اطلاعات کے مطابق افتتاح کے بعد محض ۲۲؍ دن کے دوران ایکسپریس وے کے مختلف حصوں میں سڑک دھنسنے یا نئی خرابیاں پیدا ہونے کے کم از کم  ۹؍واقعات سامنے آ چکے ہیں۔ مرمت کے  لئے ۸۰؍ سے زیادہ مقامات کی نشاندہی کی گئی ہے۔این ایچ اے آئی کے ریکارڈ کے مطابق اب تک ۸۴؍ خراب مقامات کی نشاندہی ہو چکی ہے۔ ان میں۳۹؍لکھنؤ کی سمت جانے والی سڑک پر جبکہ ۴۵؍کانپور کی جانب جانے والے کیریج وے پر ہیں۔ بعض مقامات پر معمولی پیوند کاری سے کام چلایا گیا لیکن کچھ حصوں میں سڑک کے دھنس جانے کے باعث مکمل تعمیر نو کرنا پڑی۔اس معاملے کا سب سے سنگین واقعہ ۳۰؍ جولائی کو پیش آیا، جب بجری سے لدا ایک ٹرک سڑک کے خراب حصے میں دھنس گیا۔ 

اس کے بعد تقریباً ایک ہزار مربع فٹ رقبے کی سڑک کو تقریباً دو فٹ کی گہرائی تک کھود کر دوبارہ تعمیر کیا گیا۔ حیرت انگیز طور پر مرمت کے کچھ ہی عرصے بعد اس حصے میں دوبارہ دراڑیں پڑنے کی اطلاعات سامنے آئیں، جس سے سڑک کے اندرونی ڈھانچے اور تعمیراتی معیار پر مزید سوالات اٹھ گئے۔ماہرین کا کہنا ہے کہ ہنگامی مرمت کے دوران پنکھوں جیسے آلات کے ذریعے سطحی نمی کو کم کرنا ممکن ہے لیکن کسی بھی ایکسپریس وے کی پائیداری کا انحصار صرف سطح کو خشک کرنے پر نہیں ہوتا۔ سڑک کی مضبوطی کے لئے معیاری تعمیراتی مواد، مناسب کمپیکشن، مؤثر نکاسیٔ آب اور مقررہ انجینئرنگ اصولوں پر سختی سے عمل ضروری ہے۔این ایچ اے آئی کے اترپردیش کے چیف جنرل منیجر اور ریجنل افسر گوتم وشال نے واضح کیا کہ مرمت کا تمام خرچ تعمیراتی کمپنی کو خود برداشت کرنا ہوگا۔ انہوں نے کہا کہ پی این سی انفراٹیک کو بہترین معیار کے مواد سے ایکسپریس وے کی مرمت کرنے کی ہدایت دی گئی ہے اور این ایچ اے آئی اس کام کے لیے کمپنی کو کوئی ادائیگی نہیں کرے گا۔ادھر این ایچ اے آئی نے اس منصوبے سے وابستہ بعض اعلیٰ افسران اور کمپنی کے خلاف کارروائی کا بھی اعلان کیا۔

یہ بھی پڑھئے: شیوسینا بنام شیوسینا کیس حتمی مرحلہ میں داخل، اُدھو خیمہ پُراُمید

منصوبے کے موجودہ پروجیکٹ ڈائریکٹر نکول پرکاش ورما کو ان کے اصل محکمے میں واپس بھیج دیا گیا ہے۔این ایچ اے آئی کے بیان کے مطابق سابق پروجیکٹ ڈائریکٹر سوربھ چورسیا کے خلاف بھی چارج شیٹ جاری کی جا رہی ہے۔ ان کے دور میں منصوبے کی تعمیر کا ایک بڑا حصہ مکمل ہوا تھا۔ موجودہ پروجیکٹ ڈائریکٹر نکول پرکاش ورما کے خلاف بھی اپنی ذمہ داریوں کی مبینہ غفلت برتنے پر کارروائی کی جا رہی ہے۔یوں ایکسپریس وے کا معاملہ محض سڑک کی سطح پر پڑنے والی دراڑوں کا مسئلہ نہیں رہا بلکہ اس نے پورے منصوبے کے تعمیراتی معیار، نگرانی کے نظام اور ذمہ داری طے کرنے کے طریقۂ کار پر سوال کھڑے کر دیے ہیں۔