سمندری طوفان دیتوا کے سبب ۳۰۰؍ ہندوستانی ۳؍ دنوں سے کولمبو میں پھنسے ہیں، جبکہ انہیں خوراک اور پانی کے بحران کا سامنا کرنا پڑرہا ہے، اس کے علاوہ بنیادی ضروریات کی مناسب دستیابی نہ ہونے کے برابر ہے، لوگ پریشان ہیں ،اور صورتحال کے بہتر ہونے کا انتظار کر رہے ہیں۔

طوفان دیتوا نے سری لنکا میں تباہی مچا دی ہے، جس کی وجہ سے گذشتہ کئی دنوں سے پروازوں کے عمل میں شدید خلل پڑا ہے۔ تیز ہواؤں اور بارشوں کی وجہ سے سری لنکا میں۱۲۳؍ افراد ہلاک ہو چکے ہیں اور بنیادی ڈھانچے کو بھی شدید  نقصان پہنچا ہے۔ خطرناک موسمی حالات کی وجہ سے انڈیگو ایئر لائنز نے کہا ہے کہ کولمبو، جافنا، پانڈیچری، توتوکورن، تریچی، چنئی اور مدورائی سے آنے اور جانے والی پروازیں متاثر ہو سکتی ہیں۔

یہ بھی پڑھئے: امریکہ نے افغان شہریوں کے ویزا اورپناہ گزینی سے متعلق درخواست پر روک لگائی

 تاہم، کولمبو میں تو پروازیں ڑان ہی نہیں بھر پا رہیں، جس کی وجہ سے ۳۰۰؍ ہندوستانیوں سمیت کئی مسافر پھنس گئے ہیں۔یہ مسافر گزشتہ تین دنوں سے کولمبو کے باندرانائیکے بین الاقوامی ہوائی اڈے پر پھنسے ہوئے ہیں، کیونکہ طوفان دیتوا کی وجہ سے چنئی کے لیے متعدد پروازیں منسوخ کر دی گئی ہیں۔ طوفان کی وجہ سے خوراک، پانی اور بنیادی ضروریات کی مناسب دستیابی نہ ہونے کے برابر ہے، لوگ پریشان ہیں کہ یہ صورتحال کب بہتر ہوگی۔ان۳۰۰؍ مسافروں میں۱۵۰؍ تامل ناڈو سے تعلق رکھتے ہیں جو دبئی سے سری لنکا کے راستے سفر کر رہے تھے۔ دریں اثناء تمل ناڈو کے وزیر اعلیٰ ایم کے اسٹالن نے عوامی محکمہ کے سکریٹری کو کولمبو میں ہندوستانی سفارت خانے کے ساتھ رابطہ کرنے کی ہدایت کی ہے۔ کولمبو ہوائی اڈے پر پھنسے تاملوں کے محفوظ واپس لوٹنے کو یقینی بنانے کے لیے اہلکاروں نے ہندوستانی ہائی کمیشن کے حکام کے ساتھ بات چیت کی ہے۔دوسری جانب ہندوستان نے آپریشن ساگر بندھو کے ذریعے سری لنکا کو انسان دوست امداد فراہم کی ہے۔ ہندوستانی فضائیہ کا ایک سی ۱۳۰؍جے طیارہ تقریباً۱۲؍ ٹن امدادی سامان لے کر کولمبو اترا ہے، جو ہندوستانی بحری جہاز وکرم اور ہندوستانی بحری جہاز اودے گری کے ذریعے بھیجی گئی پہلی امداد کے علاوہ ہے۔ ان میں طوفان سے متاثرہ خاندانوں کے لیے۴؍ اعشاریہ ۵؍ ٹن خشک راشن،۲؍ ٹن تازہ راشن، اور دیگر ضروری سامان شامل تھا۔

یہ بھی پڑھئے: نیپال: نقشہ کے ساتھ نیا کرنسی نوٹ جاری، ہندوستانی علاقے بھی شامل

بعد ازاں کولمبو میں ہندوستانی ہائی کمیشن نے ہمسایہ ملک کی مدد کے اپنے عزم کی تجدید کرتے ہوئے کہا کہ آپریشن ساگر بندھو فوری انسانی امداد اور آفات میں راحت فراہم کرتا رہے گا۔ ہائی کمیشن نے کہا، ’’اس مشکل گھڑی میں، ہندوستان ،سری لنکا کے عوام کے ساتھ کھڑا ہے اور اپنی ’’ پڑوسی پہلے‘‘  کی پالیسیپر عمل پیرا رہے گا۔‘‘واضح رہے کہ ہندوستانی موسمیاتی محکمے (IMD) نے کہا ہے کہ طوفان دیتوا  فی الحال سری لنکا اور جنوب مغربی خلیج بنگال کے قریب موجود ہے۔ توقع ہے کہ یہ۳۰؍ نومبر کی صبح تک شمالی تمل ناڈو-پانڈیچری کے ساحل کی طرف بڑھے گا۔آئی ایم ڈی نے تمل ناڈو، جنوبی آندھرا پردیش اور پانڈیچری میں انتہائی شدید بارش، تیز ہواؤں اور ممکنہ سیلاب کا انتباہ جاری کی ہے۔جیسے جیسے طوفان دیتوا قریب آ رہا ہے، تمل ناڈو کے ساحلی علاقوں میں سمندر میں بڑی لہریں اٹھ رہی ہیں اور تیز ہوائیں اور بارش ہو رہی ہے۔