برہن ممبئی میونسپل کارپوریشن ( بی ایم سی )کی کمشنر اور پرنسپل مردم شماری افسر اشوینی بھڈے نے کہا کہ مردم شماری۲۰۲۷ءکے دوسرے مرحلے کے تحت برہن ممبئی میونسپل کارپوریشن (بی ایم سی) کے علاقے میں مکانات کی فہرست اور مردم شماری کا عمل ۱۶؍ مئی ۲۰۲۶ء سے شروع ہورہا ہے۔

برہن ممبئی میونسپل کارپوریشن (بی ایم سی)کی کمشنر اور پرنسپل مردم شماری افسر اشوینی بھڈے نے کہا کہ مردم شماری۲۰۲۷ءکے دوسرے مرحلے کے تحت برہن ممبئی میونسپل کارپوریشن (بی ایم سی) کے علاقے میں مکانات کی فہرست اور مردم شماری کا عمل ۱۶؍ مئی ۲۰۲۶ء سے شروع ہورہا ہے۔ یہ مہم۱۴؍ جون ۲۰۲۶ء تک چلائی جائے گی۔ اس دوران مقرر کردہ مردم شماری کرنے والے گھروں کا دورہ کریں گے اور ضروری معلومات اکٹھی کریں گے۔ مردم شماری کرنے والے عملہ کے گھر کے دورے کے دوران شہریوں کو چاہئے کہ وہ انہیں درست اور مکمل معلومات فراہم کر کے تعاون کریں۔ اس کے علاوہ، جن شہریوں نے خود اندراج کرایا ہے، وہ گنتی کرنے والوں کو اپنا خود شماری نمبر(ایس ای آئی ڈی) فراہم کریں۔ افسر نے شہریوں سے گھروں کی فہرست اور مردم شماری مہم میں بڑھ چڑھ کر حصہ لینے کی اپیل بھی کی ہے۔انہوںنے مزید کہا کہ مردم شماری ایک انتہائی اہم عمل ہے جو ملکی ترقی کی سمت کا تعین کرتا ہے۔ درست معلومات کی بنیاد پر حکومت مناسب منصوبہ بندی کر سکتی ہے اور ترقیاتی منصوبوں کو موثر طریقے سے شہریوں تک پہنچا سکتی ہے لہٰذا ہر شہری کو اپنی ذمہ داری کو سمجھنا چاہئے۔  دیانتدارانہ اور درست معلومات فراہم کرتے ہوئے مردم شماری ۲۰۲۷ءمیں بڑھ چڑھ کر حصہ لینا چاہئے۔

یہ بھی پڑھئے: شدید گرمی سے سبزیوں کی قیمتوں میں غیرمعمولی اضافہ

مردم شماری کی اہمیت

گھروں کی رجسٹریشن اور گھروںکی شماری مردم شماری کے بنیادی اور انتہائی اہم مراحل ہیں جس میں مکانات کی تعداد، خاندان کے افراد کے بارے میں معلومات اور دستیاب بنیادی سہولیات کو درج کیا جاتا ہے۔ اس معلومات کی بنیاد ہی پر حکومت مختلف ترقیاتی منصوبوں، بنیادی ڈھانچے، صحت، تعلیم، اور سماجی بہبود کے منصوبوں کو مؤثر طریقے سے نافذ کرتی ہے۔ اس لئے اشوینی بھڈے نے کہا ہے کہ ہر شہری کیلئے ضروری ہے کہ وہ اپنی ذمہ داری سے آگاہ ہوں اور اس عمل میں بڑھ چڑھ کر حصہ لیں۔مردم شماری کیلئے جمع کی گئی تمام معلومات کو مکمل طور پر خفیہ رکھا جاتا ہے اور صرف حکومتی منصوبہ بندی کیلئے استعمال کیا جاتا ہے۔ شہریوں کو چاہئےکہ وہ اعتماد کے ساتھ اورکسی جھجک کے بغیر درست معلومات فراہم کریں۔ 

اشوینی بھڈے نے اس یقین کا بھی اظہار کیا ہے کہ شہر اور ملک کی ترقی کیلئے شہریوں کا تعاون اہم ہوگا۔