۱۹۴۲ء میں برطانوی حکومت نے خواتین کو بھی ایس او ای میں شامل کرنے کی منظوری دی کیونکہ ان کا خیال تھا کہ خواتین دشمن کے زیر قبضہ علاقوں میں نسبتاً کم شک و شبہ کے ساتھ نقل و حرکت کر سکتی ہیں۔نور نے رضاکارانہ طور پر اس پروگرام میں شمولیت اختیار کی اور انہیں خفیہ مواصلات،  وائرلیس آپریشنز، اسلحے کے استعمال اورمختلف عسکری کارروائیوں کی خصوصی تربیت دی گئی۔ بعض تربیت کاروں کو شبہ تھا کہ ان کی نرم مزاج طبیعت جاسوسی کے خطرناک فرائض کے  لئے موزوں نہیں ہوگی لیکن ان کے عزم، زباندانی اور تکنیکی مہارت نے اعلیٰ حکام کو متاثر کیا۔ فرانسیسی زبان پر ان کی بہترین گرفت نے انہیں ایک اہم مشن کے  لئے منتخب کروایا۔جون۱۹۴۳ء میں نور عنایت خان کو نازی قبضے والے فرانس بھیجا گیا جہاں وہ ایس او ای کی پہلی خاتون وائرلیس آپریٹر بنیں۔ یہ ایک نہایت خطرناک ذمہ داری تھی کیونکہ مزاحمتی نیٹ ورک جرمن خفیہ اداروں کی مسلسل نگرانی میں تھے۔چند ہی ہفتوں میں جرمن افواج نے مزاحمتی نیٹ ورک میں دراندازی کر لی اور متعدد لیڈر اور ایجنٹ گرفتار کر  لئے گئے۔ ایسے حالات میں نور ان چند افراد میں شامل رہ گئیں جو لندن اور فرانس کے مزاحمتی گروہوں کے درمیان رابطے کا ذریعہ بن سکتی تھیں۔برطانوی حکام نے بڑھتے ہوئے خطرات کے پیش نظر انہیں فرانس چھوڑنے کا مشورہ دیا لیکن انہوں نے انکار کر دیا۔ ان کا ماننا تھا کہ اس نازک مرحلے پر اپنی ذمہ داری چھوڑ دینا مزاحمتی کارکنوں کو ایک اہم رابطے سے محروم کر دے گا۔ چنانچہ وہ مسلسل خفیہ پیغامات بھیجتی رہیں اور اپنی ذمہ داریاں نبھاتی رہیں۔اکتوبر ۱۹۴۳ء میں نور عنایت خان جرمن حکام کے ہاتھوں گرفتار ہو گئیں۔ سخت تفتیش اور دباؤ کے باوجود انہوں نے اپنے ساتھیوں یا مشن سے متعلق کوئی اہم معلومات افشا نہیں کیں۔ ان کے بارے میں کہا جاتا ہے کہ وہ دورانِ تفتیش غیرمعمولی ثابت قدمی کا مظاہرہ کرتی رہیں اور دشمن کو ایسی کوئی معلومات فراہم نہ کیں جس سے دیگر ایجنٹوں کی جان خطرے میں پڑتی۔قید کے دوران انہوں نے فرار ہونے کی بھی کوشش کی لیکن دوبارہ پکڑی گئیں۔ اس کے باوجود ان کے حوصلے پست نہ ہوئے۔ بعد ازاں انہیں جرمنی کی ایک جیل میں منتقل کر دیا گیا جہاں انہیں کئی ماہ تک سخت جسمانی اور ذہنی اذیتوں کا سامنا کرنا پڑا۔ تمام تر مشکلات کے باوجود انہوں نے جرمن حکام سے تعاون کرنے سے انکار کر دیا۔ستمبر۱۹۴۴ء میں نور عنایت خان کو جرمنی کے ایک حراستی کیمپ لے جایا گیا جہاں انہیں طویل قید اور اذیتیں دینے کے بعد قتل کر دیا گیا۔

یہ بھی پڑھئے: اسرائیلی حزب اختلاف نیتن یاہو اتحاد پر برتری حاصل کرلے گا: سروے

تاریخی روایات کے مطابق ان کا آخری لفظ ’’لبریٹ‘‘ تھا، جو فرانسیسی زبان میں ’’آزادی‘‘ کے معنی رکھتا ہے۔نور عنایت خان کی زندگی بہادری، قربانی اور آزادی سے وابستگی کی ایک روشن مثال ہے۔ آج بھی برطانیہ اور فرانس میں انہیں دوسری جنگ عظیم کی عظیم ترین ہیروز میں شمار کیا جاتا ہے۔ ان کی داستان اس حقیقت کی یاد دلاتی ہے کہ آزادی اور انصاف کے لیے جدوجہد کرنے والے افراد کا نام تاریخ میں ہمیشہ زندہ رہتا ہے۔ انہیںپس از مرگ کئی اہم اعزازات سے نوازا گیا جبکہ فرانس نے ان کی قربانی کو خراج عقیدت پیش کرتے ہوئے پیرس میں ان کا مجسمہ بھی نصب کیا ہے۔