ہندوستان کے پہلے’’ ٹیسلا‘‘ کار کے مالک سدھارتھ جین آئنوکس کے ایگزیکٹو ڈائریکٹر ہیں، انہوں نے ایک پوسٹ میںاپنی ’’ٹیسلا‘‘ کار کو ایلون مسک کے نام منسوب کیا۔

آئنوکس گروپ کے ایگزیکٹو ڈائریکٹر سدھارتھ جین، ہندوستان کے پہلے کاروباری بن گئے ہیں جنہوں نے امریکی الیکٹرک کار ’’ ٹیسلا ‘‘کے اس جولائی میں ملک میں باقاعدہ آغاز کے بعد پہلی گاڑی خریدی ہے۔ جین نے اسٹیلتھ گرے ٹیسلا ماڈل’’ وائی‘‘ حاصل کی اور فخر سے اعلان کیا کہ یہ انڈیا ان کارپوریشن کی پہلی ٹیسلا ہے۔ایکس پر اس اہم سنگ میل کو شیئر کرتے ہوئے، انہوں نے گاڑی کے ساتھ تصویر پوسٹ کی اور لکھا، ’’یہ آپ کے لیے، ایلون مسک۔‘‘اپنی پوسٹ میں، جین نے بتایا کہ وہ ۲۰۱۷ءسے اس لمحے کا انتظار کر رہے تھے، جب انہوں نے کیلیفورنیا میں ٹیسلا کی فریمونٹ فیکٹری کا دورہ کیا تھا۔ 

یہ بھی پڑھئئ: ۱۶؍سالہ کرن سنگھ نے قد میں گریٹ کھلی کو بھی پیچھے چھوڑ دیا

انہوں نے طویل انتظار کے بعد خریدی گئی گاڑی پر اپنی خوشی کا اظہار کرتے ہوئے مزید کہا کہ ’’خواب سچ ہوتے ہیں،‘‘جین نے اپنی پوسٹ میں ٹیسلا کے شریک بانی اور سی ای او ایلون مسک کو ٹیگ کیا اور خریداری ان کے نام منسوب کی ۔ سوشل میڈیا صارفین نے اس سنگ میل کی تعریف کی، جن میں سے کئی نے جین کو ان کی کامیابی اور ان کے جذبے پر مبارکباد دی۔ واضح رہے کہ ٹیسلا نے جولائی میں ہندوستانی بازار میں باضابطہ طور پر داخل ہوتے ہوئے، ممبئی کے باندرا کُرلا کمپلیکس میں اپنا پہلا شو روم کھولا، اس کے بعد دہلی کے اندرا گاندھی انٹرنیشنل ایئر پورٹ پر دوسرے شو روم کا آغاز کیا۔ ترسیل  کا آغاز ستمبر میں ہوا، جو ابتدائی طور پر ممبئی، دہلی، پونے اور گڑگاؤں جیسے شہروں تک محدود تھیں۔
ٹیسلا ماڈل وائی، جو کمپنی کے شنگھائی گیگا فیکٹری سے درآمد کی گئی ہے، کی قیمت ممبئی میں ۶۱؍ لاکھ ۷؍ ہزار ہے اور گڑگاؤں میں ۶۶؍لاکھ ۷۶؍ ہزار ہے جو اس کی امریکی قیمت سے تقریباً دگنی ہے۔ اس فرق کی بڑی وجہ ہندوستان میں ۴۰؍ ہزار ڈالر  سے زیادہ قیمت والی مکمل طور پر تیار گاڑیوں پر۱۱۰؍  فیصد درآمدی محصول ہے۔اگرچہ جین نے انڈیا انک کے پہلے ٹیسلا خریدار کا اعزاز حاصل کیا ہے، لیکن ملک میں پہلی گاڑی کی ڈیلیوری اس ماہ کے آغاز میں مہاراشٹر کے وزیر نقل و حمل پرتاپ سرنائک کو کی گئی تھی۔ ٸٹیسلا نے اپنے ممبئی ایکسپیرئنس سینٹر پر ایک تقریبی حوالگی کا اہتمام کیا، جو ہندوستان میں ڈیلیوریز کے آغاز کی علامت تھی۔

یہ بھی پڑھئے: اگست میں مسافر گاڑیوں کی فروخت میں ۹؍فیصد کے قریب کمی

بلومبرگ کے مطابق، ٸٹیسلا کو جولائی کے بعد سے ملک میں تقریباً ۶۰۰؍آرڈر موصول ہو چکے ہیں اور اس سال ۳۵۰؍ سے ۵۰۰؍ گاڑیوں کی ترسیل کی توقع ہے۔ اس شہرت کے باوجود، الیکٹرک گاڑیاں اب بھی ہندوستان کے آٹو مارکیٹ کا صرف۴؍ فیصد ہیں۔فی الحال، ٹیسلا ہندوستان کے لگژری کار سیکٹر میں مخصوص خریداروں پر توجہ مرکوز کر رہا ہے۔ کمپنی بیرون ملک سے گاڑیاں درآمد کرتی رہے گی اور وزیر برائے بھاری صنعت ایچ ڈی کماراسوامی کے مطابق، اس کا مقامی سطح پر مینوفیکچرنگ کافوری منصوبہ نہیں ہے۔