جسٹس منی پشکرنا نے نجلی اسپتال میں منتقلی کی اجازت کیلئے داخل کی گئی سماعت کے دوران کہا کہ کورٹ کو’’وسیع تر صورتحال‘‘ کو بھی مدنظر رکھنا ہوگا۔ عدالت نے ’’ہر جان قیمتی ہے‘‘کہتے ہوئے  حکومت کی اس دلیل کو تسلیم کیا کہ سونم وانگ چک حراست میں نہیں ہیں اور ان کی اہلیہ، بھائی اور بہنوئی کو ان سے ملنے کی اجازت دی گئی ہے۔ عدالت نے حکومت کی اس اطلاع کو بھی ریکارڈ پر لیا کہ ان کے اہل خانہ کو الگ کمرہ فراہم کیا گیا ہے جہاں وہ ان کے ساتھ وقت گزار سکتے ہیں۔جج نے کہاکہ’’ان حالات کو دیکھتے ہوئے اس مرحلے پر کسی عبوری حکم کی ضرورت نہیں ہے۔‘‘

اپنی درخواست میں گیتانجلی انگمو نے کہاتھا کہ انہیں سرکاری اسپتال میں علاج پر ‘‘اعتماد نہیں‘‘، وہ چاہتی ہیں کہ شوہر کی حالت مزید بگڑنے سے پہلے انہیں اپنی پسند کے نجی اسپتال منتقل کریں۔  ان کے وکیل کپل سبل نے عدالت کو بتایا کہ وانگ چک کے ذاتی ڈاکٹروں اور وکلا کو ان تک رسائی نہیں دی جا رہی اور انہیں یہ بھی معلوم نہیں کہ ان کا کیا علاج ہورہاہے اور کون سی دوا دی جارہی ہے۔  گیتانجلی نے شکایت کی کہ  اسپتال میں پولیس کی بھاری نفری کی موجودگی کی وجہ سے خاندان کی نقل و حرکت بھی محدود ہو گئی ہے۔ انہوں نے بتایا کہ ’’جس منزلہ پر وانگ چک کو رکھاگیا ہے  اس پر تقریباً۳۰؍ اور  پورے اسپتال میں۱۰۰؍ سے زیادہ  پولیس اہلکار تعینات ہیںجس سے ہماری آمد و رفت شدید متاثر ہے۔ یہ طبی نگہداشت نہیں غیر قانونی حراست ہے۔ کسی بھی خاندان کو یہ فیصلہ کرنے کیلئے نظام سے لڑنے کی ضرورت نہیں پڑنی  چاہیے کہ اس کے عزیز کا علاج کہاں ہوگا۔‘‘تاہم کورٹ نے سرکاری موقف کی تائید کی اور اپنے  حکم میں کہاکہ’’عدالت کی رائے ہے کہ حکومت نے وانگ چک کی طبی حالت کے پیش نظر انہیں اسپتال منتقل کرنے کا فیصلہ کیا، جسے من مانا اقدام نہیں کہا جا سکتا۔‘‘ ہائی کورٹ نے کہاکہ’’یہ نہیں کہا جا سکتا کہ وانگ چک پر کسی قسم کا جبر کیا جا رہا ہے۔‘‘ اس کے ساتھ ہی کورٹ نے منگل کو اس معاملے کی اگلی شنوائی کافیصلہ کیا۔ 

یہ بھی پڑھئے: مولانا ارشد مدنی نے مسلمانوں کو نفرت کی آگ کو محبت سے بجھانے کی تلقین کی

 اسپتال   سے سونم کا پیغام، آزادی کی دوسری لڑائی قرار دیا 

نئی دہلی (ایجنسی):صفدر جنگ اسپتال منتقل کئے جانے کےبعد عوام کے نام اپنے پہلے پیغام میں سونم وانگ چک نے عوام سے  پیر۲۰؍جولائی کو پارلیمنٹ مارچ میں زیادہ سے زیادہ تعداد میں شرکت کی اپیل کی  ہے اوراسے ’’دوسری جنگ آزادی‘‘ قرار دیا ہے۔’’صفدر جنگ میں غیر قانونی حراست سے گیتانجلی کے ذریعہ‘‘ انہوں  نے ہاتھ سے لکھا جونوٹ بھیجا ہے اس میں ہندی اور انگریزی میں   یہ مختصر پیغام ہے کہ ’’ ۲۰؍ جولائی، آزادی کا دوسرا آندولن، خوف سے آزاد بھارت، نفرت سے آزاد  بھارت۔‘‘سونم وانگ چک نے مذکورہ نوٹ میں حالانکہ خود کو ’’غیرقانونی حراست میں‘‘ قرار دیا ہے مگر اتوار کو ہائی کورٹ نے اس کی تردید کی۔ 

