ایک طرف مورگن فری مین، جسے دیکھ کر لگتا ہے کہ اس شخص نے بہت کچھ دیکھا ہے، اور دوسری طرف نانا، جنہیں دیکھ کر محسوس ہوتا ہے کہ اس شخص نے بہت کچھ جھیلا ہے اور اب بس بہت ہو گیا۔ انسان کی شخصیت کے دو انتہائی مختلف سرے ہو سکتے ہیں۔ نانا ان میں سے دوسرے سرے کو پوری شدت اور جذبے کے ساتھ پردے پر پیش کر سکتے تھے، اور یہی وجہ تھی کہ وہ ایک عظیم اداکار تھے۔

۲۰۰۰ء کی دہائی میں اس دور کا آغاز ہوا جب گورے، خوب صورت، تراشیدہ اور ہموار چہروں والے روایتی ہیروز کے بجائے کہانی فلم کا مرکزی عنصر بننے لگی۔ ایسی کہانی سنانے والے اداکار اور ناظرین کو اپنی طرف کھینچ لینے والے فنکاروں کا دور شروع ہوا۔ اور اس عہد کے پہلے ہیروز میں نانا پاٹیکر سو فیصد شامل تھے۔آج کیریکٹر آرٹسٹوں کی جو مقبولیت نظر آتی ہے، اس کی راہ نانا نے ہموار کی تھی۔ لیکن اتنا سب کچھ ہونے کے باوجود نانا کا مزاج بے حد من موجی تھا۔ جو دل میں آتا، کہہ دیتے تھے۔ وہ صاف گو اور بے باک تھے۔ اسی وجہ سے اگرچہ پروڈیوسر اور ہدایت کار نانا کو اپنی فلم میں لینا چاہتے بھی تھے، لیکن کئی مرتبہ ان سے گریز بھی کرتے تھے۔ اس سے نانا کا نقصان ہوا یا نہیں؟ معلوم نہیں۔ وہ بے فکر انسان تھے۔ لیکن سو فیصد یقین سے کہا جا سکتا ہے کہ اس سے ہندی فلمی صنعت اور ناظرین کا نقصان ہوا۔ نوازالدین صدیقی یا عرفان خان( جو آج ہمارے درمیان نہیں ہیں)، دونوں بہترین اداکار ۔ لیکن کبھی کبھی ذہن میں یہ سوال ضرور اٹھتا ہے کہ اگر نانا نے کچھ چیزوں کے ساتھ سمجھوتہ کیا ہوتا تو کیا شاید ان جیسے اور کئی اداکاروں کو بھی وہ مواقع مل سکتے تھے جو انہیں بعد میں ملے؟ نانا نے صرف جارحانہ یا سنجیدہ اداکاری ہی نہیں کی، بلکہ ’ویلکم‘ جیسی فلم میں مزاحیہ کردار کو بھی اتنی ہی قوت کے ساتھ نبھا کر دنیا کو دکھا دیا کہ وہ کامیڈی بھی اتنی ہی مہارت سے کر سکتے ہیں۔ نانا چلے گئے، لیکن نانا نے پردے پر جس عام انسان کو زندہ کیا تھا، وہ آج بھی ہمارے آس پاس موجود ہے۔ اس کا غصہ ہے، اس کی بے چینی ہے، اس کی توہین کا احساس ہے، اس کی جدوجہد ہے اور حالات سے دو دو ہاتھ کرنے کی کبھی کبھار بھڑک اٹھنے والی طاقت بھی ہے۔ شاید اسی لیے نانا کو الوداع کہتے ہوئے ہم صرف ایک عظیم اداکار کو رخصت نہیں کر رہے، بلکہ آج ہمارے درمیان سے معاشرے کے عام انسان کے دل میں برسوں سے جمع ہوتی چلی آنے والی بے شمار جذبات کا ایک چہرہ بھی رخصت ہو گیا ہے۔ ایم این ایس کی جانب سے نانا پاٹیکر کو پُرنم خراجِ عقیدت۔راج ٹھاکرے‘‘