ترکی کے صدر رجب طیب اردگان نے انطالیہ میں کوپ۳۱؍ لیڈرز سمٹ کے افتتاحی اجلاس سے خطاب کرتے ہوئے غزہ میں اسرائیلی حملوں کے نتیجے میں ہونے والی تباہی کو صرف نسل کشی نہیں بلکہ ’’ایکوسائیڈ‘‘ یعنی ماحولیاتی تباہی بھی قرار دیا ،انہوں نے ترقی یافتہ ممالک پر زور دیا ہے کہ وہ کاربن کے اخراج میں کمی اور ماحولیاتی مالی معاونت کی فراہمی کے حوالے سے اپنی ذمہ داریاں پوری کریں اور ترقی پذیر ممالک کو آسان، قابلِ پیش گوئی اور ان کی ضروریات کے مطابق مدد فراہم کریں۔

کوپ۳۱؍ کے افتتاحی لیڈرز سمٹ سے خطاب کرتے ہوئے اردگان نے کہا کہ دنیا کو عالمی درجہ حرارت میں اضافے، حیاتیاتی تنوع کے نقصان، قدرتی وسائل کے بے تحاشا استعمال، غذائی تحفظ کو لاحق خطرات اور موسم سے متعلق بڑھتی ہوئی تباہ کن آفات جیسے سنگین چیلنج کا سامنا ہے۔ ان کے مطابق، موسمیاتی تبدیلی سے نمٹنے کے لیے بین الاقوامی سطح پر کیے گئے وعدوں کو عملی اقدامات میں تبدیل کرنا ضروری ہے، لیکن ترقی یافتہ اور ترقی پذیر ممالک کے درمیان مالی وسائل اور ٹیکنالوجی تک رسائی کا فرق اس کوشش میں بڑی رکاوٹ ہے۔ ترقی یافتہ ممالک کی ذمہ داریوں کا ذکر کرتے ہوئے ترک صدر نے کہا، ’’جن ترقی یافتہ ممالک نے تاریخی طور پر عالمی کاربن کے ذخائر کو نقصان پہنچایا ہے، انہیں اخراج کو کم کرنے اور مالی معاونت فراہم کرنے میں بھی بڑی ذمہ داری قبول کرنی چاہئے۔‘‘ انہوں نے مطالبہ کیا کہ ماحولیاتی مالی امداد کو زیادہ قابلِ رسائی، قابلِ پیش گوئی اور متعلقہ ممالک کی ضروریات کے مطابق بنایا جائے۔ ان کے مطابق، کم ترقی یافتہ ممالک اور چھوٹے جزیروں پر مشتمل ترقی پذیر ریاستوں کو مالی وسائل، جدید ٹیکنالوجی اور صلاحیت سازی کے مواقع تک بہتر رسائی فراہم کرنا ناگزیر ہے۔

یہ بھی پڑھئے: گریٹا تھنبرگ کی COP31 میں شرکت، عالمی لیڈروں کو تنقید کا نشانہ بنایا

اردگان نے بحرالکاہل کے جزیرہ نما ممالک کی ضروریات کو خصوصی اہمیت دینے کا ذکر کرتے ہوئے کہا، ’’ہم نے بحرالکاہل کے ممالک کی ضروریات کو مزید نمایاں کرنے اور انہیں سب سے آگے لانے کو اپنی بنیادی ذمہ داری کے طور پر منتخب کیا ہے۔‘‘ ان کا کہنا تھا کہ موسمیاتی تبدیلی کے اثرات سے سب سے زیادہ متاثر ہونے والے ممالک کو ان مسائل سے نمٹنے کے لیے درکار وسائل فراہم کیے جانے چاہئیں، تاکہ عالمی ماحولیاتی اقدامات میں کسی ملک کو پیچھے نہ چھوڑا جائے۔ ترکی کی ماحولیاتی پالیسی کا ذکر کرتے ہوئے صدر نے کہا کہ ان کا ملک توانائی، صنعت، ٹرانسپورٹ اور زراعت سمیت معیشت کے تمام شعبوں میں کاربن کے اخراج کو کم کرنے اور ماحول دوست تبدیلی کو ترجیح دے رہا ہے۔ انہوں نے فطرت کے تحفظ کو ترکی کی تہذیبی روایت سے جوڑتے ہوئے کہا، ’’ہماری تہذیب کی بنیاد فطرت اور قدرتی ماحول کے احترام پر ہے اور یہ زمین ہمارے پاس ایک مقدس امانت ہے جسے محفوظ رکھنا ہماری ذمہ داری ہے۔‘‘

