دنیا کے بلند ترین پہاڑوں میں شامل Mount Everest پر چڑھائی کے لیے نیپال نے رواں بہار کے سیزن میں ریکارڈ ۴۹۲؍  کوہ پیمائی اجازت نامے جاری کیے ہیں، حالانکہ حکومت نے اس سال فیس میں نمایاں اضافہ کرتے ہوئے غیر ملکی کوہ پیماؤں کے لیے رائلٹی ۱۱؍ ہزار ڈالر سے بڑھا کر ۱۵؍ ہزار ڈالر کر دی تھی۔ نیپالی حکام کے مطابق بڑھتی ہوئی فیس بھی کوہ پیماؤں کو روکنے میں ناکام رہی۔

ماؤنٹ ایوریسٹ پر کوہ پیمائی کیلئے نیپال نے اس سال کے موسم بہار کے مہماتی سیزن میں ریکارڈ ۴۹۲؍ اجازت نامے جاری کیے ہیں، جس کے بعد دنیا کی بلند ترین چوٹی پر ایک بار پھر غیر معمولی بھیڑ کے خدشات بڑھ گئے ہیں۔ نیپال کے محکمہ سیاحت کے ترجمان ہیمل گوتم نے کہا کہ ’’ریکارڈ ٹوٹنے والے ہیں۔ ساگرماتھا (ماؤنٹ ایوریسٹ) کے لیے اب تک کے سب سے زیادہ کوہ پیمائی پرمٹ جاری کیے گئے ہیں۔‘‘ حکومت نے رواں سال ایوریسٹ پر چڑھائی کرنے والے غیر ملکی کوہ پیماؤں کے لیے رائلٹی فیس ۱۱؍ ہزار ڈالر سے بڑھا کر ۱۵؍ ہزار ڈالر کر دی تھی تاکہ پہاڑ پر بڑھتی بھیڑ کو کم کیا جا سکے۔ تاہم حکام کے مطابق اس فیصلے کا کوہ پیماؤں کی تعداد پر کوئی خاص اثر نہیں پڑا۔

محکمہ سیاحت کے اعداد و شمار کے مطابق نیپال نے ۲۰۱۸ء میں ۲۹۰، ۲۰۱۹ء میں ۳۸۱، ۲۰۲۱ء میں ۴۰۸، ۲۰۲۲ء میں ۳۲۵، ۲۰۲۳ء میں ۴۷۹، ۲۰۲۴ء میں ۴۲۱؍ اور ۲۰۲۵ء میں ۴۵۶؍ اجازت نامے جاری کیے تھے، جبکہ ۲۰۲۰ء میں کووڈ ۱۹؍ وبا کے باعث مہمات تقریباً معطل رہی تھیں۔ حکام کا کہنا ہے کہ رواں سال جاری کیے گئے ۴۹۲؍ اجازت نامے ایک نیا ریکارڈ ہیں، اور یہ تعداد مزید بڑھ سکتی ہے کیونکہ پرمٹ جاری کرنے کا عمل ابھی مکمل نہیں ہوا۔

یہ بھی پڑئے : ایرانی ٹینس کھلاڑی اسرائیلی کھلاڑی سے فائنل مقابلے کے بجائے کھیل سے دستبردار

محکمہ سیاحت کے اہلکار گوپال بھنڈاری نے کہا کہ ’’۱۱؍ کوہ پیماؤں پر مشتمل ایک اور مہم جو گروپ اجازت نامے حاصل کرنے کے عمل میں ہے۔ فہرست میں مزید افراد شامل کیے جا سکتے ہیں کیونکہ پرمٹ جاری کرنے کا سلسلہ ابھی ختم نہیں ہوا۔‘‘ ایوریسٹ پر بڑھتی ہوئی بھیڑ نے ایک بار پھر سلامتی اور ماحولیاتی نقصان سے متعلق خدشات کو جنم دیا ہے۔ ماحولیاتی کارکنوں اور مقامی تنظیموں کا کہنا ہے کہ بلند و بالا کیمپوں میں جمع ہونے والا کچرا، استعمال شدہ آکسیجن سلنڈر، خیمے، کھانا پکانے کی گیس اور دیگر سامان ہمالیہ کے نازک ماحول کے لیے خطرہ بنتے جا رہے ہیں۔

نیپال میں صفائی مہمات کے باوجود ایوریسٹ کے مختلف کیمپوں میں فضلہ جمع ہونے کا مسئلہ برقرار ہے۔ ماہرین کا کہنا ہے کہ ایوریسٹ کی ’’اوور کمرشلائزیشن‘‘ نہ صرف ماحولیاتی نظام بلکہ کوہ پیماؤں کی سلامتی پر بھی منفی اثر ڈال رہی ہے۔ ادھر کوہ پیماؤں نے ایوریسٹ بیس کیمپ پر جمع ہونا شروع کر دیا ہے تاکہ بلندی کے مطابق اپنے جسم کو ہم آہنگ کر سکیں۔ رواں سال رسی بچھانے کے کام میں تقریباً دو ہفتوں کی تاخیر ہوئی کیونکہ کیمپ ون کی طرف جانے والے راستے میں ایک بڑا برفانی تودہ گر گیا تھا۔

یہ بھی پڑھئے : آبنائے ہرمز میں امریکی ناکہ بندی مہینوں جاری رہے، تب بھی ایران کو فرق نہیں پڑے گا: سی آئی اے رپورٹ

حکام کے مطابق شیرپا ٹیموں کو برف پگھلنے کا انتظار کرنا پڑا تاکہ وہ شگافوں پر سیڑھیاں نصب کر سکیں۔ Lhotse کی جانب جانے والے کوہ پیما بھی اسی برفانی راستے کا استعمال کرتے ہیں، جس کی وجہ سے دباؤ مزید بڑھ جاتا ہے۔ بیس کیمپ حکام کے مطابق اب رسیاں ساؤتھ کرنل تک تقریباً ۷۹۰۶؍ میٹر کی بلندی تک نصب کر دی گئی ہیں، جبکہ خراب موسم کے باوجود چوٹی تک راستہ مکمل کرنے کی کوششیں جاری ہیں۔کوہ پیمائی کمپنیاں امید ظاہر کر رہی ہیں کہ مئی کے وسط تک موسم نسبتاً بہتر ہو جائے گا، جس کے بعد بڑی تعداد میں کوہ پیما چوٹی سر کرنے کی کوشش کریں گے۔