڈیٹا اکٹھا کرنے والے بازو، شفٹ (Shift) نے پرائیویٹ شیف الیسر دمیر کو کیمرے سے لیس ٹوپی پہن کر کھانا پکانے کیلئے ان کی معمول کی ۱۰۰ سے ۱۵۰ ڈالر فی کس کی شرح پیش کی۔ اینکورڈ (Encord) کے ونیت ویلموروگن کے مطابق، روبوٹ ٹریننگ ڈیٹا کی طلب ایک سال پہلے کے مقابلے میں تقریباً دس گنا زیادہ ہو چکی ہے۔

اے آئی کمپنیاں پہلے ہی عوامی ویب سائٹس کا بیشتر حصہ چھان چکی ہیں۔ اب وہ اس سے بھی زیادہ قیمتی چیز کے پیچھے ہیں۔ رپورٹس کے مطابق، اب اے آئی کمپنیاں ایسے ڈیٹا کی تلاش میں ہے جو یہ ظاہر کرے کہ انسان درحقیقت کام کیسے کرتے ہیں۔ بزنس انسائیڈر کی نئی سیریز، ’دی اے آئی ڈیٹا گریب‘ (The AI Data Grab) کا مرکزی موضوع ہے، جس نے رواں ہفتے کام کی جگہ کے ڈیٹا کے حصول کی تیز ہوتی دوڑ پر تین مضامین شائع کئے ہیں۔ مجموعی طور پر، یہ تینوں رپورٹس بتاتی ہیں کہ اے آئی کی ترقی اب محض بڑے ماڈلز اور تیز رفتار چپس سے آگے بڑھ کر یہ سمجھنے کی جانب گامزن ہے کہ درحقیقت کام کیسے انجام پاتا ہے، جس نے حقیقی دنیا میں انسانوں کے کام کرنے کے طریقوں کو اے آئی سسٹمز کی اگلی نسل کیلئے ایک اہم خام مال کی حیثیت دے دی ہے۔

یہ بھی پڑھئے: انتھروپک کا انتباہ: اے آئی ماڈلز ۲۰۲۶ء کے اختتام تک انٹرنیٹ پر اپنی کاپیاں خود بنانے کے قابل ہوگے

لاء فرمیں دہائیوں کی مہارت کو اے آئی سسٹمز میں تبدیل کر رہی ہیں

بڑی قانونی فرمیں عام ٹولز کے مقابلے برتری حاصل کرنے کی امید پر اپنے سودوں کی تاریخ، عدالتی کارروائی کی حکمتِ عملیوں اور مؤکلین سے متعلق معلومات کے گرد اے آئی سسٹمز تیار کر رہی ہیں۔ کرکلینڈ اینڈ ایلس نے اپنے پرائیویٹ ایکویٹی ایڈوائزری کاروبار کیلئے ٹیکنالوجی تیار کرنے کی خاطر پلانٹیر کو ۵۰۰ ملین ڈالر ادا کرنے پر اتفاق کیا، جبکہ لیتھم اینڈ واٹکنز نے لارج لینگویج ماڈلز کو اپنی ضرورت کے مطابق ڈھالنے کیلئے اپنے ذاتی اینویڈیا (Nvidia) سرورز خریدے۔ امریکہ کی سب سے بڑی پرسنل انجری فرم، مورگن اینڈ مورگن، میں وکلاء کیس کے پیٹرنز پر تربیت یافتہ اندرونی اے آئی ماڈل استعمال کرتے ہیں؛ فرم نے اس کوشش کیلئے اگلی دہائی میں ایک ارب ڈالر لگانے کا عزم کیا ہے۔ چیف ٹرانسفارمیشن آفیسر یتھ اتھایاکمار نے کہا کہ ”ہمارے پاس کسی بھی دوسرے ادارے سے زیادہ ڈیٹا موجود ہے۔“ انہوں نے مزید کہا کہ فرم کو ”اس کا بہترین نگہبان بننا چاہئے۔“ ہاروی، لیکسس نیکسس اور تھامسن رائٹرز بھی فرموں کے اپنے ڈیٹا پر مبنی ماڈلز تیار کرنے کی جانب بڑھ رہے ہیں، جہاں لیکسس نیکسس کے گلوبل لیگل چیف شان فٹزپیٹرک کا کہنا ہے کہ لاء فرموں نے خود اس تبدیلی کی درخواست کی تھی۔

