Updated: November 16, 2026, 10:03 PM IST
| London
برطانیہ کے بادشاہ چارلس سوم کا ایک ایسا خواب بھی تھا جو شاہی زندگی کی آسائشوں کے باوجود بچپن میں پورا نہ ہوسکا۔ وہ اپنی چھوٹی بہن شہزادی این کے ساتھ عام برطانوی خاندانوں کی طرح ساحلی تفریحی مقام بٹلِنز (Butlin’s) میں چھٹیاں گزارنا چاہتے تھے، لیکن ملکہ ایلزبیتھ دوم نے ہر بار ان کی درخواست مسترد کردی۔ اب بادشاہ کی ۷۸؍ ویں سالگرہ پر بٹلِنز نے انہیں اور ان کے خاندان کو اپنے کسی بھی تفریحی مقام پر آنے کی دعوت دی ہے تاکہ ان کا برسوں پرانا خواب پورا ہوسکے۔
برطانیہ کے بادشاہ چارلس سوم کی زندگی شاہی محلات، تاریخی قلعوں، وسیع باغات اور دنیا کے مختلف ممالک کے دوروں سے عبارت رہی ہے، لیکن ان کے بچپن کی ایک چھوٹی سی خواہش ایسی تھی جو کبھی پوری نہیں ہوسکی۔ انہیں افسوس ہے کہ وہ بچپن میں اپنی چھوٹی بہن شہزادی این کے ساتھ برطانیہ کے مشہور ساحلی تفریحی مقام بٹلِنز میں چھٹیاں نہیں گزار سکے۔ یہ دلچسپ انکشاف بادشاہ کے ایک قریبی دوست نے کیا ہے، جس کے مطابق چارلس کئی مرتبہ اپنی والدہ ملکہ ایلزبیتھ دوم اور والد شہزادہ فلپ سے درخواست کرتے رہے کہ انہیں بٹلِنز جانے دیا جائے، مگر ملکہ ہر مرتبہ یہ کہہ کر انکار کردیتی تھیں کہ ’’میرا خیال ہے کہ ہمارے لیے ایسا کرنا ممکن نہیں ہوگا۔‘‘ برطانوی اخبار دی ٹائمز سے گفتگو کرتے ہوئے بادشاہ کے دوست نے بتایا کہ چارلس اکثر اپنی ان خواہشات کا ذکر کرتے ہیں جو زندگی میں پوری نہیں ہوسکیں۔ ان میں بٹلِنز کی سیر نہ کرپانا ان کی پسندیدہ دلچسپ کہانیوں میں سے ایک ہے۔ دوست کے مطابق بادشاہ اس بات پر ہنستے ہیں کہ وہ اور ان کی بہن بچپن میں کتنے شوق سے وہاں جانا چاہتے تھے، لیکن دونوں اپنی خواہش پوری نہیں کرواسکے۔ ان کے بقول چارلس ہمیشہ وہاں جانا چاہتے تھے۔
یہ بھی پڑھئے: ممبئی: پرنس ولیم اور کیٹ نے سچن تینڈولکر کے ساتھ گلی کرکٹ کھیلا
اس خواہش کی دلچسپی اس لیے بھی بڑھ جاتی ہے کہ شاہی خاندان کے بچوں کے لیے عام برطانوی خاندانوں کی طرح ساحلی تفریحی مراکز میں چھٹیاں گزارنا ممکن نہیں ہوسکا تھا۔ چارلس اور این عموماً اسکاٹ لینڈ میں واقع شاہی محل بالمورل کیسل یا انگلینڈ کے کاؤنٹی نورفوک میں واقع سینڈرنگھم اسٹیٹ میں تعطیلات گزارتے تھے۔ یہ دونوں شاہی خاندان کی ملکیت میں شامل وسیع رہائش گاہیں ہیں، جہاں انہیں عام سیاحتی مقامات کی بھیڑ اور معمول کی سرگرمیوں سے دور وقت گزارنے کا موقع ملتا تھا۔ لیکن بٹلِنز جیسی جگہ پر جانے کی خواہش شاید اس لیے خاص تھی کہ وہاں عام بچوں کی طرح کھیل کود، تفریحی سرگرمیوں اور اجتماعی چھٹیوں کا ماحول میسر آتا ہے۔ دلچسپ بات یہ ہے کہ بٹلِنز کی تاریخ بھی برطانوی عوام کی تفریحی زندگی میں ایک اہم مقام رکھتی ہے۔ اس کی بنیاد ۱۹۳۶ء میں کاروباری شخصیت بلی بٹلِن (Billy Butlin) نے رکھی تھی۔ ان کا مقصد ایسے ساحلی تفریحی مراکز قائم کرنا تھا جہاں عام خاندان مناسب خرچ پر چھٹیاں گزار سکیں اور رہائش کے ساتھ کھیل، تفریح اور دیگر سرگرمیوں سے بھی لطف اندوز ہوسکیں۔ اس سلسلے کا پہلا تفریحی مرکز لنکن شائر کے علاقے اسکگنیس (Skegness) میں قائم کیا گیا تھا۔ اس وقت برطانیہ کے بہت سے متوسط اور محنت کش خاندانوں کے لیے معیاری تعطیلات گزارنا مہنگا اور مشکل تھا۔ بلی بٹلِن نے ایک ہی مقام پر رہائش، کھانے اور تفریح کی سہولتیں فراہم کرکے اس تصور کو مقبول بنایا۔
یہ بھی پڑھئے: تبلیغی جماعت کے امیر مولانا نذر الرحمان کا ۹۷؍ برس کی عمر میں انتقال