یہ بھی پڑھئے: سعودی کابینہ کا بحری گزرگاہوں کی سلامتی کو یقینی بنانے پر زور

اردگان کے مطابق، ترکی نے۱۰؍ ترجیحی شعبوں میں ٹھوس پیش رفت کا ہدف مقرر کیا ہے، جن میں صاف توانائی، زیرو ویسٹ، غذائی تحفظ، صنعتی ترقی، موسمیاتی تبدیلیوں کا مقابلہ کرنے والے شہر اور سمندروں کا تحفظ شامل ہیں۔ انہوں نے بتایا کہ آنے والے عشرے میں ملک بجلی کی کھپت کی شرح میں۵۰؍ فیصد اضافے، کچرے کی پیداوار کو نصف کرنے اور صنعت میں سرکلر مواد کے استعمال کو بڑھانے کا عزم رکھتا ہے۔ ترکی نے۲۰۵۳ء تک نیٹ زیرو اخراج کا ہدف بھی مقرر کر رکھا ہے۔ خطاب کا ایک اہم حصہ غزہ کی صورتِ حال کے لیے بھی مختص تھا۔ اردگان نے اسرائیلی حملوں کے نتیجے میں ہونے والی انسانی اور ماحولیاتی تباہی کی مذمت کرتے ہوئے کہا، ’’جیسا کہ میں نے اقوامِ متحدہ کی جنرل اسمبلی میں اپنے خطاب کے دوران زور دیا تھا، غزہ میں جو کچھ ہوا ہے وہ صرف نسل کشی ہی نہیں بلکہ ایکوسائیڈ (ماحولیاتی تباہی) بھی ہے۔‘‘ انہوں نے صدیوں پرانے زیتون کے درختوں کی تباہی، مٹی اور پانی کی آلودگی اور پورے شہروں کو ملبے کے ڈھیر میں تبدیل کیے جانے کا حوالہ دیا۔ ان کے مطابق، جنگ کے ماحولیاتی اثرات انسانی زندگی، قدرتی وسائل اور آنے والی نسلوں کے مستقبل کے لیے بھی سنگین خطرہ ہیں۔ 
ترک صدر نے غزہ میں شدید بارشوں اور سیلاب کے بعد انسانی بحران کی مزید سنگینی کا ذکر کرتے ہوئے کہا کہ بنیادی ڈھانچے کی تباہی نے بے گھر فلسطینیوں کی مشکلات بڑھا دی ہیں۔ ان کے مطابق، دسیوں ہزار خیمے اور عارضی پناہ گاہیں پانی میں ڈوب گئی ہیں، جب کہ بڑی تعداد میں لوگ سرد موسم میں چھت سے محروم ہیں۔ انہوں نے کہا، ’’غزہ میں ہمارے وہ لاکھوں بھائی بہن جن کے سروں پر کوئی چھت نہیں ہے، خاص طور پر ٹھنڈ میں ٹھٹھرتے بےگناہ بچے، اکثر اپنے والدین کے بغیر سردی کے حالات میں پانی کے اندر زندہ رہنے کی جدوجہد کر رہے ہیں۔‘‘ اردگان نے کہا کہ اس صورتِ حال سے واقف ہونے کے بعد کوئی بھی شخص اپنی ذمہ داری سے بچ نہیں سکتا۔ انہوں نے غزہ تک انسانی امداد فوری طور پر پہنچانے، اس کے محاصرے اور تنہائی کی پالیسی ختم کرنے اور فلسطینیوں پر ڈھائے جانے والے مظالم کو روکنے کا مطالبہ کیا۔ انہوں نے مزید کہا، ’’غزہ کے بچوں کی تکلیفوں اور پریشانیوں کے ذریعے اپنی طاقت کا مظاہرہ کرنا، حقیقت میں، کمزوری، بے بسی اور سب سے بڑھ کر ضمیر کی کمی کی علامت ہے۔‘‘
ترک صدر نے خطاب کے اختتام پر زور دیا کہ موسمیاتی تبدیلی سے نمٹنے کی کوششیں صرف اعلانات اور وعدوں تک محدود نہیں رہنی چاہئیں۔ ان کے مطابق، آنے والی نسلوں کے لیے ایک صاف، سرسبز اور منصفانہ دنیا چھوڑنا عالمی برادری کی مشترکہ ذمہ داری ہے، اور اس مقصد کے حصول کے لیے ضروری ہے کہ زمین ناقابلِ رہائش بننے سے پہلے مؤثر اقدامات کیے جائیں۔