چنڈی گڑھ میں پی جی آئی ایم ای آر کے ایک مطالعے میں انکشاف ہوا ہے کہ سوشل میڈیا سے وابستہ ذہنی دباؤ کا سامنا کرنے والے کم عمر نوعمر بچوں کی تعداد بڑی عمر کے نوجوانوں کے مقابلے میں زیادہ ہے۔ ۱۳۰۶؍ طلبہ پر کی گئی تحقیق کے مطابق ۵۲؍ فیصد بچوں نے کسی نہ کسی سطح کے ڈجیٹل اسٹریس کا تجربہ کیا، جبکہ روزانہ ۳؍ گھنٹے سے زیادہ سوشل میڈیا استعمال کرنے والوں میں دباؤ کی شرح نمایاں طور پر بلند پائی گئی۔

اسمارٹ فون اور سوشل میڈیا اب بچوں اور نوعمر طلبہ کی روزمرہ زندگی کا حصہ بن چکے ہیں، لیکن ان کے بڑھتے ہوئے استعمال کے ساتھ ذہنی دباؤ کے نئے مسائل بھی سامنے آ رہے ہیں۔ پوسٹ گریجویٹ انسٹی ٹیوٹ آف میڈیکل ایجوکیشن اینڈ ریسرچ (PGIMER)، چنڈی گڑھ کے ایک مطالعے نے خبردار کیا ہے کہ ۱۰؍ سے ۱۳؍ سال کی عمر کے بچے سوشل میڈیا سے پیدا ہونے والے ذہنی دباؤ کے معاملے میں ۱۴؍ سے ۱۶؍ سال کے نوجوانوں کے مقابلے میں زیادہ حساس ہیں۔ تحقیق کے مطابق کم عمر بچوں میں سوشل میڈیا کے غیر متوازن اور مسئلہ بن جانے والے استعمال کا رجحان بھی زیادہ پایا گیا۔ ’سوشل میڈیا یوز اینڈ ڈجیٹل اسٹریس امونگ اسکول ایڈولیسنٹس اِن نارتھ انڈیا‘ (Social Media Use and Digital Stress Among School Adolescents in North India) کے عنوان سے یہ مطالعہ جنوری سے اپریل ۲۰۲۶ء کے درمیان کیا گیا۔ اس میں چنڈی گڑھ کے شہری علاقوں اور ہریانہ کے ضلع پنچکولہ کے دیہی علاقے رائے پور رانی کے سرکاری اور نجی اسکولوں کے ۱۰؍ سے ۱۶؍ سال کی عمر کے ۱۳۰۶؍ طلبہ کو شامل کیا گیا۔ تحقیق پی جی آئی ایم ای آر کے شعبہ کمیونٹی میڈیسن، اسکول آف پبلک ہیلتھ اور شعبہ نفسیات کے محققین نے انجام دی۔ 
تحقیق کے مطابق مجموعی طور پر ۵۲؍ فیصد طلبہ نے ڈجیٹل اسٹریس کی ہلکی سے شدید سطح تک کا تجربہ کیا۔ عمر کے اعتبار سے ۱۴؍ سے ۱۶؍ سال کے گروپ میں یہ شرح ۴۸؍ فیصد تھی، جبکہ کم عمر گروپ میں اس سے زیادہ پائی گئی۔ اسی طرح ۱۰؍ سے ۱۳؍ سال کے تقریباً ۲۰؍  فیصد طلبہ نے سوشل میڈیا کے مسئلہ بن جانے والے استعمال کی اطلاع دی، جبکہ ۱۴؍ سے ۱۶؍ سال کے گروپ میں یہ تناسب تقریباً ۱۲؍ فیصد تھا۔ محققین کے مطابق کم عمر بچوں میں آن لائن سرگرمیوں کے دباؤ سے نمٹنے کی صلاحیت نسبتاً کم ہونے کے باعث انہیں زیادہ مشکلات پیش آ سکتی ہیں۔ مطالعے میں سوشل میڈیا پر گزارے جانے والے وقت اور ذہنی دباؤ کے درمیان بھی واضح تعلق سامنے آیا۔ روزانہ ۳؍  گھنٹے سے زیادہ سوشل میڈیا استعمال کرنے والے طلبہ میں ہفتے کے عام دنوں میں ۶۴؍ فیصد نے ڈجیٹل اسٹریس کی اطلاع دی، جبکہ ۳؍ گھنٹے سے کم وقت گزارنے والے طلبہ میں یہ شرح ۴۶؍  فیصد رہی۔ ہفتہ وار تعطیلات کے دوران بھی یہی رجحان دیکھا گیا؛ زیادہ وقت سوشل میڈیا پر گزارنے والوں میں دباؤ کی شرح ۶۰؍ فیصد اور نسبتاً کم وقت استعمال کرنے والوں میں ۴۳؍ فیصد تھی۔ اس سے ظاہر ہوتا ہے کہ آن لائن سرگرمیوں میں مسلسل مصروفیت اور ذہنی دباؤ کے درمیان گہرا تعلق موجود ہے۔ 

