۲۱؍میں سے ۱۵؍غیر حاضر رہنے والے ملازمین کو وجہ بتاؤ نوٹس۔

یہاں صفائی ملازمین کی غیر حاضری اور وقت سے پہلے ڈیوٹی چھوڑنے کی مسلسل شکایات کے بعد  میونسپل کمشنر انمول ساگر محکمۂ صحت کے صفائی ملازمین کے کیبن میں اچانک پہنچ گئے۔ معائنے کے دوران ۲۱؍ میں سے ۱۵؍صفائی ملازمین بغیر اجازت غیر حاضر پائے گئے، جس پر کمشنر نے سخت برہمی کا اظہار کرتے ہوئے تمام غیر حاضر ملازمین کو وجہ بتاؤ نوٹس جاری کرنے اور متعلقہ صفائی انسپکٹر کے خلاف محکمہ جاتی کارروائی شروع کرنے کے احکامات دئیے۔

یہ بھی پڑھئے: بھیونڈی: غیر منظور شدہ۵؍ اسکولوں کے خلاف شکایت درج

ذرائع کے مطابق انتظامیہ کو کافی عرصے سے شکایات موصول ہو رہی تھیں کہ بعض صفائی ملازمین باقاعدگی سے ڈیوٹی پر حاضر نہیں ہوتے، جبکہ کئی ملازمین حاضری درج کرانے کے بعد مقررہ وقت سے پہلے ہی اپنی ڈیوٹی ختم کرکے چلے جاتے ہیں۔ عوامی نمائندوں اور شہریوں نے بھی اس سلسلے میں سخت کارروائی کا مطالبہ کیا تھا۔ 

کمشنر کی اس اچانک کارروائی کے بعد محکمۂ صفائی میں کھلبلی مچ گئی ہے۔ میونسپل انتظامیہ نے واضح کیا ہے کہ شہریوں کو بہتر صفائی کی سہولت فراہم کرنے کے لئے ملازمین کی حاضری اور کارکردگی پر مسلسل نظر رکھی جائے گی اور فرائض میں غفلت برتنے والوں کے خلاف بلاامتیاز سخت کارروائی جاری رہے گی۔