بٹلِنز کی ایک خاص پہچان اس کے سرخ وردی والے تفریحی عملے کی ٹیم بھی ہے، جسے ’’ریڈ کوٹس‘‘ کہا جاتا ہے۔ یہ ملازمین مہمانوں کے لیے کھیلوں، مقابلوں، اسٹیج شوز اور دوسری سرگرمیوں کا اہتمام کرتے ہیں۔ وقت کے ساتھ بٹلِنز محض چھٹیاں گزارنے کی جگہ نہیں رہا بلکہ برطانوی تفریحی ثقافت کا ایک معروف حصہ بن گیا۔ کمپنی ۲۰۲۶ء میں اپنی ۹۰؍ ویں سالگرہ منارہی ہے۔ اس وقت اس کے ۳؍ بڑے تفریحی مراکز بگنر ریجس ، مائن ہیڈ اور اسکگنیس میں قائم ہیں۔ کمپنی کے مطابق ان مراکز میں ہر سال تقریباً ۱۵؍ لاکھ مہمان آتے ہیں۔ شاہی خاندان کا اس تفریحی سلسلے سے تعلق بھی کئی دہائیوں پرانا ہے۔ ملکہ ایلزبیتھ دوم اور شہزادہ فلپ نے ۱۹۶۳ء میں ویلز کے علاقے پُوِلہیلی (Pwllheli) میں واقع بٹلِنز کے تفریحی مرکز کا دورہ کیا تھا۔ اس وقت چارلس کی عمر ۱۴؍ سال تھی، لیکن ان کے والدین نے انہیں اور شہزادی این کو اس دورے میں ساتھ نہیں لے گئے تھے۔ شاہی جوڑے کو بٹلِنز کے بانی سر بلی بٹلِن نے تفریحی مرکز کی سیر کروائی تھی۔ شہزادہ فلپ کا اس مقام سے ایک پرانا تعلق بھی تھا۔ دوسری عالمی جنگ کے دوران جب برطانوی بحریہ نے اس مرکز کو اپنے استعمال میں لے لیا تھا تو وہ یہاں تعینات رہے تھے۔ اس فوجی مرکز کو اس وقت ’’ایچ ایم ایس گلینڈوور‘‘ (HMS Glendower) کا نام دیا گیا تھا۔
یہ بھی پڑھئے: فرانس: اے آئی تحریروں کیلئے ادبی انعام کا اعلان
شاہی خاندان کے دیگر افراد بھی بعد میں بٹلِنز کے مختلف مراکز کا دورہ کرتے رہے ہیں۔ شہزادہ ایڈورڈ نے ۱۹۹۰ء کی دہائی میں اسکگنیس کے تفریحی مرکز کا دورہ کیا تھا، جبکہ شہزادی این ۲۰۱۲ء میں سومرسیٹ کے علاقے مائن ہیڈ پہنچیں، جہاں انہوں نے نگہداشت کرنے والے افراد کے لیے منعقدہ ایک خصوصی تقریب میں شرکت کی تھی۔ اکتوبر ۲۰۱۸ء میں شہزادہ ہیری نے بھی ایک موقع پر اپنی اہلیہ میگھن کو بگنر ریجس کے بٹلِنز مرکز لے جانے کے بارے میں مذاق کیا تھا۔ وہ چیچسٹر یونیورسٹی کے دورے کے دوران اس مقام کو سرکس سمجھ بیٹھے تھے۔ اس وقت کمپنی نے سوشل میڈیا پر جواب دیتے ہوئے کہا تھا کہ وہ ہیری اور میگھن کا بھی اپنے مرکز میں استقبال کرنا چاہے گی۔ اب بٹلِنز نے بادشاہ چارلس کی ۷۸؍ ویں سالگرہ کے موقع پر ان کے بچپن کے اس ادھورے خواب کو پورا کرنے کی پیشکش کی ہے۔ چارلس کی سالگرہ ۱۴؍ نومبر کو تھی۔ کمپنی کے ترجمان نے اخبار دی ٹائمز سے گفتگو کرتے ہوئے کہا، ’’ہم بادشاہ سلامت کو ان کی سالگرہ پر مبارک باد پیش کرتے ہیں اور اپنی ۹۰؍ ویں سالگرہ مناتے ہوئے ان کے بچپن کی ایک خواہش پوری کرنے میں مدد کرنا چاہتے ہیں۔ ان کی مرحومہ والدہ نے ۱۹۶۳ء میں بٹلِنز کا دورہ کیا تھا اور ہمیں خوشی ہوگی کہ بادشاہ اور ان کے خاندان کو اپنے کسی بھی تفریحی مرکز میں مدعو کریں۔‘‘ کمپنی نے سوشل میڈیا پلیٹ فارم ایکس پر بھی پیغام جاری کیا کہ ’’ابھی دیر نہیں ہوئی، ہمیں بادشاہ اور ان کے خاندان کا اپنے کسی تفریحی مرکز میں استقبال کرکے خوشی ہوگی۔‘‘ فی الحال یہ واضح نہیں کیا گیا ہے کہ بادشاہ اس دعوت کو قبول کریں گے یا نہیں اور اگر ایسا ہوا تو وہ کس تفریحی مرکز کا انتخاب کریں گے۔ تاہم، اس پیشکش نے برطانوی شاہی خاندان کی زندگی کا ایک ایسا دلچسپ پہلو سامنے لایا ہے جس میں دنیا کے ایک طاقتور شاہی خاندان کے سربراہ کا بچپن کا خواب کسی مہنگے محل یا شاہی سفر سے نہیں بلکہ عام خاندانوں کے پسندیدہ ساحلی تفریحی مقام سے وابستہ تھا۔