یہ بھی پڑھئے: ناگپور: متنازع بیان پر دھریندرشاستری کیخلا ف فوجداری کا معاملہ درج

تحقیق میں ڈجیٹل اسٹریس کی مختلف وجوہات کا بھی جائزہ لیا گیا۔ ان میں ہر وقت آن لائن دستیاب رہنے کا دباؤ، پوسٹس اور تصاویر پر لائکس اور تبصروں کے ذریعے دوسروں کی منظوری حاصل کرنے کی خواہش، دوسروں کی سرگرمیوں سے باخبر رہنے کی مجبوری اور کسی اہم سرگرمی یا موقع سے محروم رہ جانے کا خوف شامل ہیں۔ اس آخری کیفیت کو نفسیاتی اصطلاح میں ’فیر آف مسنگ آؤٹ‘ (Fear of Missing Out یا FOMO) کہا جاتا ہے۔ اس کے علاوہ آن لائن رابطوں کی بھرمار اور مسلسل نوٹیفکیشنز پر نظر رکھنے کی عادت بھی ذہنی دباؤ کا سبب بن سکتی ہے۔ تحقیق کی ایک اہم مصنفہ اور پی جی آئی ایم ای آر کی پروفیسر مدھو گپتا نے ’دی انڈین ایکسپریس‘ سے گفتگو میں کہا کہ سوشل میڈیا نوعمر بچوں میں ہر وقت دستیاب رہنے، لائکس اور تبصروں کے ذریعے منظوری حاصل کرنے اور یہ دیکھتے رہنے کا دباؤ پیدا کر سکتا ہے کہ دوسرے لوگ آن لائن کیا کر رہے ہیں۔ ان کے مطابق محروم رہ جانے کا خوف اور سماجی قبولیت کی خواہش ڈجیٹل اسٹریس میں اضافہ کر سکتی ہے، اور یہ صورتِ حال کم عمر بچوں کے لیے خاص طور پر تشویش ناک ہے کیونکہ وہ ان دباؤ سے نمٹنے کے لیے ابھی پوری طرح تیار نہیں ہوتے۔ انہوں نے والدین اور اسکولوں پر زور دیا کہ وہ صرف اسکرین ٹائم کم کرنے پر توجہ دینے کے بجائے بچوں میں ڈجیٹل ذرائع کے صحت مند استعمال کی عادت پیدا کریں۔ 
شہری اور دیہی طلبہ کے درمیان بھی فرق سامنے آیا۔ شہری علاقوں کے ۱۷؍ فیصد طلبہ میں درمیانے سے شدید درجے کا ڈجیٹل اسٹریس پایا گیا، جبکہ دیہی طلبہ میں یہ تناسب ۱۱؍ فیصد تھا۔ لڑکیوں نے لڑکوں کے مقابلے میں آن لائن ہر وقت دستیاب رہنے کے دباؤ کی نمایاں طور پر زیادہ اطلاع دی۔ اسی طرح FOMO کا رجحان بھی لڑکیوں اور شہری علاقوں کے طلبہ میں زیادہ پایا گیا۔ مطالعے میں تقریباً ۴۰؍  فیصد طلبہ میں انٹرنیٹ پر انحصار کی علامات سامنے آئیں، جن کا ڈجیٹل اسٹریس سے قریبی تعلق دیکھا گیا۔ اس تحقیق میں چنڈی گڑھ کے ۶۸۷؍ اور رائے پور رانی کے ۶۱۹؍ طلبہ شامل تھے۔ شرکا میں ۳ء۵۴؍ فیصد لڑکے اور ۷ء۴۵؍ فیصد لڑکیاں تھیں، جبکہ ان کی اوسط عمر ۶ء۱۳؍ سال تھی۔ محققین نے سرکاری اور نجی اسکولوں کے طلبہ کو شامل کرنے کے لیے دو مرحلوں پر مشتمل کلسٹر سیمپلنگ کا طریقہ اختیار کیا۔ مجموعی طور پر ۱۴۲۸؍ طلبہ سے شرکت کی درخواست کی گئی تھی، جن میں سے ۱۳۰۶؍ نے حصہ لیا۔ طلبہ سے سوشل میڈیا کے استعمال، ڈجیٹل دباؤ، انٹرنیٹ پر انحصار اور جذباتی و رویاتی مشکلات کے بارے میں دو زبانوں میں سوالنامے پُر کروائے گئے۔ 

یہ بھی پڑھئے: اشتعال انگیزی پر پریانک کھرگے کی بی جےپی لیڈروں کو جیل بھیجنے کی دھمکی

محققین کے نتائج والدین اور تعلیمی اداروں کے لیے ایک اہم پیغام رکھتے ہیں کہ بچوں کی آن لائن سرگرمیوں کو محض وقت کے پیمانے پر نہیں پرکھا جا سکتا۔ یہ دیکھنا بھی ضروری ہے کہ سوشل میڈیا ان کے جذبات، خود اعتمادی، نیند، خاندانی تعلقات اور روزمرہ معمولات کو کس طرح متاثر کر رہا ہے۔ بچوں کے لیے اسکرین کے استعمال کی مناسب حدود، گھر میں فون سے پاک اوقات، حقیقی زندگی میں دوستوں اور خاندان کے ساتھ وقت گزارنے، کھیل کود اور دیگر سرگرمیوں کی حوصلہ افزائی مفید ہو سکتی ہے۔ مطالعہ اس بات کی طرف توجہ دلاتا ہے کہ ڈجیٹل دنیا سے مکمل دوری کے بجائے بچوں کو اس کے محفوظ، متوازن اور ذمہ دارانہ استعمال کے قابل بنانا زیادہ ضروری ہے۔