  آئیسا کے کیمپ  کے قریب پولیس کی بھاری نفری 

 نئی دہلی (ایجنسی): اتوار کی شام کاکروچ جنتاپارٹی کی جانب سے ایک ہنگامی پیغام   میںبتایا گیا ہے کہ جنتر منتر پر بائیں محاذ کی طلبہ تنظیم آل انڈیا اسٹوڈنٹس  اسوسی ایشن (آئیسا) کے کیمپ کے قریب پولیس کی بھاری نفری تعینات کر دی گئی ہے۔ پیغام میں تمام کارکنوں کو  فوری طور پر  موقع پر پہنچنے کی ہدایت دی گئی۔ اس اطلاع کے بعد مظاہرہ گاہ میںکشیدگی کا ماحول پیدا ہو گیا اور مزید کارکن جنتر منتر پہنچنے لگے۔ اگرچہ خبر لکھے جانے تک پولیس اور مظاہرین کے درمیان کسی بڑے تصادم کی اطلاع نہیں ملی، تاہم پورے علاقے میں سیکوریٹی   سخت کر دی گئی  ہے اور اضافی پولیس اہلکار تعینات  ہیں۔ سیاسی حلقوں کی نظریں اب اس بات پر مرکوز ہیں کہ پولیس کی پابندی کے باوجود احتجاجی کارکن اپنے اعلان کے مطابق مارچ نکالنے میں کامیاب ہوتے ہیں یا نہیں۔

یہ بھی پڑھئے: وانگ چک کی جبری اسپتال منتقلی پر اپوزیشن حملہ آور

 شبانہ اعظمی، پرکاش راج، منیش سیسودیا، چندر شیکھر  اور مہوا موئترا جنتر منتر پہنچیں

  نئی دہلی (آئی این این ):   اتوار کو کئی اہم شخصیات نے جنتر منتر پر پہنچ کر ملک کے نوجوانوں کے ساتھ یکجہتی کا اظہار کیا۔  ان میں اداکارہ اور سماجی کارکن شبانہ اعظمی،  جنوبی ہند کے مقبول اداکار اور اپنی حق بیانی کیلئے مشہور پرکاش راج، رکن پارلیمنٹ چندر شیکھر آزاد، عام آدمی پارٹی کے لیڈر منیش سیسودیا اور ٹی ایم سی لیڈر مہوا موئترا شامل ہیں۔ پرکاش راج نے مظاہرہ گاہ سے اپنا ویڈیو پوسٹ کرتے ہوئے کہا ہے کہ ’’ملک کے نوجوان سوال پوچھ رہے ہیں۔‘‘ شبانہ اعظمی  نے ابھیجیت دپکے اور دیگر کارکنوں  سے ملاقات کرنے کے بعد کہا کہ وہ نوجوانوں کی حمایت کیلئے آئی ہیں۔ منیش سیسودیا نے  مظاہرہ گاہ کے حالات کی عکاسی کی اورکہا کہ ’’میں نے جنترمنتر پر صرف عوام کا غصہ نہیں دیکھا  بلکہ ایک دوسرے کے ساتھ کھڑے ہوئے ہندوستان کو دیکھا جہاں  لوگ خود گرمی کو جھیل کر دوسروں کو پنکھا جھل رہے ہیں۔‘‘ چندر شیکھرآزاد رات  ۲؍ بجے ہی مظاہرہ گاہ پہنچ گئے تھے۔ انہوں  نے کہا کہ انہیں اندیشہ تھا کہ پولیس رات میں کوئی کارروائی کرسکتی ہے اس لئے ممبئی   میں طے شدہ پروگرام میں شرکت کے بعد وہ ایئر پورٹ سے براہ راست  جنتر منتر پہنچ گئے۔