اسرائیل کے بین گوریون ہوائی اڈے پر امریکی فوجی طیاروں کی موجودگی سے اسرائیلی ایئرپورٹ اتھارٹی کو ۲۴۸؍ ملین ڈالر کا نقصان ہوا ہے، انہوں نے خبردار کیا کہ اگر یہ صورتحال جاری رہی تو یہ اعداد و شمار اربوں تک جا سکتے ہیں۔

اسرائیلی حکام نے جمعرات کو بتایا کہ بین گوریون ایئرپورٹ پر امریکی فوجی طیاروں کی موجودگی کی وجہ سے گزشتہ دو ماہ میں ایئرپورٹ اتھارٹی کو۲۴۸؍ ملین ڈالر کا نقصان ہوا ہے۔ انہوں نے خبردار کیا کہ اگر یہ صورتحال جاری رہی تو یہ اعداد و شمار اربوں تک جا سکتے ہیں۔اسرائیل ایئرپورٹ اتھارٹی کی ڈائریکٹر جنرل شیرون کیدمی کے مطابق، بین گوریون ایئرپورٹ اس وقت صرف ایک تہائی صلاحیت کے ساتھ کام کر رہا ہے کیونکہ یہاں درجنوں امریکی ٹینکر طیارے موجود ہیں۔

یہ بھی پڑھئے: ٹرمپ نے ایران جنگ سے متعلق کابینہ کا اجلاس طلب کرلیا

انہوں نے بتایا کہ ایئرپورٹ کی تقریباً۷۰؍ فیصد سرگرمیاں محدود کر دی گئی ہیں۔بعد ازاں کیدمی نے خبردار کیا کہ آنے والے دنوں میں مزید پروازیں منسوخ کی جا سکتی ہیں۔ان کا کہنا تھا کہ اس سال ۱۸؍ ملین مسافروں کی توقع تھی، لیکن اب اندازہ ہے کہ یہ تعداد۱۵؍ ملین سے تجاوز نہیں کرے گی۔ اس کے علاوہ غیر ملکی ایئرلائنز کی واپسی بھی ممکن نہیں، اوراس کے سبب ۳۰؍ لاکھ تک مسافر متاثر ہو سکتے ہیں۔اس سے قبل اسرائیلی میڈیا نے سول ایوی ایشن اتھارٹی کے سربراہ شموئیل ذاکائی کے حوالے سے بتایا تھا کہ ’’بین گوریون محدود شہری پروازوںکے ساتھ ایک فوجی ہوائی اڈے میں تبدیل ہو گیا ہے۔‘‘

یہ بھی پڑھئے: امریکہ نے فرانسسکا البانیز پر دوبارہ پابندیاں عائد کر دیں

واضح رہے کہ ۲۸؍فروری کو امریکہ اور اسرائیل نے مشترکہ طور پر ایران پر حملہ کردیا تھا، جس کے نتیجے میں ایران کے سپریم لیڈرسمیت ۴۰؍ سے زائد فوجی اور سیاسی لیڈروں کی شہادت ہوئی تھی، جس کے جواب میں ایران کے خطے میں موجود امریکی فوجی تنصیبات ، اور اسرائیل کو ڈرون اور میزائل سے نشانہ بنایا،حالانکہ فی الوقت عارضی جنگ بندی نافذ ہے، اور مذاکرات کا دور بھی جاری ہے، لیکن مذاکرات کی ناکامی کی صور ت میں جنگ دوبارہ شروع ہونے کا خطرہ بھی برقرار ہے، اور اسی کی تیاری کے طور پرامریکہ نے اپنے فوجی طیاروں کو اسرائیل کے ہوائی اڈے پر کھڑے کئے ہیں،جس کے نتیجے میں یہ ہوائی اڈہ جزوی طور پر ہی کام کرپارہا ہے، جس کا نقصان انتظامیہ کو ہورہاہے۔