حرمین شریفین کی انتظامیہ کے مطابق جمادی الاول ۱۴۴۷؍ ہجری میں مسجد حرام اور مسجد نبویؐ میں زائرین اور نمازیوں کی کل تعداد ۶۶۶۳۳۱۵۳؍ تک پہنچ گئی جو پچھلے مہینے کے مقابلے میں کئی گنا زیادہ ہے۔ انتظامیہ نے بتایا کہ عبادت اور زیارت کے دوران جدید سینسر ٹیکنالوجی سے ہجوم پر نگہداشت کی گئی تاکہ زائرین کی نقل و حرکت اور انتظامات کو بہتر بنایا جا سکے۔

جمادی الاول ۱۴۴۷؍ ھ میں، حرمین شریفین میں آنے والے زائرین اور نمازیوں کی تعداد نے ایک بڑا سنگِ میل عبور کیا ہے۔ جنرل اتھاریٹی کے مطابق دونوں مساجد میں ۶؍ کروڑ ۶۶؍ لاکھ ۳۳؍ ہزار ۱۵۳؍ افراد نے عبادت یا زیارت کی جو گزشتہ ماہ کے ایک کروڑ ۲۱؍ لاکھ ۲۱؍ ہزار ۲۵۲؍ کے مقابلے میں کئی گنا زیادہ ہے۔ مسجد الحرام (مکہ) میں نمازیوں کی تعداد۲۵۹۸۷۶۷۹؍ رہی جس میں حجر اسماعیل (کعبہ سے متصل نیم گول دیوار) کے قریب ۱۰۰۴۸۹؍  نمازی شامل تھے۔ اسی ماہ میں عمرہ ادا کرنے والے زائرین کی کل تعداد تقریباً ۱۳۹۷۲۷۸۰؍ رہی، جس سے واضح ہوتا ہے کہ ایک مرتبہ پھر عمرہ میں زبردست دلچسپی ریکارڈ کی گئی۔

یہ بھی پڑھئے: نیویارک: نومنتخب میئر ظہران ممدانی کیلئے تنخواہ میں ۱۶؍ فیصد اضافہ کا بل زیر غور

مدینہ منورہ میں واقع مسجد نبویؐ میں بھی نمازیوں اور زائرین کی بڑی تعداد نے شرکت کی۔ اتھاریٹی کے مطابق وہاں ۲۳۲۹۶۱۸۵؍  افراد حاضر ہوئے جن میں روضہ شریفؐ کے گرد عقیدت کے حوالے سے آنے والے زائرین کی تعداد ۹۱۲۶۹۵؍ تھی۔ مزید اس بات کی بھی اطلاع دی گئی ہے کہ جن لوگوں نے رسول اکرم ﷺ اور صحابہ رضی اللہ عنہم کو سلام پیش کیا، ان کی تعداد ۲۳۶۳۳۲۵؍ رہی۔ جنرل اتھاریٹی نے یہ واضح کیا ہے کہ اس ماہ کے ریکارڈز کا انحصار جدید سینسر اور ڈجیٹل ٹیکنالوجی پر ہے، جو مرکزی داخلی راستوں، دروازوں اور مختلف مقامات پر نصب ہیں۔ اس نظام نے حقیقی وقت میں زائرین کی آمد و رفت پر نظر رکھی، جس سے ہجوم کے بہاؤ کو منظم کرنا اور انتظامی کارکردگی بہتر بنانا ممکن ہوا ہے۔ 

یہ بھی پڑھئے: متحدہ عرب امارات : صدر نے ’’قومی دن ‘‘ سے قبل تقریباً ۳؍ ہزار قیدیوں کو معافی دی

حکام کا کہنا ہے کہ یہ اقدامات نہ صرف عبادت کے تجربے کو بہتر بنا رہے ہیں بلکہ زائرین کی حفاظت، ہجوم کی روانی اور مسجد انتظامیہ کی استعداد کو بھی بڑھا رہے ہیں۔ بڑھتی ہوئی تعداد اور ہجوم کی نگرانی اس بات کی نشاندہی کرتی ہے کہ مملکت روز بروز حرمین شریفین کی سروس، سہولت اور نظم و نسق کو جدید خطوط پر استوار کرنے کی جانب گامزن ہے۔یہ اعداد و شمار اس وقت سامنے آئے ہیں جب حکومتِ سعودی عرب حرمین شریفین کی تزئین و ترقی، انتظامات اور ٹیکنالوجی کے استعمال پر خصوصی توجہ دے رہی ہے تاکہ ہر زائر اور نمازی کو باوقار، محفوظ اور بآسانی رسائی ممکن ہو۔