بارش کا سلسلہ جاری ہے۔اس دوران اب تک۳۷ء۲؍لاکھ افراد کو محفوظ مقامات پر منتقل کیا جا چکا ہے۔

اودیشہ میں یکم جون سے۱۶؍ اگست کے درمیان۹۵۳؍ ملی میٹر بارش ریکارڈ کی گئی ہے جو کہ معمول کی۷۵۹؍ ملی میٹر بارش کے مقابلے میں۲۷؍ فیصد زیادہ ہے۔ ریاست میں ایک بار پھر سیلابی صورتحال پیدا ہونے کے درمیان چیف سکریٹری انُو گرگ نے اتوار کے روز متاثرہ علاقوں میں امدادی، بچاؤ اور بحالی کے کاموں کو تیز کرنے کی ہدایات دی ہیں۔

یہ بھی پڑھئے: ممی شدہ انسانی باقیات سے خطرناک پھپھوندی پھیلنے کا خدشہ، سائنس دانوں کا انتباہ

تازہ سیلاب سے۴۹؍بلاکس،۳۳۱؍ گرام پنچایتیں،۹۴۷؍ گاؤں اور پانچ شہری علاقے متاثر ہوئے ہیں، اور تقریباً۱۵ء۵؍ لاکھ افراد متاثر ہوئے ہیں۔ اب تک۳۷ء۲؍لاکھ افراد کو محفوظ مقامات پر منتقل کیا جا چکا ہے۔ محترمہ گرگ نے اسپیشل ریلیف کمشنر (ایس آر سی) کے دفتر میں ایک اعلیٰ سطحی اجلاس میں سیلاب کی صورتحال کا جائزہ لیا۔ اجلاس میں محصولات و ڈیزاسٹر مینیجمنٹ، آبی وسائل، صحت، توانائی، مکانات و شہری ترقی اور ماہی پروری و حیوانی وسائل کی ترقی کے محکموں کے سینئر حکام نے شرکت کی۔ بالاسور، بھدرک، جاج پور، میور بھنج اور کیوں جھر کے ڈسٹرکٹ مجسٹریٹس اور محکمہ موسمیات (آئی ایم ڈی) بھوونیشور کی علاقائی ڈائریکٹر منورما موہنتی نے ویڈیو کانفرنسنگ کے ذریعے اجلاس میں شرکت کی۔

یہ بھی پڑھئے: بنگال : سابق ڈپٹی اسپیکر کی خودکشی، سیاسی ماحول گرم

آئی ایم ڈی کے مطابق، شمالی و مغربی خلیج بنگال اور اس سے ملحقہ مغربی بنگال-شمالی اوڈیشہ ساحل پر بننے والے کم ہوا کے دباؤ کے اثر سے شمالی اوڈیشہ میں بارش کے سلسلہ میں اضافہ ہو رہا ہے۔ اگلے۲۴؍ گھنٹوں میں اس نظام کے مزید مضبوط ہونے کا امکان ہے، جس سے بارش مزید بڑھ سکتی ہے۔ بالاسور، بھدرک، جاج پور، میور بھنج اور کیوں جھر کے لئے ریڈ وارننگ جاری کی گئی ہے، جبکہ ریاست کے بیشتر دیگر اضلاع کے لیے اورنج اور کچھ اضلاع کے لیے یلو وارننگ جاری کی گئی ہے۔ ان پانچ اضلاع میں۱۸؍ اگست تک بارش جاری رہنے اور اس کے بعد تدریجی کمی کا امکان ہے۔ ضلعی انتظامیہ کی جانب سے۲۹۳؍  امدادی کیمپ قائم کیے گئے ہیں، جہاں پکا ہوا کھانا اور ضروری خشک راشن فراہم کیا جا رہا ہے۔ متاثرہ اضلاع میں اوڈیشہ ڈزاسٹر ریپڈ ایکشن فورس (او ڈی آر اے ایف) کی ۳۶؍ نیشنل ڈزاسٹر ریسپانس فورس (این ڈی آر ایف) کی سات اور فائر سروس کی۴۳؍ ٹیمیں تعینات کی گئی ہیں۔ محکمہ صحت نے میڈیکل ٹیمیں اور ریپڈ ریسپانس ٹیمیں تعینات کی ہیں نیز ضروری ادویات، ہیلوجن ٹیبلٹس، بلیچنگ پاؤڈر اور سانپ کے کاٹنے کی ادویات کا ذخیرہ تیار رکھا ہے۔