کولکاتا ہائی کورٹ نے ایک تبصرے میں کہا کہ موجودہ رفتار سے بنگال میں ایس آئی آر ٹریبونل کو تمام عرضی نمٹانے کیلئے۲۱ ؍ سال درکار ہوں گے، عدالت نے یہ زبانی مشاہدہ اس شخص کے مقدمے کی سماعت کے دوران کیا جس کی پاسپورٹ درخواست اس لیے زیر التوا تھی کیونکہ اس کا نام انتخابی فہرستوں سے خارج کر دیا گیا تھا۔

 ٹائمز آف انڈیا کی رپورٹ کے مطابق کولکاتا ہائی کورٹ نے بدھ کو زبانی طور پر تبصرہ کیا کہ خصوصی نظرثانی (ایس آئی آر) کے عمل کے تحت قائم اپیل  ٹریبونل موجودہ رفتار سے کام کرتے رہے توووٹرکی حذف شدگی کے خلاف زیر التوا تمام اپیلیں نمٹانے میں۲۱؍ سال لگیں گے ۔عدالت نے یہ زبانی مشاہدہ اس شخص کے مقدمے کی سماعت کے دوران کیا جس کی فوری پاسپورٹ کے لیے درخواست زیر التوا تھی کیونکہ اس کا نام انتخابی فہرستوں سے ہٹا دیا گیا تھا۔ بنچ نے حکام کو پاسپورٹ درخواست پر کارروائی کرنے کی ہدایت دینے سے انکار کر دیا، تاہم خصوصی سخت نظرثانی کے مقدمات سننے والے اپیل ٹریبونل کو ہدایت دی کہ وہ اس کی اپیل کی سماعت تیز کرے۔بعد ازاں  جسٹس کوشک چندا نے اس شخص کو بتایاکہ جب تک آپ کو ہندوستان کا شہری قرار نہیں دیا جاتا، آپ کو پاسپورٹ نہیں دیا جا سکتا۔

یہ بھی پڑھئے: قبول ِاسلام پر ریزرویشن سے محرومی کے فیصلے کیخلاف سپریم کورٹ میں پٹیشن

واضح رہے کہ درخواست گزار، سراج لشیخ، جو کوچ بہار کا رہائشی ہے، نےاس وقت عدالت کا رخ کیا جب اس کی پاسپورٹ درخواست پولیس تصدیق کے دوران روک دی گئی تھی کیونکہ اس کا الیکٹورل فوٹو آئی ڈی کارڈ نمبر اس کا نام انتخابی فہرست سے خارج ہونے کے بعد ناجائز ہو گیا تھا۔اس نے عدالت کو بتایا کہ اسے معدے کی بیماری کے لیے بیرون ملک طبی علاج کروانے کے لیے پاسپورٹ کی ضرورت ہے۔سماعت کے دوران، درخواست گزار کے وکیل نے استدلال کیا کہ ووٹر آئی ڈی کارڈ ۱۹۶۷ءکے پاسپورٹ ایکٹ یا ۱۹۸۰ءکے پاسپورٹ قواعد کے تحت لازمی دستاویز نہیں ہے جہاں شناخت، پتہ اور تاریخ پیدائش بصورت دیگر ثابت ہو۔وکیل نے یہ بھی استدلال کیا کہ ووٹر آئی ڈی کارڈ شہریت کا ثبوت نہیں ہے اور کہا کہ سپریم کورٹ نے ایک الگ مقدمے میں فیصلہ دیا تھا کہ ووٹر رول کی نظرثانی کے عمل کے دوران انتخابی فہرست سے حذف ہونا غیر ملکی ہونے کا تعین نہیں ہے۔یہ مقدمہ ان دنوں سامنے آیا ہے جب دی ٹیلی گراف کے سابق ایڈیٹر آر راجگوپال کو ان کا تجدید شدہ پاسپورٹ  مہینوں بعد  ملا،کیونکہ ان کا نام انتخابی فہرست سے خارج کیا جا چکا تھا۔

یہ بھی پڑھئے: ۸۶؍لاکھ طلبہ نے سرکاری اسکولوں کو خیر باد کہہ دیا! وزارت تعلیم کی رپورٹ

ذہن نشین رہے کہ مغربی بنگال میں ووٹر رول کی خصوصی نظرثانی اپریل میں اسمبلی انتخابات سے قبل کی گئی تھی۔فروری میں شائع ہونے والی حتمی فہرستوں میں ابتدائی طور پر۶۱؍ لاکھ سے زیادہ ووٹرز کو خارج کیا گیا تھا۔ جبکہ ۶؍ اپریل تک، تقریباً۹۱؍ لاکھ ووٹرز، جو نظرثانی کے عمل شروع ہونے سے قبل مغربی بنگال کی ووٹروں کی کل تعداد کا تقریباً۱۱؍ اعشاریہ ۹؍ فیصد تھے، کو انتخابی فہرستوں سے ہٹا دیا گیا تھا۔اسمبلی انتخابات سے قبل، مبینہ طور پر تقریباً ۳۴؍ لاکھ اپیلیں ٹریبونل کے سامنے زیر التوا تھیں۔ ان میں سے۲۷؍ لاکھ ان افراد کی طرف سے دائر کی گئی تھیں جو انتخابیفہرست سے خارج کیے گئے تھے۔تاہم خصوصی سخت نظرثانی کے عمل کے حصے کے طور پر قائم کیے گئے ٹریبونل نے ۱۶۰۷؍ ناموں کو انتخابی فہرست میں واپس شامل کرنے کی اجازت دی تھی۔

یہ بھی پڑھئے: ای ڈی نے ٹی ایم سی کے ۴۴۰؍ کروڑ روپے والے تین بینک کھاتے منجمد کر دیئے

بعد ازاں سپریم کورٹ نے خصوصی نظرثانی کی قانونی حیثیت کو برقرار رکھا، کہا کہ یہ مشق آزاد اور منصفانہ انتخابات کے آئینی تقاضے کو آگے بڑھاتی ہے۔تاہم، عدالت نے کہا کہ پول پینل کی کسی شخص کو ووٹر فہرست میں شامل کرنے کے مقصد کے لیے پوچھ تاچھ کا یہ مطلب نہیں ہے کہ وہ  کسی شخص کی شہریت کا فیصلہ کر سکتا ہے ۔جبکہ بدھ کو، وزارت خارجہ نے دوبارہ تاکید کی کہ پاسپورٹ سفری دستاویز ہے، شہریت کا ثبوت نہیں۔