۷؍اضلاع میں بارش کے لئے الرٹ جاری کیا گیا ہے۔ حالانکہ ریاست کے زیادہ ترعلاقوں میں درجہ حرارت میں اضافہ ہواہے۔

ریاست بھر میں گرمی اور بارش کا کھیل چل رہا ہے۔ ایک طرف جہاں بیشتر علاقوںمیں درجہ حرارت میں اضافہ ہوا ہے۔ وہیں کچھ علاقوں میں ہلکی پھلکی بارش ہوئی ہے۔ تاہم اکتوبر ہیٹ کا اثر کئی مقامات پر نظر آرہا ہے۔دریں اثناء محکمہ موسمیات کا کہنا ہے کہ ریاست میں واپسی کا مانسون زور پکڑ رہا ہے۔ سنیچر کو محکمہ موسمیات نے۷؍ اضلاع کے لیے الرٹ جاری کیا ہے۔ ان اضلاع میں گرج چمک کے ساتھ تیز بارش ہونے کا امکان ہے۔ رپورٹ کے مطابق ریاست میں اس وقت کہیں دھوپ تو کہیں بارش کا سلسلہ جاری ہے۔ مہاراشٹر کے کئی علاقوں میں مانسون کی واپسی کے لیے سازگار موسمی حالات بن رہے ہیں۔ کچھ اضلاع میں واپسی کی بارش زور پکڑ رہی ہے، جبکہ بعض اضلاع میں شدید دھوپ دیکھنے کو مل رہی ہے۔ محکمہ موسمیات نے سنیچر کو کوکن اور مغربی مہاراشٹر کے کچھ علاقوں میں گرج چمک کے ساتھ بارش کی پیش گوئی کی ہے۔ وہیں ریاست کے باقی علاقوں میں بعض مقامات پر درجہ حرارت بڑھنے کا امکان ہے۔محکمہ موسمیات کے مطابق، آج کوکن کے رائے گڑھ، رتناگیری اور سندھودرگ اضلاع میں گرج چمک کے ساتھ بارش ہونے کا امکان ہے۔ 

یہ بھی پڑھئے: ’وندے ماترم‘ کے تمام ۶؍ بند لازمی قرار دینے کے خلاف بدھ مت کارکن سپریم کورٹ پہنچ گئے

پونے میںدرجہ حرارت بڑھا
پونے میں گزشتہ دو تین دنوں سے شہر کے زیادہ سے زیادہ درجہ حرارت میں نمایاں اضافہ ہوا ہے اور پارہ تقریباً۳۳؍ سے۳۴؍ ڈگری سیلسیس تک پہنچ گیا ہے۔ تیز دھوپ اور ہوا میں نمی کی وجہ سے گرمی زیادہ محسوس ہو رہی ہے، جس سے شہری پریشان ہیں۔ محکمہ موسمیات نے پیش گوئی کی ہے کہ رواں سال اکتوبر میں زیادہ سے زیادہ درجہ حرارت اوسط سے ایک سے دو ڈگری سیلسیس زیادہ رہنے کا امکان ہے۔