دہیسر-کاشیگاؤں میٹرو کے آغاز کے ساتھ ہی، تھانے شہر سے گزرنے والی ایک اور میٹرو لائن پر کام نے رفتار پکڑ لی ہے۔ تھانے اور بھیونڈی کو جوڑنے والی میٹرو لائن۵؍(اورینج لائن) کئی سالوں سے زیر تعمیر ہے ۔نوبھارت ٹائمس کی ایک رپورٹ کے مطابق   اس منصوبے کیلئے ایک نئی ڈیڈ لائن مقرر کر دی گئی ہے جس کے تحت توقع ہے کہ تھانے-بھیونڈی میٹرو رواں سال دسمبر تک مکمل ہو جائے گی اور جنوری۲۰۲۷ء تک شروع ہوجائیگی۔ ابھی کچھ دن پہلے دہیسر-کاشیگاؤں میٹرو کا باضابطہ افتتاح ہوا تھا۔ یہ تھانے شہر کے اندر اور ہاربر لائن کوریڈور کے ساتھ چلنے والی پہلی میٹرو لائن ہے۔

 

 

میٹرو کو پہلے ہی دن سے مسافروں کی جانب سے زبردست ردعمل ملا۔ کاشیگاؤں میٹرو اسٹیشن پر شام کے وقت مسافروں کی لمبی قطاریں دیکھی گئیں۔ اس سے صاف ظاہر ہوتا ہے کہ تھانے شہر کے اندر میٹرو سسٹم کی بہت ضرورت ہے۔ فی الحال، تھانے اور بھیونڈی کے درمیان سفر کرنے والے لوگوں کو بسوں پر انحصار کرنا پڑتا ہے۔ یہ بسیں اکثر  تاخیر سے چلتی ہیں جس سے مسافروں کو کافی پریشانی ہوتی ہے۔

 

 

میٹرو لائن۵ ؍ تھانے، بھیونڈی اور کلیان کو جوڑنے والی ۲۵؍ کلومیٹر طویل راہداری ہوگی۔ منصوبے کے پہلے مرحلے میں تھانے-بھیونڈی سیکشن مکمل کیا جا رہا ہے اور اس سیکشن پر کام فی الحال زوروں پر ہے۔ بی جے پی ایم ایل اے مہیش چوگلے کی فراہم کردہ معلومات کے مطابق، اس میٹرو لائن کے لیے زمینی کام اور تمام تکنیکی کام فی الحال اپنے آخری مراحل میں ہیں ۔ گزشتہ جمعرات کو بھیونڈی میونسپل کارپوریشن، ایم ایم آر ڈی اے اور میٹرو اتھاریٹی کے افسران نے  کام کا معائنہ کیا تھا ۔ اس وقت، انہوں نے بتایا کہ یہ کام دسمبر تک مکمل ہو جائے گا۔ میٹرو لائن۵؍ فعال ہو جائے گی، بھیونڈی کے باشندوں کو خاصی راحت ملے گی اور ان کے سفر کے وقت میں نمایاں کمی آئے گی۔