اسرائیلی میڈیا کے مطابق شام میں کارروائی کے دوران اسرائیلی فوجیوں نے شامی کسانوں کی تقریباً ۲۵۰؍ بکریاں چرا کر مقبوضہ مغربی کنارے منتقل کر دیں۔ واقعے کے بعد فوجی کمانڈر کو برطرف اور یونٹ معطل کر دیا گیا ہے جبکہ سیکڑوں بکریاں اب بھی اسرائیلی علاقوں میں آوارہ پھر رہی ہیں۔

اسرائیلی میڈیا نے انکشاف کیا ہے کہ اسرائیلی فوج کے اہلکاروں نے شام میں ایک فوجی کارروائی کے دوران شامی کسانوں کی تقریباً ۲۵۰؍ بکریاں چوری کر کے انہیں مقبوضہ مغربی کنارے منتقل کر دیا۔ رپورٹ کے مطابق یہ واقعہ دو ہفتے قبل پیش آیا، جب گولان بریگیڈ کی ایک بٹالین نے مقبوضہ گولان کی پہاڑیاں میں آپریشن کیا۔ اسرائیلی ٹی وی چینل چینل ۱۲؍ نے پولیس ذرائع کے حوالے سے بتایا کہ فوجیوں نے بکریوں کو پہلے سے تیار ٹرکوں میں لادا، انہیں ابتدائی طور پر اسرائیلی حدود میں منتقل کیا گیا اور بعد ازاں مقبوضہ مغربی کنارہ میں قائم غیر قانونی یہودی آؤٹ پوسٹس کے کھیتوں تک پہنچا دیا گیا۔

یہ بھی پڑھئے: شام نے کرد کو سرکاری زبان کا درجہ دیا، کردوں کو قومی حقوق کی منظوری

رپورٹ میں کہا گیا ہے کہ اس کارروائی کی منصوبہ بندی پہلے سے کی گئی تھی، جس سے یہ شبہ مضبوط ہوا کہ یہ عمل کسی فوری جنگی ضرورت کے بجائے منظم لوٹ مار کا حصہ تھا۔ اسرائیلی میڈیا کے مطابق بکریوں کی منتقلی کے لیے استعمال ہونے والی گاڑیاں اور راستے پہلے ہی طے کر لیے گئے تھے۔ واقعے کے منظرِ عام پر آنے کے بعد اسرائیلی فوج نے تصدیق کی کہ متعلقہ یونٹ کے ٹیم کمانڈر کو برطرف کر دیا گیا ہے، کمپنی کمانڈر کو سرزنش کی گئی ہے، جبکہ پورے یونٹ کو عارضی طور پر معطل کر دیا گیا ہے۔ فوجی بیان میں کہا گیا کہ اس واقعے کی مکمل تحقیقات جاری ہیں اور ذمہ داروں کے خلاف مزید کارروائی بھی کی جا سکتی ہے۔

یہ بھی پڑھئے: اسرائیلی محاصرے میں غزہ کیلئے ٹرمپ کی نئی فلسطینی ٹیکنوکریٹک حکومت کی حمایت

یہ معاملہ اس وقت سامنے آیا جب مقبوضہ گولان کی پہاڑیوں میں کسانوں نے درجنوں بکریوں کو گلیوں اور سڑکوں پر آوارہ گھومتے دیکھا۔ اس غیر معمولی صورتحال نے مقامی حکام کو متحرک کیا، جس کے بعد تحقیقات کا آغاز ہوا اور یہ حقیقت سامنے آئی کہ یہ بکریاں شام سے لائی گئی تھیں۔ اسرائیلی میڈیا کے مطابق تقریباً ۲۰۰؍ بکریاں اب بھی بغیر کسی شناخت، ویکسین یا قانونی دستاویزات کے اسرائیل اور مقبوضہ مغربی کنارے میں گھوم رہی ہیں، جبکہ کچھ بکریاں شام کے اندر مختلف مقامات پر بکھری ہوئی ہیں۔ ماہرین نے خبردار کیا ہے کہ غیر ویکسینیٹڈ جانور صحت عامہ اور مویشیوں کے لیے خطرہ بن سکتے ہیں۔ یہ واقعہ ایک بار پھر مقبوضہ علاقوں میں اسرائیلی فوج کے طرزِ عمل پر سوالات کھڑے کر رہا ہے، جہاں انسانی حقوق کی تنظیمیں پہلے ہی لوٹ مار، غیر قانونی قبضوں اور شہری املاک کی تباہی کے الزامات عائد کرتی رہی ہیں۔