’’کرش ۴‘‘ کے حوالے سے بڑھتی ہوئی قیاس آرائیوں کے درمیان حالیہ رپورٹس میں دعویٰ کیا گیا تھا کہ رتیک روشن اور آدتیہ چوپڑہ کے درمیان فلم کے بجٹ اور تخلیقی سمت پر اختلافات کی وجہ سے اس طویل عرصے سے منتظر سپر ہیرو فلم کا منصوبہ تعطل کا شکار ہو گیا ہے۔

 ’’کرش ۴‘‘ کے حوالے سے بڑھتی ہوئی قیاس آرائیوں کے درمیان حالیہ رپورٹس میں دعویٰ کیا گیا تھا کہ  رتیک  روشن اور آدتیہ چوپڑہ کے درمیان فلم کے بجٹ اور تخلیقی سمت پر اختلافات کی وجہ سے اس طویل عرصے سے منتظر سپر ہیرو فلم کا منصوبہ تعطل کا شکار ہو گیا ہے۔ تاہم  فلمساز راکیش روشن  نے اب ان افواہوں کو مسترد کرتے ہوئے واضح کیا ہے کہ فلم بدستور اپنے منصوبے کے مطابق آگے بڑھ رہی ہے۔
 مڈ ڈے سے گفتگو کرتے ہوئے راکیش روشن نے ان خبروں کو بے بنیاد قرار دیا جن میں کہا گیا تھا کہ  رتیک  روشن نے اعلیٰ معیار کے ویژول ایفیکٹس (VFX) اور بڑے پیمانے کی ایکشن سیکوئنسز کے لیے ۵۰۰؍ کروڑ روپے کے بجٹ کا مطالبہ کیا ہے  جبکہ  یش راج فلمز (YRF) مبینہ طور پر ۳۵۰؍ کروڑ روپے سے زیادہ خرچ کرنے کے حق میں نہیں تھی۔
اس قیاس آرائی پر ردِعمل دیتے ہوئے انہوں نے کہا ’’یہ سب بکواس ہے کہ  رتیک  نے اپنی پہلی ہدایت کاری کے لیے عالمی معیار کے وی ایف ایس  اور ایکشن کے لیے ۵۰۰؍ کروڑ روپے کا بجٹ مانگا ہے، جبکہ وائی آر ایف  اخراجات کو ۳۵۰؍ کروڑ روپے تک محدود رکھنا چاہتی ہے۔ ایک اچھی فلم بنانا جو وسیع ناظرین کو پسند آئے، وقت لیتا ہے۔ میں نے بھی اپنی ہر کرش فلم کے لیے مناسب وقت لیا ہے۔‘‘

یہ بھی پڑھئے:’’دی سپرماریو گلیکسی مووی‘‘ ۲۰۲۶ء میں ایک ارب ڈالرکلب میں شامل ہونےوالی پہلی فلم

اس مقبول سپر ہیرو فرنچائز کے چوتھے حصے کا اعلان پہلی بار ۲۰۱۸ء میں کیا گیا تھا۔ اس وقت فلمساز  کرن ملہوترہ کو ہدایت کاری کے لیے منتخب کیا گیا تھا جبکہ  سدھارتھ آنند بطور شریک پروڈیوسر اس منصوبے کا حصہ بنے تھے۔ تاہم، وقت کے ساتھ فلم میں کئی تخلیقی تبدیلیاں آئیں اور آخرکار ملہوترہ اور آنند دونوں اس منصوبے سے الگ ہو گئے۔ب۲۰۲۵ء میں راکیش روشن نے انکشاف کیا کہ رتیک  روشن  خود فلم کی ہدایت کاری کریں گے، جو ان کے کریئر کی پہلی ہدایت کاری ہوگی۔
اس اعلان کے باوجود فلم کی شوٹنگ ابھی تک شروع نہیں ہوئی، جس کے باعث اس کی موجودہ صورتحال پر سوالات اٹھ رہے ہیں۔ تاخیر کی وجہ بیان کرتے ہوئے راکیش روشن نے کہا کہ  رتیک  کی توجہ اس پروڈکشن کمپنی پر مرکوز رہی ہے جسے انہوں نے رواں سال کے آغاز میں شروع کیا تھا۔

یہ بھی پڑھئے:فرنچ اوپن ۲۰۲۶ء: الیگزینڈر زیوریف کا گرینڈ سلیم جیتنے کا خواب پورا

انہوں نے مزاحیہ انداز میں کہا ’’کرش (رتیک ) تو کسی اور ہی سیارے پر ہے اور ہم سب اس کی تاریخوں کا انتظار کر رہے ہیں۔‘‘بعد ازاں انہوں نے وضاحت کی’’کوئی مسئلہ نہیں ہے، سب کچھ بخوبی چل رہا ہے۔ یہ آدی (آدتیہ چوپڑہ)، رتیک  اور میرے درمیان ایک مشترکہ کوشش ہے۔‘‘فلمساز کے مطابق اسکرپٹ پر کام تقریباً مکمل ہو چکا ہے اور ٹیم سال کے اختتام تک پروڈکشن شروع کرنے کا ہدف رکھتی ہے۔ اگرچہ انہوں نے کسی مخصوص تاریخ کا اعلان نہیں کیا، لیکن اشارہ دیا کہ پسِ پردہ کام مسلسل اور منظم انداز میں جاری ہے۔
انہوں نے کہا کہ ’’جب سب کچھ تیار ہو جائے گا تو میں آپ کو آگاہ کر دوں گا۔‘‘اس بیان کے ذریعے انہوں نے مداحوں کو یقین دلایا کہ یہ پرجوش سپر ہیرو فلمی سلسلہ اب بھی اپنی منزل کی جانب پیش قدمی کر رہا ہے۔