یہ بھی پڑھئے: اےآئی محققین تمباکو نوشی کررہے ہیں، انہیں یقین ہےکہ اےآئی کینسر کا علاج ڈھونڈ لےگا: پلانٹیر سی ٹی او

اے آئی لیبز سلیک پیغامات اور اندرونی دستاویزات کیلئے بھاری ادائیگیاں کر رہی ہیں

تحقیقات سے معلوم ہوا ہے کہ اے آئی لیبز کاروباری اداروں کو غیر شناخت شدہ سلیک (Slack) پیغامات، ای میلز اور اندرونی دستاویزات کے بدلے ۶ اور ۷ ہندسوں پر مشتمل رقوم پیش کر رہی ہیں، جن کے ساتھ اکثر ۴۸ گھنٹوں کی میعاد والی ”ایکسپلوڈنگ آفرز“ ہوتی ہیں۔ ڈیٹا بروکر فرم Mode.Inc کے سی ای او ڈین نووائس نے بتایا کہ ”اس وقت مانگ انتہائی غیر معمولی حد تک بڑھ چکی ہے۔“ گارٹنر کے مطابق، اے آئی ٹریننگ ڈیٹا پر سالانہ اخراجات گزشتہ سال کے ایک ارب ڈالر سے کم کے مقابلے میں ۲۰۲۷ء تک بڑھ کر تقریباً ۵ء۶ ارب ڈالر ہونے کی پیش گوئی ہے۔ اس رجحان کا ایک تاریک رخ بھی ہے: جب ملازمین کے کام کی جگہ کا ڈیٹا فروخت کیا جاتا ہے تو انہیں شاذ و نادر ہی اس کا علم ہوتا ہے یا اس سے کوئی فائدہ ملتا ہے۔ اسپرنگ شاٹ کے سی ای او ڈوگ کروزکیمپ نے کہا کہ انہیں میڈیا کے ذریعے ۴۸ گھنٹے سے بھی کم وقت کے نوٹس پر معلوم ہوا کہ گوگل نے ان کی کمپنی کا ڈیٹا خرید لیا ہے۔ ایموری یونیورسٹی کی قانون کی پروفیسر افیوما اجونوا نے متنبہ کیا کہ وفاقی پرائیویسی قوانین کی عدم موجودگی کے باعث یہ عمل رضامندی کے ایسے سوالات کو جنم دیتا ہے جن کا کوئی حل ابھی تک نہیں نکالا گیا۔

یہ بھی پڑھئے: اے آئی ماڈلز پر آنکھ بند کرکے بھروسہ نہ کریں : ستیہ نڈیلا

کمپنیوں کی جانب سے روبوٹس کو جسمانی کام سکھانے کیلئے ورکرز کو ادائیگیاں

ایک تیسری رپورٹ میں اس بات کا جائزہ لیا گیا کہ کس طرح اے آئی کمپنیاں روبوٹس کو تربیت دینے کیلئے لوگوں کو روزمرہ کے جسمانی کام انجام دیتے ہوئے خود کو ریکارڈ کرنے کے پیسے دے رہی ہیں۔ جرمن اسٹارٹ اپ مائیکرو اے جی آئی (Microagi) کے ڈیٹا اکٹھا کرنے والے بازو، شفٹ (Shift) نے پرائیویٹ شیف الیسر دمیر کو کیمرے سے لیس ٹوپی پہن کر کھانا پکانے کیلئے ان کی معمول کی ۱۰۰ سے ۱۵۰ ڈالر فی کس کی شرح پیش کی۔ دمیر نے کہا کہ ”جب سے میں نے یہ کام شروع کیا ہے، میں لوگوں کو کھانا کھلا رہا ہوں۔ اب میں اے آئی کو بھی فیڈ کر رہا ہوں۔“ اینکورڈ (Encord) کے ونیت ویلموروگن کے مطابق، روبوٹ ٹریننگ ڈیٹا کی طلب ایک سال پہلے کے مقابلے میں تقریباً دس گنا زیادہ ہو چکی ہے، جہاں کلائنٹس اب ایک ہزار گھنٹوں کے بجائے ایک لاکھ گھنٹوں تک کی تشریح شدہ فوٹیج کی درخواست کر رہے ہیں۔ پچ بک (PitchBook) کے مطابق، روبوٹکس کمپنیوں نے رواں سال کی پہلی ششماہی میں عالمی سطح پر ۴ء۳۳ ارب ڈالر اکٹھے کئے، جس نے ۲۰۲۵ء کے پورے سال کے ۷ء۲۸ ارب ڈالر کو پیچھے چھوڑ دیا۔